UGenesisi 39 - iBhayibhili Elingcwele 1978

UJosefa lomkaPotifa

¹ UJosefa wasiwa eGibithe; uPotifa, inceku kaFaro lenduna yabalindi, engumGibithe, wamthenga kumaIshmayeli ayemuse khona.

² INkosi yayiloJosefa, waba ngumuntu ophumelelayo; wayehlala endlini yenkosi yakhe yomGibithe.

³ Inkosi yakhe yabona ukuthi iNkosi ilaye, lokuthi konke akwenzayo iNkosi yakuphumelelisa.

⁴ UJosefa wafumana umusa phambi kwayo, wayisebenzela; yamenza waba ngumphathi wendlu yayo lakho konke eyayilakho.

⁵ Kusukela esikhathini eyamenza ngaso abe ngumphathi wendlu yayo lakho konke eyayilakho, iNkosi yayibusisa indlu yomGibithe ngenxa kaJosefa; isibusiso seNkosi saba phezu kwakho konke okwayo, endlini lasemasimini.

⁶ Yamphathisa uJosefa konke okwayo; yayingazi lutho lwayo kuphela ukudla eyayikudla. UJosefa wayemuhle ebukeka.

⁷ Kwathi emva kwesikhatshana inkosikazi yenkosi imbona yamkhanuka; yathi: Lala lami.

⁸ Kodwa wala, wathi enkosikazini: Khangela, inkosi yami kayikwazi engilakho endlini, ingiphathisile konke okwayo;

⁹ ngakhoke kakho omkhulu kulami endlini le; kayingigodlelanga lutho, kuphela wena ngoba ungumkayo; ngingenza kanjani isono esingaka, ngone kuNkulunkulu na?

¹⁰ Insuku ngensuku yayimcela uJosefa ukuba alale layo, ahlale layo, kodwa kayilalelanga.

¹¹ Kwathi ngosuku oluthile wangena endlini esiyakwenza umsebenzi wakhe, kungekho loyedwa owendlu phakathi,

¹² yambamba ngengubo yakhe yathi: Lala lami. Kodwa watshiya ingubo esandleni sayo, wabaleka, waphumela phandle.

¹³ Kwathi isibonile ukuthi utshiyile ingubo yakhe esandleni sayo, wabaleka,

¹⁴ yabiza abendlu yayo, yakhuluma labo isithi: Khangelani, silethelwe umHeberu ukuba adlale ngathi; wangena ukuba alale lami, ngahlaba umkhosi;

¹⁵ esezwile ngihlaba umkhosi, watshiya ingubo yakhe kimi, wabaleka, waphumela phandle.

¹⁶ Yasiyigcina leyongubo yakhe yaze yafika inkosi yakhe.

¹⁷ Yakhuluma layo ngalamazwi yathi: Inceku engumHeberu, osilethele yona, izile kimi ukuba idlale ngami;

¹⁸ kwathi ukuba ngihlabe umkhosi, yatshiya ingubo yayo kimi, yabalekela phandle.

¹⁹ Inkosi kaJosefa yathukuthela lapho isizwa amazwi omkayo esithi: Inceku yakho yenze njalo kimi.

²⁰ Inkosi yakhe yamthatha yamfaka entolongweni indawo lapho zazibotshelwa khona izibotshwa zenkosi; wahlala khona entolongweni.

²¹ Kodwa iNkosi yaba loJosefa, yaba lomusa kuye, yenza ukuba umlindintolongo amphathe kuhle.

²² Umlindintolongo wammisa uJosefa ukuba aphathe zonke izibotshwa ezazisentolongweni; lakho konke ezazikwenza lapho kwakusenziwa ngelizwi lakhe.

²³ Umlindintolongo kasakhangelanga lutho olwaluphethwe nguJosefa, ngoba iNkosi yayilaye; lalokho akwenzayo iNkosi yakuphumelelisa.