UGenesisi 40 - iBhayibhili Elingcwele 1978

UJosefa uchasisa amaphupho

¹ Kwathi emva kwalezizinto umphathizitsha wenkosi yaseGibithe lomphekizinkwa wayo bona enkosini yabo, inkosi yaseGibithe.

² UFaro wazithukuthelela lezonduna zakhe ezimbili, induna yabaphathizitsha lenduna yabaphekizinkwa.

³ Wazifaka entolongweni, indawo lapho uJosefa ayebotshelwe khona, ukuba zilondolozwe endlini yenduna yabalindi.

⁴ Induna yabalindi yazinikela kuJosefa, wazigcina; zalondolozwa nguye khona insuku ezinengi.

⁵ Zombili zaphupha amaphupho ngabusuku bunye, ileyo laleyo yaba lephupho layo. Umphathizitsha lomphekizinkwa wenkosi yaseGibithe ababebotshiwe besentolongweni baphupha amaphupho alencazelo ezehlukeneyo.

⁶ UJosefa wangena kibo ekuseni, wababona benyukumele.

⁷ Wazibuza induna zikaFaro ezazilaye zilondolozwe endlini yenkosi yakhe wathi: Kungani linyukumele lamhla na?

⁸ Zathi kuye: Siphuphile amaphupho, kakho ongawachasisa. UJosefa wathi kuzo: Ukuchasisa kakusikho okukaNkulunkulu na? Ngitshelani wona.

⁹ Induna yabaphathizitsha yamtshela uJosefa iphupho layo yathi kuye: Khangela, ephupheni lami kwakukhona ivini phambi kwami;

¹⁰ evinini kwakukhona ingatsha ezintathu; lahluma, lakhahlela, amahlukuzo alo aba lezithelo ezivuthiweyo.

¹¹ Inkezo kaFaro yayisesandleni sami; ngasengithatha izithelo, ngazikhamela enkezweni kaFaro, ngamnika uFaro inkezo esandleni sakhe.

¹² UJosefa wathi kuye: Nanku ukuchasiswa kwalo. Ingatsha ezintathu ziyizinsuku ezintathu;

¹³ zingakadluli insuku ezintathu uFaro uzakukuphakamisa, akubuyisele esikhundleni sakho; wena uzamnika uFaro inkezo yakhe esandleni sakhe njengokwenza kwakho kwakuqala lapho wawusengumphathizitsha wakhe.

¹⁴ Kodwa ungikhumbule lapho usuhlezi kuhle, ungenzele umusa ungibike kuFaro, ukuze angikhuphe kulindlu.

¹⁵ Ngoba ngebiwa elizweni lamaHeberu, lalapha futhi kangenzanga lutho ukuba bangifake entolongweni.

¹⁶ Lapho induna yabaphekizinkwa ibona ukuthi kwakulungile ukuchasisa lokho, yathi kuJosefa: Lami ngiphuphile iphupho; bekukhona ekhanda lami izitsha ezintathu zilezinkwa ezimhlophe;

¹⁷ kwakukhona esitsheni esingaphezulu inhlobo zonke zezinkwa zikaFaro; kodwa inyoni zakudla ukudla esitsheni esisekhanda lami.

¹⁸ UJosefa waphendula wathi: Nanku ukuchasiswa kwalo. Izitsha ezintathu ziyizinsuku ezintathu;

¹⁹ zingakadluli insuku ezintathu uFaro uzakuquma ikhanda lakho, akuphanyeke esihlahleni; inyoni zizakudla inyama yakho.

²⁰ Kwathi ngosuku lwesithathu, usuku lokuzalwa kukaFaro, uFaro wenzela inceku zakhe zonke idili; walaya ukuba kulethwe induna yabaphathizitsha lenduna yabaphekizinkwa; walaya ukuba induna yabaphathizitsha lenduna yabaphekizinkwa zilethwe phambi kwezinceku zakhe.

²¹ Wayibuyisela induna yabaphathizitsha esikhundleni sayo; yamnika uFaro inkezo esandleni sakhe.

²² Kodwa wayiphanyeka induna yabaphekizinkwa, njengokuchasiselwa kwabo nguJosefa.

²³ Kodwa induna yabaphathizitsha kayikhumbulanga uJosefa, yamkhohlwa.