UGenesisi 9 - iBhayibhili Elingcwele 1978

Isivumelwano sikaNkulunkulu loNowa

¹ UNkulunkulu wabusisa uNowa lamadodana akhe, wathi kibo: Zalani, lande, ligcwalise umhlaba.

² Zizakulesaba zibe lovalo ngani zonke inyamazana zomhlaba lenyoni zaphezulu; konke okuhamba emhlabeni lenhlanzi zasolwandle kuzakunikelwa ezandleni zenu.

³ Konke okuhambayo lokuphilayo kuzakuba yikudla kwenu; ngiyalinika khona njengalokhu ngalinika imibhida.

⁴ Kodwa inyama okukuyo ukuphila, okutsho igazi, kalisoze liyidle.

⁵ Igazi lenu, okutsho ukuphila kwenu, ngizalibiza; kuzo zonke inyamazana ngizalibiza; kuwo wonke umuntu ngizabiza ukuphila kwakhe, okomunye kube sesandleni somunye.

⁶ Ochitha igazi lomuntu, igazi lakhe lizachithwa ngabantu; ngoba uNkulunkulu wamenza umuntu ngomfanekiso wakhe.

⁷ Ngakho zalani lina, lande, libe banengi emhlabeni, livame kuwo.

⁸ UNkulunkulu wasekhuluma kuNowa lamadodana akhe,

⁹ wathi: Khangelani, ngiyamisa isivumelwano sami lani lenzalo yenu emva kwenu,

¹⁰ lazo zonke izidalwa eziphilayo ezilani, izinyoni lezifuyo lenyamazana zonke zomhlaba ezikanye lani, konke okuphume emkolweni.

¹¹ Ngizakumisa isivumelwano sami lani; kakusayikubhujiswa izidalwa zonke ngamanzi kazamcolo, kakusayikuba lozamcolo ukuba abhubhise umhlaba.

¹² UNkulunkulu wathi: Lokhu kuyisibonakaliso sesivumelwano engisenza phakathi kwami lani lazo zonke izidalwa eziphilayo ezikanye lani, kube sezizukulwaneni ezizayo.

¹³ Ngizabeka umchilowamakhosikazi wami eyezini, ube yisibonakaliso sesivumelwano phakathi kwami lomhlaba.

¹⁴ Kuzakuthi nxa ngibuyisa amayezi phezu komhlaba, umchilowamakhosikazi ubonakale emayezini;

¹⁵ khona ngizakhumbula isivumelwano sami esiphakathi kwami lani lazo zonke izidalwa eziphilayo zenhlobo zonke; amanzi kawasayikuba nguzamcolo abhubhise zonke izidalwa.

¹⁶ Umchilowamakhosikazi uzakuba semayezini, lapho ngiwubona ngizakhumbula isivumelwano esingapheliyo esiphakathi kukaNkulunkulu lazo zonke inyamazana eziphilayo zenhlobo zonke ezisemhlabeni.

¹⁷ UNkulunkulu wathi kuNowa: Lokhu kuyisibonakaliso sesivumelwano engisimise phakathi kwami lakho konke okuphilayo emhlabeni.

Amazwi kaNowa kumadodana akhe

¹⁸ Amadodana kaNowa aphumayo emkolweni ayengoShemu loHamu loJafethi; uHamu wayenguyise kaKanani.

¹⁹ Yiwo lawo amadodana amathathu kaNowa; umhlaba wonke wagcwaliswa ngabazalwa yiwo.

²⁰ UNowa waba ngowokuqala ukuba ngumlimi, wahlanyela isivini.

²¹ Wanatha iwayini, wadakwa yilo, walala eze ethenteni lakhe.

²² UHamu, uyise kaKanani, wabona ubuze bukayise, watshela abafowabo bobabili ababephandle.

²³ OShemu loJafethi bathatha ingubo, bayibeka emahlombe abo bobabili, bangena behamba nyovane, bagubuzela ubuze bukayise; ubuso babo babukhangele emuva ukuba bangaboni ubuze bukayise.

²⁴ UNowa eseqaqabukile ekudakweni wezwa lokho indodana yakhe encinyane ebikwenzile kuye.

²⁵ Wasesithi: Kaqalekiswe uKanani, abe yisigqili sezigqili kubafowabo.

²⁶ Wathi futhi: INkosi uNkulunkulu imbusise uShemu, uKanani abe yisigqili sakhe.

²⁷ UNkulunkulu amenze abe mkhulu uJafethi, ahlale emathenteni kaShemu, uKanani abe yisigqili sabo.

²⁸ Emva kukazamcolo uNowa wahlala iminyaka engamakhulu amathathu lamatshumi amahlanu.

²⁹ UNowa waphila iminyaka engamakhulu aficamunwemunye lamatshumi amahlanu; wasesifa.