UGenesisi 48 - iBhayibhili Elingcwele 1978

UJakobe ubusisa uJosefa lamadodana akhe

¹ Kwathi emva kwalokhu kwathiwa kuJosefa: Khangela, uyihlo uyagula. Wasethatha amadodana akhe amabili uManase loEfrayimi.

² Kwatshiwo lakuJakobe ukuthi: Khangela, indodana yakho uJosefa iyeza kuwe. UIsrayeli waziqinisa, wavuka wahlala embhedeni.

³ UJakobe wathi kuJosefa: UNkulunkulu uSomandla wabonakala kimi eLuzi elizweni laseKanani, wangibusisa,

⁴ wathi kimi: Khangela, ngizakukwandisa ube labantwana abanengi, ngikwenze ube yizizwe ezinengi, nginike inzalo yakho lelilizwe emva kwakho, libe yilifa elingapheliyo.

⁵ Khathesi amadodana akho amabili, owawazalela elizweni laseGibithe ngingakafiki kuwe eGibithe, angawami; uEfrayimi loManase njengoRubeni loSimeyoni bazakuba ngabami.

⁶ Inzalo yakho owayizala emva kwabo ingeyakho; izakubizwa ngebizo labafowabo ukuze badle ilifa labo.

⁷ Minake, ekusukeni kwami ePadani‐Arama, ngafelwa nguRaheli endleleni, elizweni laseKanani, sisekhatshana leEfrathi; ngammbela khona ngasendleleni eya eEfrathi, eliliBetlehema.

⁸ UIsrayeli ebona amadodana kaJosefa wathi: Ngobani laba?

⁹ UJosefa wathi kuyise: Ngamadodana ami, anginika wona lapha uNkulunkulu. Wathi: Asondeze kimi ngiwabusise.

¹⁰ Amehlo kaIsrayeli ayesefiphele ngenxa yobudala bakhe engaselakubona. UJosefa wawasondeza; wawanga, wawagona.

¹¹ UIsrayeli wathi kuJosefa: Ngangingathembi ukubona ubuso bakho, kodwa uNkulunkulu ungivumele ukuba ngibone lenzalo yakho njalo.

¹² UJosefa wasewasusa emadolweni akhe, wathi mbo ngobuso phansi.

¹³ UJosefa wabathatha bobabili, ngesandla sakhe sokunene wambeka uEfrayimi ngakwesokhohlo sikaIsrayeli, langesandla sakhe sekhohlo wambeka uManase ngakwesokunene sikaIsrayeli, wabasondeza kuye.

¹⁴ UIsrayeli waselula isandla sakhe sokunene, wasibeka ekhanda likaEfrayimi lanxa engomncinyane, lesandla sakhe sekhohlo wasibeka ekhanda likaManase, ephambanisa izandla zakhe, ngoba uManase wayelizibulo.

¹⁵ Wasembusisa uJosefa wathi: UNkulunkulu abahamba phambi kwakhe okhokho bami oAbrahama loIsaka, uNkulunkulu ongondle ekuhambeni kwami konke kuze kube lamuhla,

¹⁶ isithunywa esingikhulule kokubi konke, sibusise abafana; ibizo lami lebizo labokhokho bami oAbrahama loIsaka libe ngelabo; bande babe banengi emhlabeni.

¹⁷ UJosefa esebonile ukuthi uyise ubekile isandla sakhe sokunene ekhanda likaEfrayimi, kwaba kubi kuye; wasibamba isandla sikayise ukuba asisuse ekhanda likaEfrayimi asibeke ekhanda likeManase.

¹⁸ UJosefa wathi kuyise: Kakungabi njalo, baba, ngoba lo ulizibulo; beka isandla sakho sokunene ekhanda lakhe.

¹⁹ Kodwa uyise wala wathi: Ngiyazi, ndodana yami, ngiyazi; laye uzakuba yisizwe abe mkhulu; kanti umfowabo omncinyane uzakuba mkhulu kulaye, lenzalo yakhe ibe yizizwe ezinengi.

²⁰ Wababusisa ngalolosuku wathi: Nxa abantu bakoIsrayeli bebusisa abanye bazakuthi: UNkulunkulu kakwenze ube njengoEfrayimi lanjengoManase. Ngalokho wasembeka uEfrayimi ngaphambi kukaManase.

²¹ UIsrayeli wathi kuJosefa: Khangela, mina ngiyafa; kodwa uNkulunkulu uzakuba lawe, akubuyisele elizweni laboyihlo.

²² Futhi ngikunikile okunye okudlula lokho engakunika abafowenu, ngitsho iShekema engalithatha kumaAmori ngomkhonto langomtshoko wami.