UGenesisi 27 - iBhayibhili Elingcwele 1978

UJakobe uzizuzela isibusiso kuIsaka

¹ Kwathi uIsaka esemdala lamehlo akhe esefiphele engasaboni, wambiza uEsawu indodana yakhe enkulu, wathi: Mntanami! Wathi kuye: Ngilapha.

² UIsaka wathi: Khangela, sengimdala, angilwazi usuku lokufa kwami.

³ Ngakhoke thatha izikhali zakho, imitshoko yakho ledandili lakho, uye egangeni ungizingelele inyamazana,

⁴ ungilungisele inyama emnandi engiyithandayo, uyilethe kimi ukuba ngidle, ngikubusise ngingakafi.

⁵ URebeka wezwa uIsaka ekhuluma loEsawu indodana yakhe. UEsawu waya egangeni ukuyazingela inyamazana ukuze abuye layo.

⁶ URebeka wasekhuluma loJakobe indodana yakhe, wathi: Khangela, ngizwile uyihlo ekhuluma loEsawu umnewenu,

⁷ esithi: Ngilethela inyama yenyamazana, ungiphekele inyama emnandi ukuba ngidle, ngikubusise phambi kweNkosi ngingakafi.

⁸ Ngakhoke, mntanami, ngilalela kulokhu engikulaya khona.

⁹ Yana khathesi emhlambini, ungithathele kuwo amazinyane amabili amahle ezimbuzi, ngilungisele uyihlo inyama emnandi njengalokho akuthandayo;

¹⁰ wena uzakuyisa kuyihlo ukuba adle, akubusise engakafi.

¹¹ UJakobe wathi kuRebeka unina: Khangela, uEsawu umnewethu ungumuntu olihwanqa, mina ngibutshelezi.

¹² Mhlawumbe ubaba uzakungiphulula, ngibe ngokhohlisayo kuye, ngizilethele ukuqalekiswa endaweni yokubusiswa.

¹³ Unina wathi kuye: Ukuqalekiswa kwakho kakube phezu kwami, mntanami; ngilalela, uhambe ungilandele wona.

¹⁴ Wasehamba, wawathatha, wawaletha kunina; unina walungisa inyama emnandi njengalokho akuthandayo uyise.

¹⁵ URebeka wathatha ingubo ezinhle zikaEsawu indodana yakhe enkulu, ayelazo endlini, wazambathisa uJakobe indodana yakhe encinyane;

¹⁶ wamambathisa izikhumba zamazinyane ezandleni zakhe lasebutshelezini bentamo.

¹⁷ Wanika indodana yakhe uJakobe inyama emnandi lesinkwa ayekulungisile.

¹⁸ Yena weza kuyise wathi: Baba! Wathi: Ngilapha; ungubani wena mntanami?

¹⁹ UJakobe wathi kuyise: NginguEsawu izibulo lakho; sengenzile njengokungitshela kwakho; vuka uhlale, udle inyama le andubana ungibusise.

²⁰ UIsaka wathi kuyo indodana yakhe: Kwenzeke kanjani ukuba uyizuze masinyane kangaka, mntanami na? UJakobe wathi: Ngoba iNkosi uNkulunkulu wakho ungiphumelelisile.

²¹ UIsaka wathi kuJakobe: Sondela ukuba ngikuphulule, mntanami, ngazi impela ukuthi uyiyo indodana yami uEsawu, loba kawusuye.

²² UJakobe wasondela kuIsaka uyise; wamphulula wathi: Ilizwi liyilizwi likaJakobe, kodwa izandla ziyizandla zikaEsawu.

²³ Kamazanga ngoba izandla zakhe zaziloboya njengezandla zomnewabo uEsawu; ngakho wambusisa.

²⁴ Wasesithi: Uyindodana yami uEsawu uqobo na? Wathi: Nginguye.

²⁵ Wathi: Sondeza kimi ngidle inyama yendodana yami, ngikubusise. UJakobe wayisondeza kuye, wadla; waletha kuye iwayini, walinatha.

