UGenesisi 24 - iBhayibhili Elingcwele 1978

UIsaka uganwa nguRebeka

¹ UAbrahama wayeseluphele eseleminyaka eminengi; iNkosi yayimbusisile kukho konke.

² UAbrahama wathi encekwini yakhe enkulu yendlu yakhe, ephatha konke alakho: Beka isandla sakho ngaphansi kwethangazi lami.

³ Ngizakukufungisa iNkosi, uNkulunkulu wezulu loNkulunkulu womhlaba, ukuthi kawuyikuyithathela indodana yami umfazi emadodakazini amaKanani engihlala phakathi kwawo;

⁴ kodwa uzakuya elizweni lakithi lasezihlotsheni zami, uyithathele khona umfazi indodana yami uIsaka.

⁵ Inceku yathi kuye: Uba owesifazana engavumi ukuza lami kulelilizwe, ngiyise indodana yakho elizweni owavela kulo na?

⁶ UAbrahama wathi kuye: Qaphela ukuba ungayibuyiseli khona indodana yami.

⁷ INkosi, uNkulunkulu wezulu, eyangikhupha endlini kababa laselizweni lokuzalwa kwami, yafunga kimi yathi: Ngizalinika inzalo yakho lelilizwe; izathuma isithunywa sayo phambi kwakho, ukuze uyithathele khona umfazi indodana yami.

⁸ Uba owesifazana engavumi ukubuya lawe, uzakuba ukhululekile kulesisifungo sami; kodwa ungayibuyiseli indodana yami.

⁹ Inceku yasibeka isandla sayo ngaphansi kwethangazi likaAbrahama inkosi yayo, yafunga kuye ngalindaba.

¹⁰ Inceku yasithatha amakamela alitshumi kuwo amakamela enkosi yayo, kanye lenhlobo zonke ezinhle zempahla yenkosi yayo, yasisuka isiya eMesopotamiya emzini kaNahori.

¹¹ Yaguqisa amakamela ngaphandle komuzi ngasemthonjeni wamanzi ntambama, ngesikhathi abaphuma ngaso abesifazana ukukha amanzi.

¹² Yathi: Nkosi, Nkulunkulu wenkosi yami uAbrahama, ungiphumelelise lamuhla, uyenzele inkosi yami uAbrahama umusa.

¹³ Kangela, sengimi ngasemthonjeni wamanzi, kuza amadodakazi amadoda omuzi ukukha amanzi.

¹⁴ Kakuthi intombi engizakuthi kuyo: Beka phansi imbiza yakho unginathise, iphendule ithi: Natha, ngizakunathisa lamakamela akho; kayibe yiyo oyikhethele uIsaka inceku yakho; ngalokho ngizakwazi ukuthi uyenzele inkosi yami umusa.

¹⁵ Kwathi ingakaqedi ukukhuluma, kwehla uRebeka owayezalwa nguBethuweli indodana kaMilka, umkaNahori umfowabo kaAbrahama, ebeke imbiza yakhe ehlombe.

¹⁶ Intombi yayinhle kakhulu, iyintombi engayaziyo indoda; yehlela ngasemthonjeni, yagcwalisa imbiza yayo, yakhuphuka.

¹⁷ Inceku yasigijima ukuyihlangabeza yathi: Nginathisa amanzi embizeni yakho.

¹⁸ Yathi: Natha, nkosi. Yaphangisa yehlisela imbiza yayo esandleni, yayinathisa.

¹⁹ Isiqedile ukuyinathisa yathi: Ngizakukhelela lamakamela akho aze akholwe wonke.

²⁰ Yaphangisa yathululela amanzi ayo emkolweni, yabuya yagijimela emthonjeni ukuyakukha, yakhelela amakamela wonke.

²¹ Indoda yasithula iyikhangelisisa ukuba ibone ukuthi iNkosi ibiphumelelisile indlela yayo yini.

