UGenesisi 21 - iBhayibhili Elingcwele 1978

Ukuzalwa kukaIsaka

¹ INkosi yaba lomusa kuSara njengokukhuluma kwayo, yamenzela njengalokho yayimthembisile.

² USara wathatha isisu, wamzalela indodana uAbrahama esemdala, ngesikhathi uNkulunkulu abesitshilo kuye.

³ UAbrahama wayitha ibizo indodana azalelwe yona nguSara wathi nguIsaka.

⁴ UAbrahama wayisoka indodana yakhe uIsaka lapho isilezinsuku ezificaminwembili, njengokutsho kukaNkulunkulu kuye.

⁵ UAbrahama wayeleminyaka elikhulu lapho ezalelwa uIsaka indodana yakhe.

⁶ USara wathi: UNkulunkulu ungenzele ulutho oluthabisayo, bonke abaluzwayo bazathaba kanye lami.

⁷ Wathi futhi: Ngubani obengatsho kuAbrahama ukuthi uSara uzakumunyisa abantwana na? Kanti sengimzalele indodana esemdala.

UHagari loIshmayeli basenkangala

⁸ Umntwana wakhula, wakhunyulwa ebeleni. UAbrahama wenza idili elikhulu mhla uIsaka ekhunyulwa ebeleni.

⁹ USara wasebona indodana kaHagari umGibithe ayizalele uAbrahama idlala ngoIsaka indodana yakhe.

¹⁰ Ngakhoke wathi kuAbrahama: Sixotshe lesisigqilikazi lendodana yaso; ngoba indodana yalesisigqilikazi kayisoze idle ilifa kanye lendodana yami uIsaka.

¹¹ Lelilizwi laba libi kakhulu kuAbrahama ngenxa yendodana yakhe.

¹² Kodwa uNkulunkulu wathi kuAbrahama: Kakungabi buhlungu kuwe ngenxa yomfana langenxa yesigqilikazi sakho; lalela ilizwi likaSara kukho konke akutshoyo kuwe, ngoba inzalo yakho izakubizwa ngoIsaka.

¹³ Langayo indodana yesigqilikazi ngizakwenza isizwe esikhulu, ngoba iyinzalo yakho.

¹⁴ Ngakhoke uAbrahama wavuka ekuseni, wathatha isinkwa lesigxingi samanzi, wakunika uHagari; wabeka umntwana emhlana wakhe, wamxotsha. UHagari wasuka wazula enkangala yaseBerisheba.

¹⁵ Amanzi esephelile esigxingini walahlela umntwana phansi kwesihlahlana.

¹⁶ Waya wahlala phansi khatshana laye okungaba libanga lokuphosa umtshoko; ngoba wathi: Kangingaboni ukufa komntwana. Wahlala maqondana laye, umntwana waphakamisa ilizwi lakhe wakhala.

¹⁷ UNkulunkulu wezwa ilizwi lomntwana. Isithunywa sikaNkulunkulu samemeza uHagari sisezulwini, sathi kuye: Ukhalelani, Hagari? Ungesabi, ngoba uNkulunkulu usezwile ilizwi lomfana lapho akhona.

¹⁸ Sukuma, ubambe umntwana ngesandla sakho; ngoba ngizamenza abe yisizwe esikkhulu.

¹⁹ UNkulunkulu wavula amehlo akhe, wabona umthombo wamanzi. Waya khona, wagcwalisa isigxingi ngamanzi, wamnathisa umfana.

²⁰ UNkulunkulu waba laye umfana, wakhula, wahlala enkangala, waba ngumphosi womtshoko.

²¹ Wahlala enkangala yaseParani; unina wamthathela umfazi elizweni laseGibithe.

Isivumelwano sikaAbrahama loAbimeleki

²² Kwathi ngalesosikhathi uAbimeleki loFikoli, induna yempi yakhe, bakhuluma loAbrahama bathi: UNkulunkulu ulawe kukho konke okwenzayo.

²³ Ngakho funga kimi lapha ngoNkulunkulu ukuthi kawuyikungikhohlisa mina lendodana yami labazukulu bami; kodwa njengomusa engikwenzele wona, yenze njalo lawe kimi lakulo ilizwe osuhlala kilo.

²⁴ UAbrahama wathi: Ngizakufunga.

²⁵ Kodwa uAbrahama wamsola uAbimeleki ngomthombo wamanzi ebeziwuphangile inceku zikaAbimeleki.

²⁶ UAbimeleki wathi: Angazi ukuthi lokhu kwenziwe ngubani; lawe kawungitshelanga, futhi lami kangizwanga ngakho, kuze kube lamhla.

²⁷ UAbrahama wathatha izimvu lezinkabi, wazinika uAbimeleki; bobabili benza isivumelwano.

²⁸ UAbrahama wakhetha izimvukazi zomhlambi zaba yisikhombisa.

²⁹ UAbimeleki wathi kuAbrahama: Lezizimvukazi eziyisikhombisa ozikhethileyo ngezani na?

³⁰ Wathi: Yamukela esandleni sami lezizimvukazi eziyisikhombisa, zibe yibufakazi bokuthi lumthombo umbiwe yimi.

³¹ Ngalokhoke wabiza leyondawo ngokuthi yiBerisheba, ngoba lapho bafunga bobabili.

³² Ngakho benza isivumelwano eBerisheba. UAbimeleki loFikoli induna yempi yakhe basuka lapho, babuyela elizweni lamaFilistiya.

³³ UAbrahama esehlanyele isihlahla esithiwa yitamarisiki eBerisheba wakhuleka khona ebizweni leNkosi, uNkulunkulu ongelakuphela.

³⁴ UAbrahama wahlala elizweni lamaFilistiya insuku ezinengi.