UGenesisi 41 - iBhayibhili Elingcwele 1978

UJosefa uchasisa amaphupho kaFaro

¹ Kwathi emva kweminyaka emibili waphupha uFaro; wazibona emi ngasemfuleni.

² Kwakhuphuka emfuleni amankomokazi ayisikhombisa, abukekayo anonileyo; adla emihlangeni.

³ Kwakhuphuka emfuleni amanye amankomokazi ayisikhombisa emva kwawo, ekhangeleka kubi, ecakile; ema kwamanye amankomokazi okhunjini lomfula.

⁴ Lawo akhangeleka kubi acakileyo adla abukekayo anonileyo. UFaro wasephaphama.

⁵ Walala ubuthongo futhi, waphupha ngokwesibili; khangela, kwakhahlela izikhwebu eziyisikhombisa ohlangeni lunye, ezipheleleyo zilungile.

⁶ Kwakhahlela emva kwazo izikhwebu eziyisikhombisa ezincinyane, zihangulwe ngumoya wasempumalanga.

⁷ Izikhwebu ezincinyane zaginya izikhwebu ezipheleleyo ezilungileyo. UFaro wasephaphama, wabona ukuthi kwakuliphupho nje.

⁸ Kwathi ekuseni umoya wakhe wakhathazeka; wabiza izangoma zonke zaseGibithe lazo zonke izazi. Wazilandisela iphupho lakhe; kodwa kwakungekho muntu owayengamchasisela lona.

⁹ Induna yabaphathizitsha yasikhuluma loFaro yathi: Khathesi ngiyawakhumbula amacala ami.

¹⁰ Kwathi uFaro esezithukuthelele inceku zakhe, wangifaka endlini yenduna yabalindi ukuba ngilondolozwe khona, mina lenduna yabaphekizinkwa;

¹¹ saphupha amaphupho ngabusuku bunye, mina layo. Saphupha, ilowo lalowo waphupha iphupho elilencazelo ezehlukeneyo.

¹² Kwakukhona kanye lathi insizwa engumHeberu, inceku yenduna yabalindi; sayilandisela amaphupho ethu, yasichasisela wona; kwaba yilowo lalowo ngokwephupho lakhe.

¹³ Kwenzakala njengokusichasisela kwayo; mina inkosi yangibuyisela esikhundleni sami, yena yamphanyeka.

¹⁴ UFaro wasembiza uJosefa; bamkhupha entolongweni ngokuphangisa; esephucile wafaka ezinye izigqoko, wangena kuFaro.

¹⁵ UFaro wathi kuJosefa: Ngiphuphile iphupho, kakho ongalichasisa; ngizwile ngawe ukuthi nxa ulandiselwa iphupho, ungalichasisa.

¹⁶ UJosefa wamphendula uFaro wathi: Kakukho emandleni ami lokho. UNkulunkulu uzamphendula kuhle uFaro.

¹⁷ UFaro wathi kuJosefa: Ephupheni lami ngangimi okhunjini lomfula;

¹⁸ khangela, kwakukhuphuka emfuleni amankomokazi ayisikhombisa, anonileyo abukekayo, adla emihlangeni.

¹⁹ Kwakhuphuka amanye amankomokazi ayisikhombisa emva kwawo, amabi, acakileyo; angizanga ngiwabone amabi njengawo kulo lonke ilizwe laseGibithe.

²⁰ Kwathi amankomokazi akhangeleka kubi adla amankomokazi ayisikhombisa okuqala anonileyo.

²¹ Lapho esewadlile kakubonakalanga ukuthi awadlile, ngoba ayelokhu ekhangeleka kubi njengakuqala. Ngasengiphaphama.

²² Ngabona kwelinye iphupho lami izikhwebu eziyisikhombisa zikhahlela ohlangeni lunye, ziphelele zilungile;

²³ kwasekukhahlela emva kwazo izikhwebu eziyisikhombisa ezitshwabheneyo, zizincinyane, zihangulwe ngumoya wasempumalanga.

²⁴ Izikhwebu ezincinyane zaginya izikhwebu eziyisikhombisa ezilungileyo. Ngakulandisela izanuse lokhu; kodwa kwakungekho sanuse esasingangichasisela khona.

²⁵ UJosefa wasesithi kuFaro: Amaphupho kaFaro ayafanana. Lokho uNkulunkulu asezakukwenza, umazisile khona uFaro.

²⁶ Amankomokazi ayisikhombisa alungileyo ayiminyaka eyisikhombisa; lezikhwebu eziyisikhombisa ezilungileyo ziyiminyaka eyisikhombisa. Amaphupho ayafanana.

²⁷ Amankomokazi acakileyo akhangeleka kubi akhuphuka emva kwawo ayiminyaka eyisikhombisa; izikhwebu eziyisikhombisa ezincinyane ezihangulwe ngumoya wasempumalanga ziyiminyaka eyisikhombisa yendlala.

²⁸ Kuyikho lokhu engikutshiloyo kuFaro ukuthi lokho uNkulunkulu asezakukwenza, ukubonakalisile kuFaro.

²⁹ Kuzakuba khona iminyaka eyisikhombisa yenala enkulu kulo lonke ilizwe laseGibithe.

