UGenesisi 42 - iBhayibhili Elingcwele 1978

Abafowabo bakaJosefa baya eGibithe

¹ UJakobe esezwile ukuthi kukhona amabele eGibithe, wathi emadodaneni akhe: Kungani likhangelana nje?

² Wathi: Khangelani, ngizwile ukuthi kukhona amabele eGibithe; yehlani liye khona, lisithengele amabele, ukuze sisile singafi.

³ Abafowabo bakaJosefa abalitshumi baya eGibithe ukuthenga amabele.

⁴ Kodwa uBenjamini, umfowabo kaJosefa, uJakobe kamthumanga labafowabo, ngoba wathi: Funa ehlelwe ngokubi.

⁵ Amadodana kaIsrayeli afika kanye labanye ukuba athenge amabele, ngoba indlala yayikhona elizweni laseKanani.

⁶ UJosefa wayengumbusi welizwe: nguye owayethengisela abantu bonke belizwe; bafikake abafowabo, bamkhothamela ngobuso emhlabathini.

⁷ UJosefa esebabonile abafowabo, wabazi, kodwa wazitshaya ongabaziyo, wabahalada wathi kubo: Liphuma ngaphi? Bathi: Sivele elizweni laseKanani, size ukuthenga ukudla.

⁸ UJosefa wabazi abafowabo, kodwa bona kabamazanga.

⁹ UJosefa wasekhumbula amaphupho awaphupha ngabo, wathi kibo: Lizinhloli, lize ukuba libone ubuthakathaka belizwe.

¹⁰ Bathi kuye: Atshi, nkosi; kodwa inceku zakho zize ukuthenga ukudla.

¹¹ Sonke singamadodana andodanye; singabantu abaqotho, inceku zakho kazisizo izinhloli.

¹² Wathi kubo: Atshi bo! kodwa lize ukubona ubuthakathaka belizwe.

¹³ Bathi: Thina zinceku zakho siyizelamani ezilitshumi lambili, amadodana andodanye elizweni laseKanani; khangela, encinyane ikubaba, enye kayisekho.

¹⁴ UJosefa wathi kubo: Kuyikho lokho engikutshoyo kini, ukuthi: Lizinhloli.

¹⁵ Kodwa lizahlolwa kulokhu; ngifunga uFaro, kaliyikusuka lapha kuze kufike umfowenu omncinyane.

¹⁶ Thumani omunye wenu, amlande umfowenu; lizakubotshwa ukuba kuhlolwe amazwi enu, kubonwe ukuthi liqinisile yini; uba kungenjalo, ngifunga uFaro, impela lizinhloli.

¹⁷ Wabafaka entolongweni ukuba balondolozwe insuku ezintathu.

¹⁸ UJosefa wasesithi kubo ngosuku lwesithathu: Yenzani lokhu ukuba lisile, ngoba ngiyamesaba uNkulunkulu.

¹⁹ Uba lingabaqotho, kasale omunye wabafowenu endlini yokulondolozwa kwenu, kodwa abanye bahambe, base amabele kwabakini abalambayo,

²⁰ lilethe umnawenu omncinyane kimi ukuba kubonakale iqiniso lamazwi enu, ukuze lingabulawa. Benza njalo.

²¹ Basebekhulumisana besithi: Impela silecala ngomfowethu, ngoba sabona usizi lwenhliziyo yakhe, wasincenga, kodwa kasimlalelanga; ngenxa yalokho sehlelwe yikuhlupheka lokhu.

²² URubeni wabaphendula wathi: Kangitshongo yini ukuthi lingezi okubi kuye umfana? Kodwa kalingilalelanga. Ngakho khangelanike, igazi lakhe selibizwa kithi.

²³ Babengazi ukuthi uJosefa uyabezwa, ngoba kwakulomtoliki phakathi kwabo.

²⁴ Wabafulathela, wakhala; wabuya waphendukela kubo, wakhuluma labo; wasethatha uSimeyoni phakathi kwabo, wambopha phambi kwabo.

²⁵ UJosefa waselaya ukuba amasaka abo agcwaliswe ngamabele, lokuba imali yalowo lalowo ibuyiselwe esakeni lakhe, banikwe umphako wohambo lwabo; kwenziwa njalo.

²⁶ Basebesethwesa obabhemi babo amabele abo, basuka lapho.

²⁷ Kwathi omunye evula isaka lakhe ukuba anike ubabhemi wakhe ukudla endlini yezihambi, wabona imali yakhe isemlonyeni wesaka.

²⁸ Wathi kubafowabo: Imali yami ibuyiselwe; nansi isesakeni lami. Batshaywa luvalo kakhulu, bakhangelana bethuthumela, bathi: Kuyini lokhu uNkulunkulu akwenze kithi na?

²⁹ Bafika kuJakobe uyise elizweni laseKanani, bamlandisela konke okwenzakeleyo kubo;

³⁰ bathi: Umuntu ongumbusi walelolizwe wasihalada kakhulu, wathi siyizinhloli zelizwe.

³¹ Thina sathi kuye: Singabaqotho; kasisizo izinhloli;

³² siyizelamani ezilitshumi lambili, amadodana omuntu munye; enye kayisekho, lenye encinyane ikubaba khathesinje elizweni laseKanani.

³³ Lowomuntu ongumbusi welizwe wathi kithi: Ngizakubona ngalokhu ukuba lingabantu abaqotho yini; tshiyani omunye wabafowenu kimi, lihambe lise amabele kwabakini abalambayo,

³⁴ lilethe umnawenu omncinyane kimi; ng’khona ngizakubona ukuthi kalisizo izinhloli kodwa lingabaqotho, ngilinike umfowenu, lithenge elizweni.

³⁵ Kwathi sebethulula amasaka abo, bafumanisa isikhwama semali salowo lalowo sisesakeni lakhe. Lapho bona loyise bebona izikhwama zabo zemali, batshaywa luvalo.

³⁶ UJakobe uyise wathi kubo: Liyangamuka abantwana bami; uJosefa kasekho loSimeyoni kasekho, lakhathesi selizakuthatha uBenjamini; konke lokhu kwehlela phezu kwami.

³⁷ URubeni wasekhuluma kuyise esithi: Bulala amadodana ami womabili uba ngingambuyisi kuwe uBenjamini; mnikele esandleni sami, ngizambuyisa kuwe.

³⁸ UJakobe wathi: Umntanami kayikuhamba lani, ngoba umfowabo sewafa, kusele yena yedwa; uba esehlelwa yingozi endleleni elihamba ngayo, lizakwehlisela endaweni yabafileyo izimvi zami ngosizi.