UGenesisi 3 - iBhayibhili Elingcwele 1978

Ukuwa komuntu

¹ Inyoka yayilobuqili kulazo zonke inyamazana zeganga eyayizenzile iNkosi uNkulunkulu. Yathi kowesifazana: Impela uNkulunkulu watsho yini ukuthi: Lingadli okwezihlahla zasensimini na?

² Owesifazana wathi enyokeni: Singadla izithelo zezihlahla zasensimini;

³ kodwa ngezithelo zesihlahla esiphakathi kwensimu uNkulunkulu wathi: Lingazidli, lingazithinti ukuba lingafi.

⁴ Inyoka yathi kowesifazana: Kaliyikufa.

⁵ Ngoba uNkulunkulu uyazi ukuthi mhla lizidlayo, amehlo enu azavuleka, libe njengoNkulunkulu, likwazi konke.

⁶ Ngakhoke lapho owesifazana ebona ukuthi isihlahla silungele ukudliwa lokuthi siyabukeka emehlweni, lokuthi isihlahla sikhwabithisa ukuhlakanipha, wakha izithelo zaso, wazidla; wanika lendoda yakhe, layo yadla.

⁷ Kwasekuvuleka amehlo abo bobabili, babona ukuthi bahambaze; bathunga amahlamvu omkhiwa bazenzela izambatho.

⁸ Basebesizwa iNkosi uNkulunkulu ihamba ensimini kusihlwa ekupholeni kwelanga; ngakho indoda lomkayo bayicatshela iNkosi uNkulunkulu phakathi kwezihlahla zensimu.

⁹ INkosi uNkulunkulu yasimbiza umuntu, yathi kuye: Ungaphi wena?

¹⁰ Wathi: Kuthe lapho ngisizwa usiza ensimini ngesaba, ngoba ngihambaze; ngakho ngacatsha.

¹¹ Yasisithi: Ngubani okutshele ukuthi uhambaze na? Udlile okwesihlahla engakulaya ngaso ukuthi ungakudli na?

¹² Umuntu wathi: Owesifazana owangipha yena ukuba abe lami unginike okwesihlahla, ngadla.

¹³ INkosi uNkulunkulu yathi kowesifazana: Kuyini lokhu okwenzileyo na? Owesifazana wathi: Inyoka ingikhohlisile, ngadla.

¹⁴ INkosi uNkulunkulu yathi enyokeni: Njengokuba usukwenzile lokhu, uqalekisiwe phakathi kwezifuyo zonke lazo zonke inyamazana, zeganga. Uzakuhamba ngesisu sakho, udle uthuli insuku zakho zonke zokuphila kwakho.

¹⁵ Ngizavusa inzondano phakathi kwakho lowesifazana, laphakathi kwenzalo yakho lenzalo yakhe. Yona izachoboza ikhanda lakho, wena uzalimaza isithende sayo.

¹⁶ Yathi kowesifazana: Uzakuba lobuhlungu obukhulu ekukhululekeni kwakho; uzabeletha abantwana ngobuhlungu. Kodwa ukukhanuka kwakho kuzakuba sendodeni yakho, yona izakukubusa.

¹⁷ Yathi kuAdamu: Njengokuba ulalele ilizwi lomkakho, wadla okwesihlahla engakulaya ngaso ukuthi ungakudli, ngalokhu umhlabathi uqalekisiwe ngenxa yakho. Ngokukhathazeka uzazuza ukudla kuwo insuku zakho zonke zokuphila kwakho.

¹⁸ Uzakukuvezela ameva lokhula, wena udle imibhida yeganga.

¹⁹ Ngesithukuthuku sobuso bakho uzakuzuza ukudla, uze ubuyele emhlabathini owathathwa kuwo; ngoba ungumhlabathi, uzabuyela emhlabathini.

²⁰ Umuntu wamutha umkakhe ibizo lokuthi nguEva, ngoba waba ngunina wabo bonke abaphilayo.

²¹ INkosi uNkulunkulu yabenzela uAdamu lomkakhe amaxaba, wabambathisa.

²² INkosi uNkulunkulu yasisithi: Khangela, umuntu usenjengomunye wethu, usesazi konke. Uba eselula isandla sakhe athathe okwesihlahla sokuphila adle, uzakuphila kokuphela.

²³ Ngakho iNkosi uNkulunkulu wamkhupha ensimini yaseEdeni ukuba alime umhlabathi athathwa kuwo.

²⁴ Wamxotsha umuntu; wabeka ngasempumalanga kwensimu yaseEdeni amakherubi kanye lomhedla ovuthayo ophenduphendukayo, okulinde indlela eya esihlahleni sokuphila.