³⁰ Emva kwayo kuzakuba khona iminyaka eyisikhombisa yendlala; izakhohlakala inala yonke elizweni laseGibithe; indlala izaliqeda ilizwe.

³¹ Inala kayiyikukhunjulwa elizweni ngenxa yendlala elandelayo, ngoba izakuba nzima kakhulu.

³² Ukuba iphupho liphindwe kabili kuFaro kungoba lokhu kumisiwe nguNkulunkulu, futhi uNkulunkulu uzakukwenza masinyane.

³³ Ngakhoke uFaro kadinge umuntu oqaphelisayo lohlakaniphileyo, ambeke ukuba aphathe ilizwe laseGibithe.

³⁴ UFaro kenze nje, abeke ababonisi baphathe ilizwe; balondoloze okwesihlanu kwezithelo zelizwe laseGibithe eminyakeni eyisikhombisa yenala.

³⁵ Babuthe konke ukudla kwaliminyaka elungileyo ezayo, babuthele amabele okudla emizini ngokulaya kukaFaro, bawagcine.

³⁶ Ukudla lokhu kuzakubekelwa ilizwe ngenxa yeminyaka eyisikhombisa yendlala ezakuba khona elizweni laseGibithe, ukuba ilizwe lingabhujiswa yindlala.

Ukuphakanyiswa kukaJosefa

³⁷ Lokhu kwaba kuhle kuFaro lasezincekwini zakhe zonke.

³⁸ UFaro wasesithi ezincekwini zakhe: Singamthola yini onjengaye, umuntu okukuye umoya kaNkulunkulu na?

³⁹ UFaro wathi kuJosefa: Njengalokhu uNkulunkulu ekutshengisile lokhu konke, kakho oqaphelisayo lohlakaniphileyo njengawe.

⁴⁰ Wena uzaphatha indlu yami, bonke abantu bami bazabuswa ngelizwi lakho; mina ngizakuba mkhulu kulawe esihlalweni sobukhosi kuphela.

⁴¹ UFaro wathi futhi kuJosefa: Khangela, sengikubekile ukuphatha lonke ilizwe laseGibithe:

⁴² UFaro wakhupha indandatho yakhe esandleni sakhe, wayifaka esandleni sikaJosefa, wamambathisa izigqoko zelembu elihle, wamgaxa iketane legolide.

⁴³ Wamkhwelisa enqoleni yakhe yesibili; bahamba phambi kwakhe bememeza besithi: Mkhothameleni! Wambeka ukuba aphathe lonke ilizwe laseGibithe.

⁴⁴ UFaro wathi kuJosefa: NginguFaro; ngaphandle kwelizwi lakho kakho umuntu ozakuphakamisa isandla sakhe loba unyawo lwakhe elizweni lonke laseGibithe.

⁴⁵ UFaro wamutha ibizo uJosefa elokuthi nguZafenathi‐Paneya. Wamnika uAsenathi, indodakazi kaPotifera umpristi waseOni, ukuba abe ngumkakhe. UJosefa waphuma, walihamba ilizwe lonke laseGibithe.

⁴⁶ UJosefa wayeleminyaka engamatshumi amathathu mhla esima phambi kukaFaro inkosi yaseGibithe. UJosefa waphuma kuFaro, wadabula ilizwe lonke laseGibithe.

⁴⁷ Eminyakeni eyisikhombisa yenala umhlaba wathela kakhulu.

⁴⁸ Waqoqa konke ukudla kweminyaka leyo eyisikhombisa elizweni laseGibithe, wakubuthela emizini; ukudla kwamasimu azingelezele lowo lalowo umuzi wakubuthela kuwo.

⁴⁹ UJosefa wabutha amabele aba ngangetshebetshebe lolwandle, aba manengi kakhulu waze wayekela ukulinganisa, ngoba engasalinganiseki.

⁵⁰ UJosefa wazala amadodana amabili ungakafiki umnyaka wendlala, ewazala kuAsenathi indodakazi kaPotifera umpristi waseOni.

⁵¹ UJosefa waqamba ibizo lezibulo wathi nguManase, wathi: Ngoba uNkulunkulu ungenze ukuba ngikhohlwe konke ukuhlupheka kwami lendlu yami yonke kababa.

⁵² Wabiza ibizo leyesibili wathi nguEfrayimi, wathi: Ngoba uNkulunkulu ungenze ukuba ngizale elizweni lokuhlupheka kwami.

⁵³ Kwasekuphela iminyaka eyisikhombisa yenala eyayiselizweni laseGibithe.

⁵⁴ Kwasekuqala ukufika iminyaka eyisikhombisa yendlala, njengokutsho kukaJosefa. Kwaba khona indlala emazweni wonke, kodwa elizweni laseGibithe kwakukhona ukudla.

⁵⁵ Kwathi ilizwe lonke laseGibithe selilamba, abantu bakhala ngokudla kuFaro. UFaro wathi kiwo wonke amaGibithe: Yanini kuJosefa, lenze lokho azalitshela khona.

⁵⁶ Ngakhoke kwathi sekulendlala emhlabeni wonke, uJosefa wasevula zonke iziphala, wathengisela amaGibithe amabele; indlala yayinkulu elizweni laseGibithe.

⁵⁷ Wonke amazwe ayefika kuJosefa eGibithe ukuzathenga amabele, ngoba indlala yayinkulu emhlabeni wonke.