UGenesisi 49 - iBhayibhili Elingcwele 1978

UJakobe ubusisa amadodana akhe

¹ UJakobe wasebiza amadodana akhe wathi: Buthanani ukuba ngilitshele lokho okuzakulehlela ensukwini ezizayo.

² Buthanani, lizwe lina madodana kaJakobe, limlalele uyihlo uIsrayeli.

³ Rubeni, wena ulizibulo lami lamandla ami, ingqabutho yamandla ami, ozigqajayo lolamandla amakhulu.

⁴ Kodwa njengoba uphuphuma njengamanzi, kawuyikuba ngozigqajayo, ngoba wena wakhwela embhedeni kayihlo, wawona; impela wakhwela kuwo.

⁵ USimeyoni loLevi bayizelamani; imihedla yabo iyizikhali zokuphanga.

⁶ Moya wami ungangeni emphakathini wabo, ungahlangani labo emhlanganweni wabo; ngoba ngolaka lwabo babulala abantu, ngobudlova babo baquma izinkabi umsipha.

⁷ Kaluthukwe ulaka lwabo ngoba lulamandla, lentukuthelo yabo, ngoba ilesihluku. Ngizakubachitha koJakobe, ngibahlakaze koIsrayeli.

⁸ Juda, abafowenu bazadumisa wena; isandla sakho sizakuba sentanyeni zezitha zakho; amadodana kayihlo azakukhothamela phansi phambi kwakho.

⁹ UJuda unjengesilwane; wenyukile empangweni, ndodana yami, uguqile, ulele njengesilwane, njengesilwane esisikazi; ngubani ozakumvusa na?

¹⁰ Intonga yobukhosi kayiyikusuka kuJuda, lodondolo lokubusa phakathi kwenyawo zakhe, aze afike lowo ofanele lona, labantu bonke bamlalele.

¹¹ Ubophela ithole lakhe likababhemi evinini, lethole lakhe likababhemikazi evinini elihle. Ugezisa ingubo zakhe ewayinini, lezambatho zakhe egazini lezithelo zevini.

¹² Amehlo akhe azakuba bomvu ngewayini, lamazinyo akhe abe mhlophe ngochago.

¹³ UZebuluni uzakuhlala ngasolwandle, abe litheku lemikolo, umkhawulo wakhe uzakuba ngaseSidoni.

¹⁴ UIsakari ungubabhemi olamandla, oqutha phakathi kwezibaya.

¹⁵ Wabona indawo yokuphumula ukuthi yinhle, lelizwe ukuthi lilungile, wagobisa amahlombe akhe ukuba athwale, waba yisigqili somsebenzi onzima.

¹⁶ UDani uzakwahlulela abantu bakhe, engesinye sezizwe zakoIsrayeli.

¹⁷ UDani kabe yinyoka endleleni, inhlangwana emkhondweni eluma izithende zebhiza, ukuze awe nyovane umgadi walo.

¹⁸ Nkosi, ngilindele ukusiza kwakho.

¹⁹ UGadi, ixuku labaphangi lizamhlasela, kodwa yena uzohlasela ezithendeni zabo.

²⁰ UAsheri, ukudla kwakhe kuzakuba kunengi, uzakuveza ukudla kwamakhosi.

²¹ UNafitali uyimpala othukululiweyo ezala abantwana abahle.

²² UJosefa ulugatsha oluthelayo ngasemthonjeni, ingatsha zakhe zikhwela emdulini.

²³ Abatshoki bamhlupha kakhulu, bamciba, bamzingela.

²⁴ Kodwa idandili lakhe lahlala liqinile, lamandla ezandla zakhe aqiniswa ngezandla zikaSomandla kaJakobe, okuvela kuye umalusi, iLitshe likaIsrayeli,

²⁵ langoNkulunkulu kayihlo ozakukusiza, langoSomandla ozakukubusisa ngezibusiso ezivela ezulwini, lezibusiso ezivela ngaphansi komhlaba, lezibusiso zamabele lezesizalo,

²⁶ izibusiso zamabele lezempoko, lezibusiso ezivela ezintabeni, lezinto ezinhle ezivela entabeni ezimiyo kuze kube nininini; zizakuba phezu kwekhanda likaJosefa, laphezu kwenkanda yalowo oyisikhulu phakathi kwabafowabo.

²⁷ UBenjamini uyimpisi ephangayo: ekuseni iyadla impango, kusihlwa iyahlukanisa ekuphangileyo.

²⁸ Bonke labo bayizizwe ezilitshumi lambili zakoIsrayeli; futhi lawo ngamazwi kayise awakhuluma kubo lapho ebabusisa; wabusisa ilowo lalowo ngesibusiso sakhe.

²⁹ Wabalaya wathi: Sengihamba ngiya kwabaphansi; lingimbele ndawonye labobaba obhalwini olusensimini kaEfroni umHethi,

³⁰ obhalwini olusesimini yaseMakaphela eduze leMamre, elizweni laseKanani, uAbrahama owaluthenga kanye lensimu kuEfroni umHethi ibe yindawo yokungcwabela.

³¹ Lapho babambela khona oAbrahama loSara umkakhe; lapho babambela khona oIsaka loRebeka umkakhe; lami kulapho ngammbela khona uLeya,

³² insimu, lobhalu olukiyo, kwathengwa ebantwaneni bakaHethi.

³³ Kwathi uJakobe eseqedile ukulaya amadodana akhe, waziqoqela inyawo zakhe embhedeni, wafa, waya kwabaphansi.