UGenesisi 32 - iBhayibhili Elingcwele 1978

UJakobe uzilungiselela ukuhlangana loEsawu

¹ UJakobe wasehamba indlela yakhe, izithunywa zikaNkulunkulu zamhlangabeza.

² UJakobe ezibona wathi: Leli libandla likaNkulunkulu. Wabiza leyondawo ngokuthi yiMahanayimi.

³ UJakobe wathuma izigijimi phambi kwakhe kuEsawu umnewabo, elizweni laseSeyiri, ilizwe lakoEdoma.

⁴ Wazilaya wathi: Likhulume enkosini yami uEsawu lithi: Inceku yakho uJakobe ithi, bengihlala koLabani kuze kube khathesi;

⁵ ngilezinkabi labobabhemi lemihlambi, lezinceku lezincekukazi; ngithumele ukubika enkosini yami ukuba ngithole umusa kuwe.

⁶ Izigijimi zabuyela kuJakobe zathi: Sifikile kumnewenu uEsawu, laye uyeza ukukuhlangabeza kanye lamadoda angamakhulu amane.

⁷ UJakobe wasetshaywa luvalo olukhulu, wakhathazeka. Wahlukanisa abantu ababelaye lezimvu lezinkomo lamakamela, kwaba ngamaqembu amabili;

⁸ wathi: Uba uEsawu efika kwelinye iqembu alichithe, iqembu eliseleyo lizakuphepha.

⁹ UJakobe wathi futhi: Nkulunkulu kababa uAbrahama, Nkulunkulu kababa uIsaka, Nkosi wena owathi kimi: Buyela elizweni lakini lezihlotsheni zakho, ngizakukwenzela okuhle;

¹⁰ kangiwufanele umusa wakho wonke lokuthembeka kwakho encekwini yakho; ngoba ngawela leliJordani ngilodondolo lwami kuphela, khathesi sengingamaqembu amabili.

¹¹ Ngophula esandleni somnewethu, esandleni sikaEsawu; ngoba ngiyamesaba funa afike asibulale onina labantwana.

¹² Wena wathi: Impela ngizakwenzela okuhle, ngandise inzalo yakho ibe ngangetshebetshebe lolwandle elingelakubalwa ngenxa yobunengi.

¹³ Walala lapho ngalobobusuku; kulokho ayelakho wakhuphela uEsawu umfowabo isipho,

¹⁴ izibhuzikazi ezingamakhulu amabili lezimpongo ezingamatshumi amabili, lezimvukazi ezingamakhulu amabili lezinqama ezingamatshumi amabili,

¹⁵ amakamela enyisayo angamatshumi amathathu lamathole awo, lamankomokazi angamatshumi amane, lenkunzi ezilitshumi, labobabhemikazi abangamatshumi amabili lamathole alitshumi.

¹⁶ Wazinika inceku zakhe amaqembu ngamaqembu, wathi encekwini zakhe: Dlulelani phambili, litshiye ibanga phakathi kweqembu leqembu.

¹⁷ Wayilaya ephambili esithi: Nxa uEsawu umnewethu ehlangana lawe, ekubuza esithi: Ungokabani wena? Uya ngaphi? Ngezikabani lezi eziphambi kwakho?

¹⁸ ubokuthi: NgezikaJakobe inceku yakho, isipho esithunyelwa enkosini yami uEsawu; laye uqobo uyeza emva kwethu.

¹⁹ Walaya leyesibili leyesithathu labo bonke ababelandela amaqembu esithi: Lapho limfumana uEsawu, lizakutsho njalo kuye;

²⁰ lithi futhi: UJakobe inceku yakho uyeza emva kwethu. Ngoba wathi: Ngizamthoba ngesipho esingandulelayo andubana ngimbone; mhlawumbe uzangamukela.

²¹ Isipho sahamba kuqala; kodwa yena wahlala lobobusuku esihonqweni.

UJakobe ubindana loNkulunkulu

²² Ebusuku wavuka, wathatha omkakhe bobabili lencekukazi ezimbili labantwana bakhe abalitshumi lanye, wawela umfula iJaboki.

²³ Wabathatha, wabaweza lalokho ayelakho.

²⁴ UJakobe wasala yedwa; kwafika umuntu, wabindana laye kwaze kwasa.

²⁵ Kodwa esebonile ukuthi kamahluli uJakobe, watshaya inyonga lakhe, inyonga likaJakobe lenyela esabindana laye.

²⁶ Wasesithi: Ngiyekela, ngihambe ngoba sekusisa. Kodwa uJakobe wathi: Kangizukukuyekela ukuba uhambe ungangibusisanga.

²⁷ Wathi kuye: Ungubani ibizo lakho na? Wathi: NginguJakobe.

²⁸ Wathi: Ibizo lakho kalisayikuthiwa nguJakobe, kodwa nguIsrayeli, ngoba ulwile loNkulunkulu labantu, wanqoba.

²⁹ UJakobe wambuza wathi: Ngitshela ibizo lakho. Wathi: Ulibuzelani ibizo lami na? Wambusisa khona lapho.

³⁰ UJakobe wayibiza leyondawo ngokuthi yiPeniyeli, ngoba wathi: Ngibubonile ubuso bukaNkulunkulu, kodwa ngisaphila.

³¹ Ilanga laphuma esedlula iPeniyeli; wayeqhuliswa linyonga lakhe.

³² Ngakhoke abantu bakoIsrayeli kabawudli umsipha wenqulu osenyongeni kuze kube lamuhla, ngoba watshaya inyonga likaJakobe emsipheni wenqulu.