²⁶ Uyise uIsaka wasesithi kuye: Sondela, mntanami, ungange.

²⁷ Wasondela, wamanga; wanuka iphunga lengubo zakhe, wambusisa wathi: Khangela, iphunga lendodana yami linjengephunga lensimu iNkosi eyibusisileyo.

²⁸ UNkulunkulu akunike amazolo ezulu lokuvunda komhlaba, lenala yamabele lewayini.

²⁹ Abantu kabakukhonze, lezizwe zikukhothamele. Ube yinkosi yabafowenu, amadodana kanyoko akukhothamele. Kathukwe okuthukayo, abusiswe okubusisayo!

³⁰ Kwathi uIsaka eseqedile ukumbusisa uJakobe, uJakobe esand’ukusuka kuIsaka uyise, kwafika uEsawu umnewabo evela ekuzingeleni kwakhe.

³¹ Laye walungisa inyama emnandi, wayisa kuyise; wathi kuyise: Ubaba kavuke, adle inyama yendodana yakhe, ukuba angibusise.

³² UIsaka uyise wathi kuye: Ungubani wena? Wathi: Ngingumntanakho, izibulo lakho uEsawu.

³³ UIsaka esethuthumela kakhulu, wathi: Pho, ngubani othathe inyama wayiletha kimi, ngayidla yonke ungakafiki, ngambusisa na? Yena uzakuba ngobusisekileyo.

³⁴ Kwathi uEsawu esezwile amazwi kayise, wakhala ngosizi olukhulu impela, wathi kuyise: Ngibusisa lami njalo, baba!

³⁵ Wasesithi: Umfowenu ufike ngenkohliso, wathatha isibusiso sakho.

³⁶ UEsawu wathi: Kathiwanga kuhle ibizo lokuthi nguJakobe na? Ngoba sekukabili engidla; wathatha ubuzibulo bami, lakhathesi usethethe isibusiso sami. Wathi futhi: Kawungigcinelanga mina isibusiso na?

³⁷ UIsaka wamphendula uEsawu wathi: Khangela, sengimenzile inkosi yakho, ngamnika bonke abafowabo babe zinceku zakhe; ngimnikile amabele lewayini; pho, ngingabe ngisakwenzelani wena, mntanami na?

³⁸ UEsawu wathi kuyise: Baba, sinye kuphela isibusiso sakho na? Ngibusisa lami njalo, baba. UEsawu wadazuluka wakhala.

³⁹ UIsaka wasemphendula wathi: Khangela, umuzi wakho uzakuba khatshana lokuvunda komhlaba lamazolo ezulu avela phezulu.

⁴⁰ Uzakuphila ngomkhonto wakho, umkhonze umfowenu. Kuzakuthi lapho usudlubulunda, waphule ijogwe lakhe entanyeni yakho.

⁴¹ UEsawu wasemzonda uJakobe ngenxa yokubusiswa kwakhe nguyise. UEsawu wathi enhliziyweni yakhe: Sezisondele insuku zokulilela ubaba, khona ngizambulala umnawami uJakobe.

⁴² URebeka watshelwa amazwi kaEsawu indodana yakhe enkulu; wasebiza uJakobe indodana yakhe encinyane, wathi kuye: Khangela, umnewenu uEsawu uyaziqinisa ngokuthi uzakukubulala.

⁴³ Ngakhoke, mntanami, ngilalela; suka ubalekele eHarani kuLabani umfowethu,

⁴⁴ uhlale laye insuku ezilutshwana, luze luphele ulaka lomnewenu,

⁴⁵ akhohlwe lokho okwenze kuye, kudede ukukuthukuthelela kwakhe; besengithumela ngikulande; ngizalahlekelwa yini lobabili ngosuku lunye na?

UIsaka uthumela uJakobe eHarani

⁴⁶ URebeka wasesithi kuIsaka: Sengidiniwe yikuphila ngenxa yamadodakazi kaHethi; uba uJakobe ethatha umfazi kuwo amadodakazi kaHethi anjengala amadodakazi alelilizwe, kungisiza kanjani ukuphila kwami na?