UGenesisi 20 - iBhayibhili Elingcwele 1978

UAbrahama loAbimeleki

¹ UAbrahama wasesuka lapho waya ngaselizweni laseNegebi, wakha eGerari phakathi kweKadeshi leShuri.

² UAbrahama wathi ngoSara umkakhe: Ungudadewethu. UAbimeleki inkosi yaseGerari wathuma, wathatha uSara.

³ Kodwa uNkulunkulu weza kuAbimeleki ngephupho ebusuku, wathi kuye: Khangela, uzakufa ngenxa yowesifazana omthetheyo, ngoba ungumfazi wendoda.

⁴ UAbimeleki wayengakasondeli kuye. Wathi: Nkosi, uzabhubhisa lesizwe esingelacala na?

⁵ Kasuye yini othe kimi: Ungudadewethu na? Laye uqobo wathi: Ungumnewethu. Ngikwenze lokhu ngenhliziyo yami eqotho langezandla zami ezingelacala.

⁶ UNkulunkulu wasesithi kuye ephupheni: Yebo, ngiyazi ukuthi ukwenze lokhu ngenhliziyo eqotho; futhi ngakuvimbela ukuba ungoni kimi; ngenxa yalokhu kangikuvumelanga ukuba umthinte.

⁷ Ngakho buyisela umfazi endodeni yakhe, ngoba ingumprofethi; izakukukhulekela ukuze uphile; kodwa uba ungambuyiseli, yazi ukuthi impela uzakufa wena labo bonke abangabakho.

⁸ UAbimeleki wavuka ekuseni, wabiza zonke inceku zakhe, wazitshela zonke lezizinto; inceku zatshaywa luvalo olukhulu.

⁹ UAbimeleki wasembiza uAbrahama, wathi kuye: Wenzeni kithi na? Ngoneni kuwe ukuba ungilethele mina lombuso wami icala elingaka na? Wenze kimi lokho okungafanele ukwenziwa.

¹⁰ UAbimeleki wathi kuAbrahama: Kambe ukwenzeleni lokhu na?

¹¹ UAbrahama wathi: Ngoba ngathi impela ukumesaba uNkulunkulu kakukho kulindawo; bazangibulala ngenxa yomkami.

¹² Kanti impela ungudadewethu, indodakazi kababa, kodwa kasiyo indodakazi kamama; waba ngumkami.

¹³ Kwathi mhla uNkulunkulu engisusa endlini kababa ngathi kumkami: Akungenzele umusa ngokwenza lokhu ukuthi endaweni zonke esizakufika kuzo uthi ngami: Ungumnewethu.

¹⁴ UAbimeleki wasemnika uAbrahama izimvu lezinkabi, izinceku lezincekukazi; wambuyisela uSara umkakhe.

¹⁵ UAbimeleki wathi: Khangela, ilizwe lami liphambi kwakho; yakha lapha uthanda khona.

¹⁶ Wathi kuSara: Khangela, ngimnikile umnewenu inhlamvu zesiliva eziyinkulungwane, kube yisigeziso secala; phambi kwabantu bonke usuhlonipheka.

¹⁷ UAbrahama wasekhuleka kuNkulunkulu; uNkulunkulu wamsilisa uAbimeleki kanye lomkakhe lencekukazi zakhe, bazala.

¹⁸ Ngoba iNkosi yayivalile izizalo zonke zabendlu kaAbimeleki ngenxa kaSara umkaAbrahama.