UGenesisi 22 - iBhayibhili Elingcwele 1978

UAbrahama ulaywa ukunikela ngoIsaka

¹ Kwathi emva kwalokhu uNkulunkulu wamlinga uAbrahama, wathi kuye: Abrahama! Wathi: Ngilapha.

² UNkulunkulu wathi: Thatha khathesi indodana yakho eyodwa oyithandayo, uIsaka, uye elizweni laseMoriya; unikele khona ngayo ibe ngumnikelo wokutshiswa kwenye intaba engizakukutshela yona.

³ UAbrahama wavuka ekuseni, wabophela ubabhemi wakhe, wathatha ababili encekwini zakhe loIsaka indodana yakhe. Esebandile inkuni zomnikelo wokutshiswa, wasuka waya endaweni ayemtshele yona uNkulunkulu.

⁴ Ngosuku lwesithathu uAbrahama waphakamisa amehlo akhe wayibona indawo isekhatshana.

⁵ UAbrahama wasesithi encekwini zakhe: Salani lapha lobabhemi, mina lomfana sisaya laphayana ukukhuleka; sizabuya kini futhi.

⁶ UAbrahama wathatha inkuni zomnikelo wokutshiswa, wazethwesa uIsaka indodana yakhe; waphatha esandleni sakhe umlilo lengqamu; basuka bahamba bobabili.

⁷ UIsaka wasekhuluma loAbrahama uyise wathi: Baba! Wathi: Ngilapha, mntanami. UIsaka wathi: Khangela, nanku umlilo, nanzi inkuni; kodwa lingaphi iwundlu lomnikelo wokutshiswa?

⁸ UAbrahama wathi: UNkulunkulu uzakuzibonela yena iwundlu lomnikelo wokutshiswa, mntanami. Bahambake bobabili.

⁹ Bafika endaweni uNkulunkulu ayemtshele yona; uAbrahama wakha khona ialtare; wabeka inkuni phezu kwalo; esembophile uIsaka indodana yakhe, wambeka phezu kwenkuni ealtareni.

¹⁰ UAbrahama waseselula isandla sakhe, wathatha ingqamu ukuba ayibulale indodana yakhe.

¹¹ Kwasekumemeza kuye isithunywa seNkosi sisezulwini sathi: Abrahama, Abrahama! Wathi: Ngilapha.

¹² Sathi: Musa ukubeka isandla sakho emfaneni, ungenzi lutho kuye, ngoba sengisazi ukuthi uyamesaba uNkulunkulu, lokhu ungalanga lendodana yakho eyodwa.

¹³ UAbrahama wasekhangela, wabona ngemva kwakhe inqama ibanjiwe esixukwini ngezimpondo zayo. UAbrahama waya khona wayithatha inqama, wanikela ngayo ukuba ibe ngumnikelo wokutshiswa esikhundleni sendodana yakhe.

¹⁴ UAbrahama waqamba ibizo laleyondawo wathi iNkosi izakunanzelela, njengoba kutshiwo kuze kube lalamuhla ukuthi: Entabeni yeNkosi izananzelela.

¹⁵ Isithunywa seNkosi samemeza uAbrahama ngokwesibili sisezulwini,

¹⁶ sathi: Ngizifungile, itsho iNkosi, ukuthi njengoba ukwenzile lokhu ungalanga lendodana yakho eyodwa,

¹⁷ ngizakukubusisa impela, ngiyandise inzalo yakho ibe ngangezinkanyezi zasezulwini langangetshebetshebe lasokhunjini lolwandle; inzalo yakho izanqoba imizi yezitha zayo,

¹⁸ langenzalo yakho zonke izizwe zomhlaba zizabusiswa, ngoba ulalele ilizwi lami.

¹⁹ UAbrahama wasebuyela encekwini zakhe; basuka, baya eBerisheba; uAbrahama wakha eBerisheba.

Inzalo kaNahori

²⁰ Kwathi emva kwalokho kwabikwa kuAbrahama ukuthi: UMilka umzalele uNahori umfowenu abantwana,

²¹ nguUzi izibulo lakhe, loBuzi umfowabo, loKemuweli uyise kaAramu,

²² loKesedi, loHazo, loPilidashi, loJidilafi, loBethuweli;

²³ uBethuweli wazala uRebeka; laba abaficaminwembili uMilka wabazalela uNahori, umfowabo kaAbrahama.

²⁴ Umfazi wakhe omncane obizo lakhe linguRewuma, laye wazala uTeba loGahama loTahashi loMahaka.