UGenesisi 33 - iBhayibhili Elingcwele 1978

Ukubuyisana kukaJakobe loEsawu

¹ UJakobe wasephakamisa amehlo akhe, wabona uEsawu esiza kanye lamadoda angamakhulu amane. Abantwana wabahlukanisela uLeya loRaheli lencekukazi ezimbili.

² Wabeka izincekukazi labantwana bazo ngaphambili, loLeya labantwana bakhe ngasemuva, loRaheli loJosefa ngasekucineni.

³ Yena uqobo wadlula phambi kwabo, wakhothamela emhlabathini kasikhombisa waze wafika eduze lomnewabo.

⁴ UEsawu wagijima ukumhlangabeza, wamgona, wamanga; bakhala bobabili.

⁵ UEsawu esephakamisile amehlo akhe wabona abesifazana labantwana, wathi: Ngobani laba olabo na? Wathi: Bangabantwana uNkulunkulu ayinike bona inceku yakho ngomusa wakhe.

⁶ Zasezisondela incekukazi labantwana bazo, zakhothama.

⁷ Laye uLeya labantwana bakhe basondela, bakhothama; basebesondela oJosefa loRaheli, bakhothama.

⁸ UEsawu wasesithi: Uqondeni ngamaqembu wonke lawaya engihlangene lawo na? Wathi: Ayisipho sokuba ngithole umusa enkosini yami.

⁹ UEsawu wathi: Ngilokunengi, mfowethu; okwakho kakube ngokwakho.

¹⁰ UJakobe wathi: Atshi bo! uba ngifumene umusa kuwe, yamukela isipho esivela kimi; ngoba ukubona ubuso bakho kunjengokubona ubuso bukaNkulunkulu, lokhu ungamukele ngomusa.

¹¹ Akwamukele isipho engisiletha kuwe; ngoba uNkulunkulu ungenzele umusa, sengilokunengi. Wamncenga, waze wasamukela.

¹² Wasesithi: Asisuke sihambe, ngizahamba phambi kwakho.

¹³ Kodwa uJakobe wathi kuye: Inkosi yami iyazi ukuthi abantwana basebancinyane, lokuthi izimvu lezinkomo engilazo zingamadlezane; uba ziqhutshwa usuku lonke, umhlambi wonke uzakufa.

¹⁴ Inkosi yami kayibe ihamba phambi kwenceku yayo; mina ngizahamba kancinyane ngokulingene ukuhamba kwezinkomo lokwabantwana, ngize ngifike enkosini yami eSeyiri.

¹⁵ UEsawu wathi: Akungivumele ukuba ngitshiye kuwe abanye abantu bami. Wathi: Kungani inkosi yami ilomusa ongaka kimi na?

¹⁶ UEsawu wasebuyela ngendlela yakhe ngalolosuku, waya eSeyiri.

¹⁷ UJakobe wasuka waya eSukothi, wazakhela khona umuzi, wakhela lenkomo zakhe izibaya; kungalokhu indawo leyo ibizwa ngokuthi yiSukothi.

¹⁸ UJakobe wafika kuhle emzini waseShekema, oselizweni laseKanani, evela ePadani‐Arama; wamisa amathente akhe eduze lomuzi.

¹⁹ Isiqinti amisela kuso amathente akhe wasithenga ebantwaneni bakaHamori uyise kaShekema, ngezinhlamvu zemali ezilikhulu.

²⁰ Wakha khona ialtare, walibiza ngokuthi yiEli, okuyikuthi uNkulunkulu kaIsrayeli.