UGenesisi 19 - iBhayibhili Elingcwele 1978

Ukubhujiswa kweSodoma leGomora

¹ Izithunywa zeNkosi ezimbili zafika eSodoma sekuhlwile. ULoti wayehlezi esangweni leSodoma. Kwathi esezibona, wasukuma, wazihlangabeza, wathi mbo ngobuso phansi;

² wathi: Makhosi, wozani lingene endlini yenceku yenu, lihlale khona ubusuku bonke, ligeze inyawo zenu; ekuseni kakhulu lizakusuka, lihambe indlela yenu. Zathi: Atshi, kodwa sizahlala phandle.

³ Ngakho wazincenga kakhulu zaze zangena laye endlini yakhe; wazilungisela ukudla, wenza isinkwa esingelamvubelo; zadla.

⁴ Zingakalali, amadoda omuzi, amadoda wonke aseSodoma amatsha lamadala evela emzini wonke azingelezela indlu.

⁵ Ambiza uLoti athi kuye: Angaphi amadoda angenise kuwe ebusuku na? Akhuphele kithi ukuba siwenze abafazi.

⁶ ULoti waphumela kuwo, wavala umnyango ngemva kwakhe, wema ngasemnyango.

⁷ Wathi: Bazalwane, lingenzi okubi.

⁸ Khangelani, ngilamadodakazi amabili angendanga; ake ngilikhuphele wona, lenze kuwo njengokubona kwenu; kodwa lingenzi lutho kulamadoda, ngoba angene emthunzini wophahla lwami.

⁹ Kodwa athi: Xekela le. Lumuntu wafika lapha engowezizwe, khathesi usefuna ukuba ngumahluleli wethu; sizakwenza kubi okwedlula bona. Amcindezela kakhulu uLoti, asondela ukuba afohloze isivalo.

¹⁰ Kodwa lawomadoda elula izandla zawo, amdonsela kuwo endlini, avala umnyango.

¹¹ Wonke amadoda ayephandle kwendlu awaphumputhekisa, aze akhathala yikudinga umnyango.

¹² Amadoda athi kuLoti: Ulobani omunye lapha na? Abakhwenyana lamadodana akho lamadodakazi akho, loba ngubani owakho okulumuzi, mkhuphe kulindawo,

¹³ ngoba sizabhubhisa lindawo, ngoba ukusola ngayo kukhulu phambi kweNkosi; iNkosi isithumile ukuba siyibhubhise.

¹⁴ ULoti wasephuma, wakhuluma labakhwenyana bakhe ababezakuthatha amadodakazi akhe, wathi: Sukani liphume kulindawo; ngoba iNkosi izabhubhisa umuzi. Kodwa waba njengosomayo emehlweni abakhwenyana bakhe.

¹⁵ Ekuseni izithunywa zamkhuthaza uLoti, zathi: Sukuma, uthathe umkakho lamadodakazi akho womabili olawo, uhambe, funa ubhujiswe ekutshayweni komuzi.

¹⁶ Kodwa esazilazila, amadoda ambamba ngesandla yena lomkakhe lamadodakazi akhe womabili, ngoba iNkosi imhawukela, amkhupha, ambeka ngaphandle komuzi.

¹⁷ Kwathi esebakhuphele ngaphandle, athi: Baleka usile, ungakhangeli emva kwakho, ungemi egcekeni; balekela entabeni funa ubhujiswe.

¹⁸ ULoti wathi kuwo: Makhosi, kakungabi njalo.

¹⁹ Khangelani, inceku yenu ifumene umusa emehlweni enu, lingenzele isihawu esikhulu ngokukhulula ukuphila kwami; kodwa mina kangilamandla okufinyelela entabeni kungakafiki ububi lokufa.

²⁰ Khangelani, nanko umuzi oseduze engingabalekela kuwo; futhi ungumuzi omncinyane. Ake ngibalekele khona ukuba ngiphile; ngumuzi omncinyane nje.

²¹ Wasesithi kuye: Khangela, lakulokhu ngiyakuvumela, kangiyikuwubhubhisa umuzi okhuluma ngawo.

²² Phangisa, ubalekele khona; ngoba ngingeze ngenza ulutho ungakafiki khona. Ngakho umuzi wabizwa ngokuthi yiZowari.

²³ Laseliphumile ilanga lapho uLoti efika eZowari.

²⁴ INkosi yasinisa phezu kweSodoma leGomora isolufa lomlilo, kuvela eNkosini ezulwini.

²⁵ Yachitha leyomizi legceke lonke, labo bonke ababehlala emizini, lalokho okuhlumayo emhlabathini.

²⁶ Kodwa umkaLoti wakhangela emuva, waba yinsika yetshwayi.

²⁷ UAbrahama wavuka ekuseni, waya endaweni lapha wayekade emi khona phambi kweNkosi.

²⁸ Wakhangela ngaseSodoma laseGomora, langaselizweni lonke legceke, wabona intuthu yelizwe ithunqa njengentuthu yesithando somlilo.

²⁹ Kwathi uNkulunkulu esebhubhisile imizi yasemagcekeni wamkhumbula uAbrahama, wakhupha uLoti ekubhujisweni mhla ebhubhisa imizi ayehlala kuyo uLoti.

UMowabi loAmoni

³⁰ ULoti wasesuka eZowari, waya wahlala entabeni kanye lamadodakazi akhe womabili, ngoba wesaba ukuhlala eZowari; wahlala obhalwini kanye lamadodakazi akhe womabili.

³¹ Enkulu yasisithi kwencinyane: Ubaba usemdala, kakulandoda emhlabeni ezakusithatha.

³² Woza simnathise ubaba iwayini, silale laye sizizuzele inzalo kubaba.

³³ Ngalobobusuku amnathisa uyise iwayini; enkulu yangena yalala loyise, engazi ukulala kwayo lokusuka kwayo.

³⁴ Kwathi ngakusisa enkulu yathi kwencinyane: Khangela, bengilele lobaba izolo; asiphinde simnathise iwayini langalobubusuku, ungene wena ulale laye, ukuze sizizuzele inzalo kubaba.

³⁵ Amnika uyise iwayini langalobobusuku; encinyane yasuka yalala laye, engazi ukulala kwayo lokusuka kwayo.

³⁶ Ngokunjalo amadodakazi kaLoti womabili athatha izisu kuyise.

³⁷ Enkulu yazala indodana, yayitha ibizo yathi nguMowabi; lowo ngukhokho wamaMowabi kuze kube lalamhla.

³⁸ Encinyane layo yazala indodana, yayitha ibizo yathi nguBenami; lowo ngukhokho wabantwana bakaAmoni kuze kube lalamhla.