UGenesisi 26 - iBhayibhili Elingcwele 1978

UIsaka useGerari laseBerisheba

¹ Kwaba khona indlala elizweni, enjengendlala yakuqala ensukwini zikaAbrahama. UIsaka waya eGerari kuAbimeleki inkosi yamaFilistiya.

² INkosi yasibonakala kuye, yathi: Ungehleli eGibithe, kodwa uhlale elizweni engizakukutshela lona;

³ hlala kulelilizwe, ngizakuba lawe ngikubusise; ngoba ngizakunika wena lenzalo yakho wonke lamazwe, ngiqinise isifungo engasifunga kuAbrahama uyihlo.

⁴ Ngizakwandisa inzalo yakho ibe ngangezinkanyezi zezulu, ngiyinike inzalo yakho lamazwe wonke; ngenzalo yakho zizabusiswa izizwe zonke zomhlaba;

⁵ ngoba uAbrahama walalela ilizwi lami, wagcina amazwi ami lemilayo yami lezimiso zami lemithetho yami.

⁶ UIsaka wahlalake eGerari.

⁷ Amadoda aleyondawo ambuza ngomkakhe. Wathi: Ungudadewethu; ngoba wesaba ukuthi: Ungumkami. Wathi: Mhlawumbe amadoda aleyondawo azangibulala ngenxa kaRebeka, ngoba emuhle kakhulu.

⁸ Kwathi esehlale khona isikhathi eside, uAbimeleki inkosi yamaFilistiya walunguza ngewindi, wabona uIsaka edlala loRebeka umkakhe.

⁹ UAbimeleki wambiza uIsaka, wathi: Khangela, impela yena ungumkakho; utsholoni ukuthi: Ungudadewethu? UIsaka wathi kuye: Bengisesaba ukuthi mhlawumbe ngizakufa ngenxa yakhe.

¹⁰ UAbimeleki wathi: Wenzeni kithi na? Bekulula ukuba omunye ebantwini alale lomkakho; ubususibeka icala.

¹¹ UAbimeleki walaya bonke abantu, wathi: Othinta lumuntu lomkakhe uzabulawa impela.

¹² UIsaka walima kulelolizwe, wazuza ngalowomnyaka okuphindwe kalikhulu; iNkosi yambusisa.

¹³ Lowomuntu waba mkhulu, lokwakhe kwanda kakhulu waze waba mkhulu sibili.

¹⁴ Waba lemfuyo yezimvu lemfuyo yezinkomo lenceku ezinengi; ngakhoke amaFilistiya aba lomona ngaye.

¹⁵ Yonke imithombo ezaziyimbile inceku zikayise ensukwini zikaAbrahama uyise, amaFilistiya ayeyigqibele, ayigcwalisa ngomhlabathi.

¹⁶ UAbimeleki wasesithi kuIsaka: Suka kithi, ngoba ulamandla kakhulu kulathi.

¹⁷ UIsaka wasesuka lapho, wakha amathente akhe esigodini saseGerari, wahlala khona.

¹⁸ UIsaka wabuya waphanda imithombo yamanzi ababeyimbile ensukwini zikaAbrahama uyise; ngoba amaFilistiya ayeyigqibele emva kokufa kukaAbrahama. Wayibiza ngamabizo ayibiza ngawo uyise.

¹⁹ Inceku zikaIsaka zemba esigodini, zafumana khona umthombo wamanzi agobhozayo.

²⁰ Abelusi baseGerari bababangisa abelusi bakaIsaka, bathi: Amanzi ngawethu. Ngakho wabiza ibizo lomthombo wathi yiEseki, ngoba baphikisana laye khona.

²¹ Zemba omunye umthombo, lawo bawubanga. Wawubiza ngokuthi yiSitina.

²² Wasuka lapho, wemba omunye umthombo, kodwa lowo kabawubanganga. Wawubiza ngokuthi yiRehobothi, wathi: INkosi isisenzele indawo, sizakwanda elizweni.

²³ Wasuka lapho waya eBerisheba.

²⁴ INkosi yabonakala kuye ngalobobusuku yathi: NginguNkulunkulu kaAbrahama uyihlo. Ungesabi ngoba ngilawe, ngizakukubusisa ngiyandise inzalo yakho ngenxa yenceku yami uAbrahama.

²⁵ Wakha khona ialtare, wakhuleka ebizweni leNkosi, wamisa khona ithente lakhe; inceku zikaIsaka zemba khona umthombo.

Isivumelwano sikaIsaka loAbimeleki

²⁶ UAbimeleki wasesiya kuye evela eGerari kanye loAhuzathi umngane wakhe loFikoli induna yempi yakhe.

²⁷ UIsaka wathi kubo: Lizeleni kimi, lokhu liyangizonda, lingixotshile kini?

²⁸ Bathi: Sesibonile ngokusobala ukuthi iNkosi ilawe. Sathi: Kakube khona phakathi kwethu lawe isifungo, senze isivumelwano lawe

²⁹ sokuthi kawuyikwenza okubi kithi, njengokuba singakuthintanga, sikwenzele okuhle kuphela, sakuyekela wahamba ngokuthula; usubusisiwe yiNkosi.

³⁰ Wasebenzela idili, badla banatha.

³¹ Bavuka ekuseni, bafungisana omunye lomunye; uIsaka wabavalelisa, basuka kuye ngokuthula.

³² Kwathi ngalolosuku inceku zikaIsaka zafika, zamtshela ngomthombo ebeziwumba, zathi kuye: Sesifumene amanzi.

³³ Wawubiza ngokuthi yiSheba; ngakho ibizo lomuzi liyiBerisheba lalamuhla.

³⁴ UEsawu eseleminyaka engamatshumi amane wathatha uJudithi indodakazi kaBeri umHethi, loBasemathi indodakazi kaEloni umHethi.

³⁵ UIsaka loRebeka baba losizi enhliziyweni ngenxa yabo.