UGenesisi 6 - iBhayibhili Elingcwele 1978

Ukwanda kobubi babantu

¹ Kwathi abantu sebeqala ukwanda emhlabeni, bezala amadodakazi,

² amadodana kaNkulunkulu abona amadodakazi abantu ukuthi mahle; athatha abafazi kuwo awathandayo.

³ INkosi yasisithi: Umoya wami kawuyikuhlala njalo emuntwini njengoba eyinyama nje; kodwa umuntu uzakuhlala iminyaka elikhulu lamatshumi amabili.

⁴ Ngalezonsuku kwakukhona iziqhwaga emhlabeni. Emva kokuba amadodana kaNkulunkulu aseyile emadodakazini abantu azala abantwana. Wona ayengamaqhawe asendulo engamadoda alodumo.

⁵ INkosi yasibona ukuthi ububi bomuntu bukhulu emhlabeni, lokuthi yonke imicabango yenhliziyo yakhe mibi.

⁶ INkosi yazisola ngokuthi ibenzile abantu emhlabeni, yadabuka inhliziyo yayo.

⁷ INkosi yathi: Ngizabachitha abantu engabadalayo ngibasuse emhlabeni, yebo abantu, lezilo, lokuhuquzelayo, lenyoni zaphezulu; ngoba sengizisola ngokuthi ngibenzile.

⁸ Kodwa uNowa wathandeka emehlweni eNkosi.

UNowa wenza umkolo

⁹ Le yindaba kaNowa. UNowa wayeyindoda elungileyo engasoleki esizukulwaneni sakhe; uNowa wayehamba loNkulunkulu.

¹⁰ UNowa wazala amadodana amathathu, uShemu loHamu loJafethi.

¹¹ Umhlaba wawonakele phambi kukaNkulunkulu, umhlaba wagcwala okubi.

¹² UNkulunkulu wabona ukuthi umhlaba wonakele, ngoba indlela yabantu bonke yayonakele emhlabeni.

¹³ UNkulunkulu wasesithi kuNowa: Sengizimisele ukuqeda abantu bonke, ngoba umhlaba ugcwele okubi ngenxa yabo; khangela, ngizabachitha kanye lomhlaba.

¹⁴ Yakha umkolo ngezigodo zephane, wenze izigaba phakathi kwawo, uwubhade ngengcino ngaphakathi langaphandle.

¹⁵ Nanku ozakukwenza; ubude bawo buzakuba yizingalo ezingamakhulu amathathu, ububanzi bawo bube yizingalo ezingamatshumi amahlanu, lokudepha kwawo kube yizingalo ezingamatshumi amathathu.

¹⁶ Uzafaka iwindi emkolweni libe yingalonye kusukela ngaphezulu, ufake umnyango ohlangothini lomkolo, uwenze ube lezindlu ezintathu, enye ngaphansi, lenye phakathi, lenye ngaphezulu.

¹⁷ Khangela, ngizathumela uzamcolo wamanzi emhlabeni ukuba achithe bonke abantu abangaphansi komthunzi welanga okukubo umoya wokuphila. Konke okusemhlabeni kuzakufa.

¹⁸ Kodwa ngizamisa isivumelwano sami lawe; uzakungena emkolweni wena lamadodana akho lomkakho labafazi bamadodana akho.

¹⁹ Uzathatha inyamazana ezimbili kulolo lalolo uhlobo lwezinyamazana zonke eziphilayo, ezinduna lezinsikazi, zingene emkolweni kanye lawe, uzilondoloze.

²⁰ Kulolo lalolo uhlobo lwezinyoni lezifuyo lakho konke okuhuquzelayo uzakuthatha ezimbili, zingene kanye lawe, ziphile.

²¹ Uzithathele konke ukudla okudliwayo, uzibekele khona kube yikudla kwakho lokwazo.

²² Wenze njalo uNowa; wakwenza konke uNkulunkulu ayemlayele khona.