UHagayi 1 - iBhayibhili Elingcwele 1978

Abantu bakhuthazwa ukwakha ithempeli

¹ Ngomnyaka wesibili kaDariyu inkosi, ngosuku lokuqala lwenyanga yesithupha, ilizwi leNkosi lafika ngoHagayi umprofethi kuZerubabeli indodana kaSalatiyeli umbusi wakoJuda, lakuJoshuwa indodana kaJehozadaki umpristi omkhulu;

² lathi: INkosi yamabandla thi: Lababantu bathi kakukabi yisikhathi sokwakha futhi ithempeli leNkosi.

³ Laselifika ilizwi leNkosi ngoHagayi umprofethi

⁴ lisithi: Kuyisikhathi yini sokuba lina lihlale ezindlini zenu ezinhle, kanti lindlu ilunxiwa na?

⁵ Ngakhoke iNkosi yamabandla ithi: Ake libone ukuthi izinto zilimele njani.

⁶ Lihlanyele okunengi, lavuna okuyingcosana; liyadla, kodwa kalisuthi; liyanatha, kodwa kalikholwa; ligqoke lingakhudumali, lohola imali uholela ukuyifaka esikhwameni esivuzayo.

⁷ INkosi yamabandla ithi: Ake libone ukuthi izinto zilimele njani.

⁸ Khwelani ezintabeni ligamule izigodo, lakhe indlu engithokozisayo, lapho ngingabonakalisa khona udumo lwami, kutsho iNkosi.

⁹ Beliqaphele okunengi, kodwa kube yingcosana elikuzuzileyo; lapho likuletha ekhaya, ngikuphephule konke. Kungani na? kutsho iNkosi yamabandla. Kungenxa yendlu yami elunxiwa, lina lilibele ngezindlu zenu.

¹⁰ Ngenxa yalokhuke izulu ngaphezulu livalekile ukuba lingazuzi amazolo, lomhlabathi uvalekile ukuba lingazuzi izithelo zawo.

¹¹ Ngilethile ukoma elizweni lasezintabeni laphezu kwamabele laphezu kwewayini lamafutha laphezu kwakho konke okuvela emhlabathini, ebantwini lasenkomeni lakho konke abakwenzayo.

¹² Ngakho uZerubabeli indodana kaSalatiyeli loJoshuwa indodana kaJehozadaki umpristi omkhulu, labo bonke abantu ababesele, balilalela ilizwi leNkosi uNkulunkulu wabo, lamazwi kaHagayi umprofethi owayethunywe yiNkosi uNkulunkulu wabo; abantu bayesaba iNkosi.

¹³ UHagayi isithunywa seNkosi wasekhuluma ebantwini ilizwi leNkosi, wathi: Ngilani, kutsho iNkosi.

¹⁴ INkosi yavusa umoya kaZerubabeli indodana kaSalatiyeli umbusi wakoJuda, lomoya kaJoshuwa indodana kaJehozadaki umpristi omkhulu, lomoya wabo bonke abantu ababesele; beza ukuba basebenze endlini yeNkosi yamabandla uNkulunkulu wabo,

¹⁵ ngosuku lwamatshumi amabili lane lwenyanga yesithupha.