²² Kwathi amakamela eseqedile ukunatha, indoda yasithatha icici legolide, ubunzima balo buyingxenye yeshekeli, lamasongo amabili egolide ezandleni zayo, ubunzima bawo bungamashekeli alitshumi.

²³ Yathi: Uyindodakazi kabani na? Ngitshela. Kukhona indawo endlini kayihlo ukuba singenise khona na?

²⁴ Yathi kuyo: Ngiyindodakazi kaBethuweli indodana kaMilka owazalwa nguNahori.

²⁵ Yathi kuyo futhi: Silotshani lokudla kwamakamela okunengi, kanye lendawo yokulala.

²⁶ Indoda yasikhothamisa ikhanda layo, yadumisa iNkosi,

²⁷ yathi: Kayibongwe iNkosi, uNkulunkulu wenkosi yami uAbrahama, engayekelanga ukuyenzela inkosi yami umusa lobuqotho; lami iNkosi ingiholile endleleni ngaze ngafika endlini yesihlobo senkosi yami.

²⁸ Intombi yagijima, yatshela abendlu kanina lezizinto.

²⁹ URebeka wayelomnewabo obizo lakhe lalinguLabani; uLabani waphuma wagijimela kuleyondoda ngasemthonjeni.

³⁰ Kwathi esebonile icici lamasongo ezandleni zikadadewabo, esezwile amazwi kaRebeka udadewabo okuthi: Itsho njalo indoda kimi; waya kuleyondoda eyayimi kuwo amakamela ngasemthonjeni.

³¹ Wathi: Ngena wena obusisiweyo yiNkosi; umeleni ngaphandle na? Ngoba sengilungisile indlu lendawo yamakamela.

³² Leyondoda yasingena endlini, yakhulula amakamela. Amakamela anikwa utshani lokudla, kwalethwa amanzi okugeza inyawo zayo lenyawo zamadoda ayelayo.

³³ Kwabekwa ukudla phambi kwayo ukuba idle; kodwa yathi: Kangiyikudla ngingakakhulumi indaba yami. Wathi: Khuluma.

³⁴ Yathi: Ngiyinceku kaAbrahama.

³⁵ INkosi iyibusisile kakhulu inkosi yami, yaze yaba nkulu. Yayinika izimvu lezinkomo, isiliva legolide, izinceku lezincekukazi, amakamela labobabhemi.

³⁶ USara umkankosi yami wayizalela inkosi yami indodana esemdala; yayinika konke elakho.

³⁷ Inkosi yami yangifungisa yathi: Ungayithatheli indodana yami umfazi kuwo amadodakazi amaKanani, engihlala elizweni lawo;

³⁸ kodwa uye endlini kababa lasezihlotsheni zami, uyithathele khona indodana yami umfazi.

³⁹ Ngathi enkosini yami: Mhlawumbe owesifazana kayikungilandela.

⁴⁰ Yathi kimi: INkosi, engihamba phambi kwayo, izathuma isithunywa sayo lawe, iphumelelise indlela yakho; uzakuyithathela indodana yami umfazi ezihlotsheni zikababa.

⁴¹ Emva kwalokho uzakhululeka esifungweni sami uba ufika ezihlotsheni zami zingakuniki yena.

⁴² Kuthe ngifika emthonjeni lamhla, ngathi: Nkosi, Nkulunkulu wenkosi yami uAbrahama, akuphumelelise indlela yami.

⁴³ Khangela, sengimi ngasemthonjeni wamanzi; kakuthi intombi eza ukukha engizakutsho kuyo: Nginathisa amanzi embizeni yakho;

⁴⁴ iphendule ithi kimi: Natha wena, ngizakhelela lamakamela akho; kayibe nguye owesifazana iNkosi emkhethele indodana yenkosi yami.

