UGenesisi 8 - iBhayibhili Elingcwele 1978

Ukuphela kukazamcolo

¹ UNkulunkulu wasemkhumbula uNowa lakho konke okuphilayo lezifuyo zonke ezazilaye emkolweni. UNkulunkulu wavunguzisa umoya phezu komhlaba, amanzi etsha.

² Imithombo engaphansi komhlaba leminyango yasezulwini kwavalwa, lezulu laphezulu laphela.

³ Amanzi ayelokhu esetsha esuka emhlabeni; emva kwensuku ezilikhulu lamatshumi amahlanu amanzi ancipha.

⁴ Ngenyanga yesikhombisa, ngosuku lwetshumi lesikhombisa lwenyanga umkolo wema entabeni zaseArarati.

⁵ Amanzi etsha njalonjalo kwaze kwaba senyangeni yetshumi; ngosuku lokuqala lwenyanga yetshumi kwabonakala ingqonga zezintaba.

⁶ Kwathi cmva kwensuku ezingamatshumi amane uNowa wasevula iwindi lomkolo abelenzile,

⁷ wathuma iwabayi, lazulazula njalo, aze atsha amanzi emhlabeni.

⁸ Wasethuma ijuba ukuba abone ukuthi amanzi aphelile yini emhlabeni;

⁹ kodwa ijuba kalifumananga indawo yokubeka unyawo lwalo ukuba liphumule, labuyela kuye emkolweni ngoba amanzi ayesekhona emhlabeni wonke. Welula isandla sakhe, walithatha, walingenisa emkolweni.

¹⁰ Wahlala futhi insuku eziyisikhombisa; waphinda walikhupha ijuba emkolweni.

¹¹ Ijuba labuya kusihlwa, kwakukhona emlonyeni walo ihlamvu elimanzi lesihlahla esithiwa yioliva; ngakho uNowa wasesazi ukuthi amanzi aphelile emhlabeni.

¹² Waphinda wahlala insuku eziyisikhombisa, walithuma ijuba; kalabe lisabuya.

¹³ Kwathi ngomnyaka wakhe wamakhulu ayisithupha lanye, ngosuku lokuqala lwenyanga yokuqala, amanzi atsha emhlabeni. UNowa wasusa uphahla lomkolo, wabona ukuthi phezu komhlaba komile.

¹⁴ Ngenyanga yesibili, ngosuku lwamatshumi amabili lesikhombisa lwenyanga, umhlaba wawusomile.

¹⁵ UNkulunkulu wasekhuluma kuNowa

¹⁶ wathi: Phuma emkolweni, wena lomkakho lamadodana akho labafazi bamadodana akho.

¹⁷ Phuma kanye lakho konke okuphilayo kwenhlobo zonke, izinyoni lezifuyo lakho konke okuhuquzela emhlabeni, kuzale emhlabeni, kwande kube kunengi emhlabeni.

¹⁸ UNowa wasephuma kanye lamadodana akhe lomkakhe labafazi bamadodana akhe.

¹⁹ Kwaphuma inyamazana zonke lakho konke okuhuquzelayo lenyoni zonke, konke okuhamba emhlabeni ngenhlobo zakho.

²⁰ UNowa wakhela iNkosi ialtare; wathatha kuzo zonke inyamazana ezihlambulukileyo lakuzo zonke inyoni ezihlambulukileyo, wanikela umnikelo wokutshiswa phezu kwealtare.

²¹ INkosi yezwa iphunga elimnandi, yathi enhliziyweni yayo: Kangisayikuphinda ngiqalekise umhlaba ngenxa yabantu, ngoba imicabango yomuntu mibi kusukela ebutsheni bakhe; futhi kangisayikuphinda ngibhubhise okuphilayo njengalokhu ngenzile.

²² Lapho umhlaba usekhona kakuyikuphela ukuhlanyela lokuvuna, amakhaza lokufudumala, ihlobo lobusika, imini lobusuku.