UGenesisi 2 - iBhayibhili Elingcwele 1978

¹ Kwasekuphela ukwenziwa kwezulu lomhlaba lakho konke okukukho.

² Ngosuku lwesikhombisa uNkulunkulu wawuqeda umsebenzi wakhe abewenza. Waphumula ngosuku lwesikhombisa emsebenzini wakhe wonke abewenza.

³ UNkulunkulu wabusisa usuku lwesikhombisa, walwenza lwaba ngcwele; ngoba ngalolosuku waphumula emsebenzini wakhe wonke wokudala uNkulunkulu ayewenza.

⁴ Le yindaba yokudalwa kwezulu lomhlaba ekudalweni kwakho. Mhla iNkosi uNkulunkulu isenza izulu lomhlaba,

⁵ kwakungakabikho isihlahla emhlabeni, lemibhida yeganga yayingakamili; ngoba iNkosi uNkulunkulu yayingakanisi izulu emhlabeni, kungakabikho muntu wokulima umhlabathi.

⁶ Kodwa kwenyuka inkungu ivela emhlabathini, yathelela ngamanzi elizweni lonke.

⁷ INkosi uNkulunkulu yasimbumba umuntu ngomhlabathi, yaphefumulela umoya wokuphila emakhaleni akhe; umuntu waba ngumuntu ophilayo.

Insimu yaseEdeni

⁸ INkosi uNkulunkulu yenza insimu eEdeni ngasempumalanga, yambeka khona umuntu eyayimenzile.

⁹ INkosi uNkulunkulu yamilisa emhlabathini zonke izihlahla ezibukekayo lezilungileyo zokudliwa; yamilisa phakathi kwensimu isihlahla sokuphila lesihlahla sokwazi okulungileyo lokubi.

¹⁰ Kwavela eEdeni umfula wokuthelela insimu. Wehlukana usuka lapho, waba yizifula ezine.

¹¹ Ibizo lesokuqala liyiPishoni; yiso esizingelezele ilizwe lonke laseHavila lapho kukhona igolide.

¹² Lihle igolide lalelolizwe; kukhona amatshe amahle athiwa ibedola leonikse.

¹³ Ibizo lesesibili liyiGihoni; yiso esizingelezele ilizwe lonke laseEtiyopiya.

¹⁴ Ibizo lesesithathu liyiHidekeli; yiso esigeleza ngasempumalanga kweAsiriya. Isifula sesine siyiYufrathi.

¹⁵ INkosi uNkulunkulu yasimthatha umuntu, yambeka ensimini yaseEdeni ukuba ayilime, ayilondoloze.

¹⁶ INkosi uNkulunkulu yamlaya umuntu yathi: Ungadla okwezihlahla zonke zensimu njengokuthanda kwakho;

¹⁷ kodwa ungadli okwesihlahla sokwazi okulungileyo lokubi, ngoba mhla usidla okwaso uzakufa isibili.

¹⁸ INkosi uNkulunkulu yasisithi: Kakulunganga ukuba umuntu ahlale yedwa. Ngizakumenzela onjengaye ukuba amsize.

¹⁹ INkosi uNkulunkulu yabumba ngomhlabathi zonke inyamazana zeganga lazo zonke inyoni zaphezulu; yaziletha kumuntu ukuba abone ukuthi angaziqamba ngokuthini, ukuze kuthi njengalokhu umuntu eziqamba zonke izidalwa eziphilayo, lokhu kube ngamabizo azo.

²⁰ Umuntu wazitha amabizo azo zonke inkomo lenyoni zaphezulu lenyamazana zonke zeganga. Kodwa kumuntu kwakungekho onjengaye ukumsiza.

²¹ INkosi uNkulunkulu yamehlisela umuntu ubuthongo obukhulu, walala. Yasikhupha olunye lwezibambo zakhe, yavala indawo ngenyama.

²² Ubambo iNkosi uNkulunkulu eyayilukhuphile emuntwini yenza ngalo owesifazana, yamusa kumuntu.

²³ Umuntu wasesithi: Lo uselithambo lamathambo ami, lenyama yenyama yami; uzakubizwa ngokuthi ngowesifazana, ngoba ekhutshwe endodeni.

²⁴ Ngenxa yalokhu umuntu uzakutshiya uyise lonina, anamathele kumkakhe; bazakuba nyamanye.

²⁵ Babehambaze bobabili, umuntu lomkakhe, bengelamahloni.