UGenesisi 4 - iBhayibhili Elingcwele 1978

UKayini loAbela

¹ UAdamu wangena lomkakhe uEva engutsheni; wathatha isisu, wabeletha uKayini wathi: Ngibelethe indoda ngosizo lweNkosi.

² Wabuya wathatha isisu, wabeletha uAbela umfowabo. UAbela waba ngumalusi wezimvu, uKayini waba ngumlimi.

³ Kwathi emva kwesikhathi esithile uKayini waletha eNkosini umnikelo wezithelo zomhlabathi.

⁴ Laye uAbela waletha umnikelo wamazibulo ezimvu kanye lamahwahwa awo. INkosi yathokoza ngoAbela langomnikelo wakhe.

⁵ Kodwa kayithokozanga ngoKayini langomnikelo wakhe. UKayini wasethukuthela, wenyela ngakho.

⁶ INkosi yathi kuKayini: Uthukuthelelani, wenyele ngani na?

⁷ Angithi uba usenza kuhle, uzakwamukeleka na? Kodwa uba ungenzi kuhle, isono siyakucathamela ngasemnyango sikunxwanele, kodwa umele ukusibusa.

⁸ UKayini wathi kumfowabo uAbela: Asiye egangeni. Kwathi besegangeni, uKayini wasukela umfowabo uAbela, wambulala.

⁹ INkosi yasisithi kuKayini: Ungaphi umfowenu uAbela? Yena wathi: Angazi. Ngingumlondolozi womfowethu na?

¹⁰ Yathi: Wenzeni na? Ilizwi legazi lomfowenu liyakhala kimi livela emhlabathini.

¹¹ Usuqalekisiwe emhlabathini okhamise umlomo wawo ukwamukela igazi lomfowenu esandleni sakho.

¹² Nxa ulima umhlabathi, kawusayikukunika isithelo sawo; uzakuba luzulane lomhambuma emhlabeni.

¹³ UKayini wasesithi eNkosini: Isono sami sikhulu, siyangahlula.

¹⁴ Khangela, uyangixotsha lamhla endaweni yakithi lasebusweni bakho; ngizakuba luzulane lomhambuma emhlabeni; ongifumanayo uzakungibulala.

¹⁵ INkosi yathi kuye: Impela lowo obulala uKayini uzakuphindiselwa kasikhombisa. INkosi yabeka uphawu kuKayini funa omfumanayo ambulale.

¹⁶ UKayini wasesuka ebusweni beNkosi, wahlala elizweni laseNodi ngasempumalanga kwaseEdeni.

Inzalo kaKayini

¹⁷ UKayini wangena lomkakhe engutsheni; umkakhe wathatha isisu, wabeletha uEnoki. Wakha umuzi, wawutha ibizo lokuthi yiEnoki, ibizo lendodana yakhe.

¹⁸ UEnoki wazala uIradi; uIradi wazala uMehujayeli; uMehujayeli wazala uMethushayeli; uMethushayeli wazala uLameki.

¹⁹ ULameki wathatha abafazi ababili, ibizo lomunye lalinguAda lebizo lomunye lalinguZila.

²⁰ UAda wazala uJabali owaba ngukhokho walabo abahlala emathenteni, befuya inkomo.

²¹ Ibizo lomfowabo lalinguJubali owaba ngukhokho wabo bonke abatshaya ichacho lomhlanga.

²² UZila wazala uTubali‐Kayini owaba ngukhokho wabo bonke abakhanda izinto zethusi lezensimbi ezisikayo. Udadewabo kaTubali‐Kayini wayenguNahama.

²³ ULameki wathi kubafazi bakhe: Ada loZila zwanini ilizwi lami, lina bafazi bakaLameki lalelani ukukhuluma kwami; ngoba ngizabulala indoda engilimazayo lensizwa engihluzulayo.

²⁴ Uba uKayini ezakuphindiselwa kasikhombisa, impela uLameki uzakuphindiselwa kamatshumi ayisikhombisa ephindwe kasikhombisa.

Inzalo kaSeti

²⁵ UAdamu waphinda wangena lomkakhe engutsheni; wazala indodana wayitha ibizo wathi nguSeti; ngoba wathi: UNkulunkulu usenginikile enye inzalo esikhundleni sikaAbela, ngoba uKayini wambulala.

²⁶ Laye uSeti wazala indodana, wayitha ibizo wathi nguEnosi. Ngalesosikhathi abantu basebeqala ukukhuleka ebizweni leNkosi.