UGenesisi 7 - iBhayibhili Elingcwele 1978

Ukufika kukazamcolo

¹ INkosi yasisithi kuNowa: Ngena emkolweni, wena lendlu yakho yonke, ngoba ngibonile ukuthi nguwe wedwa olungileyo phambi kwami kulesisizukulwana.

² Kuzo zonke inyamazana ezihlambulukileyo uzathatha ezinduna zibe yisikhombisa lezinsikazi zibe yisikhombisa; lakuzo inyamazana ezingahlambulukanga uthathe ngazimbili, enduna lensikazi.

³ Lakuzo inyoni zaphezulu uthathe ezinduna zibe yisikhombisa lezinsikazi zibe yisikhombisa, ukuba kube khona emhlabeni wonke inzalo yazo.

⁴ Ngoba emva kwensuku eziyisikhombisa ngizakunisa izulu emhlabeni insuku ezingamatshumi amane lobusuku obungamatshumi amane, ngibhubhise emhlabeni konke okuphilayo engakwenzayo.

⁵ UNowa wakwenza konke njengokutsho kweNkosi.

⁶ UNowa wayeleminyaka engamakhulu ayisithupha lapho uzamcolo wamanzi efika emhlabeni.

⁷ Ngenxa kazamcolo wamanzi uNowa wangena emkolweni kanye lamadodana akhe lomkakhe labafazi bamadodana akhe.

⁸ Kuzo inyamazana ezihlambulukileyo lezingahlambulukanga, lezinyoni, lakho konke okuhuquzela emhlabeni,

⁹ kwangena ngazimbili emkolweni kuNowa, enduna lensikazi, njengokutsho kukaNkulunkulu.

¹⁰ Kwathi emva kwensuku eziyisikhombisa amanzi kazamcolo afika emhlabeni.

¹¹ Ngomnyaka wamakhulu ayisithupha wokuhamba kukaNowa, ngosuku lwetshumi lesikhombisa lwenyanga yesibili, imithombo engaphansi komhlaba yabhoboka, leminyango yasezulwini yavuleka.

¹² Izulu lana emhlabeni insuku ezingamatshumi amane lasebusuku.

¹³ Ngalolosuku uNowa wangena emkolweni loShemu loHamu loJafethi, amadodana akhe, lomkakhe, labafazi bamadodana akhe,

¹⁴ kanye lenhlobo zonke zezinyamazana lezezifuyo, lenhlobo zonke zalokho okuhuquzela emhlabeni lezenyoni.

¹⁵ Zangena ngambili emkolweni kuNowa inyamazana zonke okukuzo umoya wokuphila.

¹⁶ Kwangena enduna lensikazi kuzo zonke, njengokutsho kukaNkulunkulu; iNkosi yasimvalela phakathi.

¹⁷ Uzamcolo waba semhlabeni insuku ezingamatshumi amane; amanzi anda aze aphakamisa umkolo phezu komhlaba.

¹⁸ Amanzi anda, agcwala kakhulu emhlabeni, umkolo wahamba phezu kwamanzi.

¹⁹ Amanzi anda kakhulu emhlabeni, zaze zasitshekelwa zonke intaba eziphakemeyo ezingaphansi komthunzi welanga.

²⁰ Amanzi akhula, adlula ingqonga zezintaba ngezingalo ezilitshumi lanhlanu, zaze zatshona intaba.

²¹ Konke okuphilayo okwakuhamba emhlabeni kwafa, izinyoni lezifuyo lezinyamazana lakho konke okuhuquzela emhlabeni, labantu bonke;

²² konke okulomphefumulo wokuphila emakhaleni akho, konke okusemhlabathini owomileyo, kwafa.

²³ Kwabhujiswa konke okuphilayo okusemhlabeni, abantu lezifuyo lokuhuquzelayo lezinyoni zaphezulu; lokhu konke kwachithwa, kwasala uNowa kuphela kanye lakho okwakulaye emkolweni.

²⁴ Amanzi ayekhona emhlabeni insuku ezilikhulu lamatshumi amahlanu.