UGenesisi 29 - iBhayibhili Elingcwele 1978

Ukubonana kukaJakobe lezihlobo zakhe

¹ UJakobe wasehamba, wafika elizweni labantu basempumalanga.

² Wakhangela, wabona umthombo emmangweni lemihlambi emithathu yezimvu ilele khona, ngoba imihlambi yayinathiswa kulowomthombo; kwakukhona emlonyeni womthombo ilitshe elikhulu.

³ Yonke imihlambi yabuthelwa khona, sebelisusile ilitshe emlonyeni womthombo banathisa izimvu, basebebuyisela ilitshe emlonyeni womthombo endaweni yalo.

⁴ UJakobe wasesithi kibo: Bazalwane, lingaba ngaphi na? Bathi: Singabe eHarana.

⁵ Wathi kibo: Liyamazi uLabani indodana kaNahori na? Bathi: Siyamazi.

⁶ Wathi kibo: Uyaphila na? Bathi: Uyaphila; khangela, nangu uRaheli indodakazi yakhe, uyeza lezimvu.

⁷ Wasesithi: Khangelani, kusesemini, kasiso isikhathi sokubuthanisa izinkomo; nathisani izimvu, lizise emadlelweni.

⁸ Bathi: Singekwenze lokhu ingakabuthani imihlambi yonke, lelitshe lisuswe emlonyeni womthombo; khona sizakunathisa izimvu.

⁹ Esakhuluma labo, uRaheli wafika lezimvu zikayise, ngoba wayezalusa.

¹⁰ Kwathi uJakobe ebona uRaheli indodakazi kaLabani umalumakhe lezimvu zikaLabani, wasondela, wasusa ilitshe emlonyeni womthombo, wawunathisa umhlambi kaLabani umalumakhe.

¹¹ UJakobe wamanga uRaheli, wakhala ngokuthokoza.

¹² UJakobe wasemtshela uRaheli ukuthi uyisihlobo sikayise lokuthi uyindodana kaRebeka. Yena wagijima, watshela uyise.

¹³ Kwathi uLabani esezwile indaba kaJakobe indodana kadadewabo, wagijima ukuyamhlangabeza, wamgona, wamanga, wamngenisa endlini yakhe. UJakobe wasemtshela uLabani konke.

¹⁴ ULabani wathi kuye: Impela ungowegazi lami. Wahlala laye inyanga yonke.

UJakobe uthatha uLeya loRaheli

¹⁵ ULabani wasesithi kuJakobe: Njengoba uyisihlobo sami, uzangisebenzela kodwa na? Ngitshela ukuthi umvuzo wakho uzakuba yini?

¹⁶ ULabani wayelamadodakazi amabili, ibizo lenkulu linguLeya lebizo lencinyane linguRaheli.

¹⁷ Amehlo kaLeya ayebuthakathaka, kodwa uRaheli wayeloluthi oluhle ebukeka.

¹⁸ UJakobe wamthanda uRaheli. Wathi: Ngizakukusebenzela iminyaka eyisikhombisa ngoRaheli indodakazi yakho encane.

¹⁹ ULabani wathi: Kungcono ukuba ngimnike wena kulokuba ngimnike enye indoda; hlala lami.

²⁰ UJakobe wasemsebenzela iminyaka eyisikhombisa uRaheli; kuye yaba kungathi zinsuku ezilutshwana nje ngenxa yokumthanda kwakhe.

²¹ UJakobe wasesithi kuLabani: Ngipha umkami ngingene kuye ngoba seziphelile insuku zami.

²² ULabani wabuthanisa wonke amadoda aleyondawo, wenza idili.

²³ Kwathi kusihlwa wasethatha uLeya indodakazi yakhe wamusa kuJakobe owangena laye engutsheni.

²⁴ ULabani wanika indodakazi yakhe uLeya incekukazi yakhe uZilipa ukuba abe yincekukazi yakhe.

²⁵ Kwathi ekuseni uJakobe wabona ukuthi ubenikwe uLeya; ngakho wathi kuLabani: Wenzeni kimi na? Kangimsebenzelanga uRaheli kuwe na? Pho, ungikhohliseleni na?

²⁶ ULabani wathi: Endaweni yakithi kakwendiswa omncinyane ngaphambi komdala.

²⁷ Qeda ukuthatha lowo andubana sikunike lomunye ngomsebenzi osezakungenzela wona eminye iminyaka eyisikhombisa.

²⁸ UJakobe wenza njalo; eseqedile ukumthatha, uLabani wamnika uRaheli indodakazi yakhe waba ngumkakhe.

²⁹ ULabani wamnika uRaheli indodakazi yakhe uBiliha incekukazi yakhe, abe yincekukazi yakhe.

³⁰ UJakobe waselala loRaheli; wamthanda uRaheli kakhulu kuloLeya, wasemsebenzela uLabani eminye iminyaka eyisikhombisa.

Abantwana abazalelwa uJakobe

³¹ INkosi yasibona ukuthi uLeya wayezondwa, yavula isizalo sakhe, kodwa uRaheli wayeyinyumba.

³² ULeya wathatha isisu, wazala indodana, wayitha ibizo wathi nguRubeni, ngoba wathi: INkosi ibonile inhlupheko yami; khathesi indoda yami izakungithanda.

³³ Wabuya wathatha isisu, wazala indodana, wathi: Njengoba iNkosi izwile ukuthi ngiyazondwa, inginike lalindodana; wayitha ibizo wathi nguSimeyoni.

³⁴ Wabuya wakhulelwa, wazala indodana; wathi: Ngalesisikhathi indoda yami izanamathela kimi, ngoba ngiyizalele amadodana amathathu; ngalokhu yabizwa ngokuthi nguLevi.

³⁵ Waphinda wakhulelwa, wazala indodana; wathi: Ngalesisikhathi sengizakuyidumisa iNkosi; ngakho wayitha ibizo wathi nguJuda; wasesima ukuzala.