UGenesisi 30 - iBhayibhili Elingcwele 1978

¹ URaheli esebonile ukuthi wayengamzaleli abantwana uJakobe, waba lomona ngodadewabo, wathi kuJakobe: Nginika abantwana funa ngife.

² UJakobe wamthukuthela uRaheli, wathi: Ngisesikhundleni sikaNkulunkulu onqabele inzalo yesisu sakho na?

³ Wathi: Nansi incekukazi yami uBiliha, ithathe ukuze angizalele abantwana, babekwe emathangazini ami.

⁴ Wamnika incekukazi yakhe uBiliha abe ngumkakhe; uJakobe walala laye.

⁵ UBiliha wathatha isisu, wamzalela uJakobe indodana.

⁶ URaheli wasesithi: UNkulunkulu ungahlulele, njalo uzwile ilizwi lami, wanginika indodana. Ngakho wayitha ibizo wathi nguDani.

⁷ UBiliha incekukazi kaRaheli wabuya wathatha isisu, wamzalela uJakobe indodana yesibili.

⁸ URaheli wathi: Ngibindene kakhulu lodadewethu ngamehlula; ngakho wayitha ibizo wathi nguNafitali.

⁹ Kwathi uLeya esebonile ukuthi usemi ukuzala, wamthatha uZilipa incekukazi yakhe, wamnika uJakobe abe ngumkakhe.

¹⁰ UZilipa incekukazi kaLeya wamzalela uJakobe indodana.

¹¹ ULeya wasesithi: Nansi inhlanhla yami. Wayitha ibizo wathi nguGadi.

¹² UZilipa incekukazi kaLeya wamzalela uJakobe indodana yesibili.

¹³ ULeya wasesithi: Nansi intokozo yami, ngoba intombi zizakuthi ngilentokozo. Wayitha ibizo wathi nguAsheri.

¹⁴ Ngesikhathi sokuvuna uRubeni waya ensimini, wafumana khona izithelo zamandrake waziletha kunina uLeya. URaheli wasesithi kuLeya: Ngipha lami izithelo zamandrake endodana yakho.

¹⁵ Wathi kuye: Kuyinto encinyane yini ukuthi uthethe indoda yami na? Usuzathatha lezithelo zamandrake zendodana yami na? URaheli wathi: Ngakho uJakobe uzalala lawe ngalobobusuku kube ngumvuzo wezithelo zamandrake endodana yakho.

¹⁶ Kwathi kusihlwa uJakobe esebuya evela emmangweni, uLeya waphuma ukumhlangabeza, wathi: Ngena ngakimi, ngoba impela ngikuqatshile ngezithelo zamandrake endodana yami. Walala laye ngalobobusuku.

¹⁷ UNkulunkulu wamuzwa uLeya; wathatha isisu, wamzalela uJakobe indodana yesihlanu.

¹⁸ ULeya wasesithi: UNkulunkulu unginikile umvuzo wami, ngoba ngayinika indoda yami incekukazi yami; wayitha ibizo wathi nguIsakari.

¹⁹ ULeya waphinda wathatha isisu, wamzalela uJakobe indodana yesithupha.

²⁰ ULeya wathi: UNkulunkulu unginikile isipho esilungileyo; khathesi indoda yami izakuhlala lami, ngoba ngiyizalele amadodana ayisithupha; wayitha ibizo wathi nguZebuluni.

²¹ Emva kwalokhu wazala indodakazi, wayibiza ngokuthi nguDina.

²² UNkulunkulu wasemkhumbula uRaheli, wavula isizalo sakhe.

²³ Wathatha isisu, wazala indodana, wathi: UNkulunkulu ususile ihlazo kimi.

²⁴ Wayitha ibizo wathi nguJosefa, wathi: INkosi kayinginike lenye indodana.

Inotho kaJakobe

²⁵ Kwathi uRaheli esemzele uJosefa, uJakobe wathi kuLabani: Ngivumela ukuba ngibuyele endaweni yakithi laselizweni lakithi.

²⁶ Ngiphe omkami engibasebenzele kuwe labantwana bami ngihambe, ngoba uyazi umsebenzi wami engikwenzele wona.

²⁷ ULabani wathi kuye: Uba ngifumene umusa kuwe, ungahambi; ngoba sengibonile ngezibonakaliso ukuthi iNkosi ingibusisile ngenxa yakho.

²⁸ Wathi futhi: Biza umvuzo wakho, ngizakupha.

²⁹ Wathi kuye: Uyazi ukuthi ngikusebenzele kanjani lokuthi inkomo zakho bezinjani.

³⁰ Ngoba okwakho kwakuyingcosana ngingakafiki, kodwa kwandile, sekukunengi; iNkosi ikubusisile kukho konke engikwenzileyo; phoke, ngizakusebenzela nini eyami indlu na?

³¹ Wathi: Ngizakukuphani? UJakobe wathi: Kawuzukunginika lutho; kodwa ngizabuya ngeluse izimvu zakho ngizilinde uba ungenzela lokhu.

³² Ngizadabula phakathi kwawo wonke umhlambi wakho lamuhla, ngikhethe kuwo zonke izimvu ezilamabala lezimnyama, lezimbuzi ezilamabala, zibe ngumvuzo wami.

³³ Emva kwalokho uzakubona ubuqotho bami lapho ufika ukuhlola umvuzo wami; uba ufumana phakathi kwemihlambi yami imbuzi ezingelamabala lezimvu ezingemnyama, ungatshoke ukuba zebiwe.

³⁴ ULabani wasesithi: Kulungile, kakube njengokutsho kwakho.

³⁵ Mhlalokho wakhupha imbuzi ezingamaqamule lezilamabala lezibhuzikazi ezilamabala, zonke ezilokumhlophe, lezimvu zonke ezimnyama, wazinika amadodana akhe.

³⁶ Wawaqhuba kwaze kwaba ngummango wohambo lwensuku ezintathu phakathi kwawo laye. UJakobe welusa imihlambi eseleyo kaLabani.

³⁷ UJakobe wasethatha ingatsha ezimanzi zezihlahla zomkhaya omhlophe lealimondi lomangwe, wazebula kwaze kwabonakala okumhlophe kwazo.

³⁸ Wazifaka ingatsha abezebulile emikolweni yamanzi phambi kwemihlambi, lapho imihlambi inatha khona; yamitha ekufikeni kwayo ukuzanatha.

³⁹ Imihlambi yamitha phambi kwezingatsha, yazala ezilamabala lezifekethileyo.

⁴⁰ UJakobe wahlukanisa amazinyane; wabeka imihlambi ikhangelene lezingamaqamule lezimnyama zomhlambi kaLabani; wabeka amaqembu akhe abe wodwa, engawafaki emhlambini kaLabani.

⁴¹ Kwathi lapho eziqinileyo zomhlambi sezimitha, uJakobe wafaka izingatsha emkolweni phambi kwazo ukuba zimithele phakathi kwezingatsha.

⁴² Kodwa nxa umhlambi ububuthakathaka kazifakanga; ngalokhu imihlambi ebuthakathaka yaba ngekaLabani, leqinileyo yaba ngekaJakobe.

⁴³ UJakobe waba mkhulu kakhulu, waba lemihlambi emikhulu lezincekukazi lezinceku lamakamela labobabhemi.