⁴⁵ Ngingakaqedi ukukhuluma ngenhliziyo yami, kufike uRebeka ethwele imbiza yakhe ehlombe; wehlela emthonjeni, wakha. Ngasengisithi kuye: Akunginathise.

⁴⁶ Waphangisa, wethula imbiza yakhe ehlombe wathi: Natha, ngizanathisa lamakamela akho.

⁴⁷ Ngambuza ngathi: Uyindodakazi kabani? Wathi; Ngiyindodakazi kaBethuweli, indodana kaNahori ozalwa nguMilka; ngasengifaka icici emakhaleni akhe lamasongo ezandleni zakhe.

⁴⁸ Ngakhothamisa ikhanda lami, ngayidumisa iNkosi, ngabonga iNkosi uNkulunkulu wenkosi yami uAbrahama, ebingihole endleleni elungileyo ukuba ngiyithathele indodana yenkosi yami indodakazi yomfowabo.

⁴⁹ Khathesi uba lithanda ukuyenzela inkosi yami umusa lobuqotho, ngitshelani; uba lingathandi, ngitshelani, ukuze ngiphendukele ngakwesokunene loba ngakwesokhohlo.

⁵⁰ Basebephendula oLabani loBethuweli bathi: Lokhu kuvela eNkosini; kasilakutsho lutho kuwe.

⁵¹ Khangela, uRebeka uphambi kwakho; mthathe uhambe, abe ngumkandodana yenkosi yakho njengokutsho kweNkosi.

⁵² Kwathi isizwile amazwi abo inceku kaAbrahama yakhothamela emhlabathini phambi kweNkosi.

⁵³ Inceku yakhupha izinto zesiliva, lezinto zegolide, lezambatho, yakunika uRebeka, yabanika lomnewabo lonina impahla eligugu.

⁵⁴ Basebesidla benatha, yona lamadoda ayelayo, balala khona. Sebevukile ekuseni, yathi: Ngivumelani ngibuyele enkosini yami.

⁵⁵ Kodwa umnewabo lonina wentombi bathi: Ake ihlale lathi intombazana okwensukwana, mhlawumbe ezilitshumi, andubana ihambe.

⁵⁶ Yathi kubo: Lingangibambeleli, lokhu iNkosi iphumelelisile indlela yami; ngivumelani ukuba ngiye enkosini yami.

⁵⁷ Bathi: Asimbize umntwana, sizwe kuye.

⁵⁸ Basebembiza uRebeka, bathi kuye: Uzahamba lalindoda na? Wathi: Ngizahamba.

⁵⁹ Basebemvumela ukuhamba uRebeka udadewabo lomlizane wakhe, lenceku kaAbrahama lamadoda ayo.

⁶⁰ Bambusisa uRebeka, bathi kuye: Dadewethu, ube ngunina wezinkulungwane zezigidi, inzalo yakho inqobe imizi yezitha zayo!

⁶¹ URebeka wasesuka lamantombazana akhe, bagada amakamela, balandela indoda; inceku yamthatha uRebeka, yahamba.

⁶² UIsaka wayesedabule inkangala waze wafika emthonjeni waseLahayi‐Royi, ngoba wayehlala elizweni laseNegebi.

⁶³ UIsaka waphuma ntambama ukuba ahambahambe emmangweni; waphakamisa amehlo akhe wabona amakamela esiza.

⁶⁴ LoRebeka waphakamisa amehlo akhe; esembonile uIsaka wehla ekameleni.

⁶⁵ Wathi encekwini: Ngubani lindoda ehamba emmangweni ukusihlangabeza na? Inceku yathi: Yinkosi yami. Wasethatha isimbombozo sakhe, wazigubuzela.

⁶⁶ Inceku yasimtshela uIsaka konke ebikwenzile.

⁶⁷ UIsaka wamngenisa ethenteni lakhe, wamthatha uRebeka, waba ngumkakhe. UIsaka wamthanda, waseduduzeka emva kokufa kukanina.