UGenesisi 17 - iBhayibhili Elingcwele 1978

Ukusoka kuyisibonakaliso sesivumelwano

¹ Kwathi uAbrama eseleminyaka engamatshumi aficamunwemunye lesificamunwemunye iNkosi yabonakala kuye, yathi kuye: NginguNkulunkulu uSomandla; hamba phambi kwami, ungasoleki.

² Ngizakwenza isivumelwano sami phakathi kwami lawe, ngikwandise kakhulu.

³ UAbrama wawa ngobuso, uNkulunkulu wakhuluma laye,

⁴ esithi: Nansi isivumelwano sami lawe; uzakuba ngukhokho wezizwe ezinengi.

⁵ Ibizo lakho kalisayikuba nguAbrama, kodwa ibizo lakho selizakuba nguAbrahama, ngoba ngikwenzile ukuba ube ngukhokho wezizwe ezinengi.

⁶ Ngizakukwandisa kakhulu ukuba kuvele kuwe izizwe lamakhosi.

⁷ Ngizamisa isivumelwano sami phakathi kwami lawe, lenzalo yakho emva kwakho ezizukulwaneni zayo, isivumelwano esingapheliyo sokuba ngibe nguNkulunkulu wakho lowenzalo yakho emva kwakho.

⁸ Ngizakunika wena lenzalo yakho emva kwakho ilizwe ohlala kilo, lonke ilizwe laseKanani libe yilifa elingapheliyo; ngizakuba nguNkulunkulu wabo.

⁹ UNkulunkulu wasesithi kuAbrahama: Wenake uzagcina isivumelwano sami kanye lenzalo yakho emva kwakho ezizukulwaneni zayo.

¹⁰ Lesi yisivumelwano sami phakathi kwami lawe ozakusigcina wena lenzalo yakho emva kwakho; bonke abesilisa bakini bazakusokwa.

¹¹ Lizakusoka kube yisibonakaliso sesivumelwano phakathi kwami lani.

¹² Ezizukulwaneni zenu yilowo lalowo owesilisa olensuku ezificaminwembili uzakusokwa, kanye lenceku ezizelwe endlini yakho lezithengiweyo ngemali kowezizwe ezingesizo zenzalo yakho.

¹³ Ozelwe endlini yakho lothengiweyo ngemali bamele basokwe. Isivumelwano sami sizakuba senyameni yenu, sibe yisivumelwano esingapheliyo.

¹⁴ Owesilisa ongasokwanga uzakukhutshwa ebantwini bakibo, ngoba weqile isivumelwano sami.

¹⁵ UNkulunkulu wathi kuAbrahama: Mayelana loSarayi umkakho, ibizo lakhe kalisayikuba nguSarayi, kodwa selizakuba nguSara.

¹⁶ Ngizakumbusisa, ngikunike indodana ngaye; yebo ngizambusisa abe ngunina wezizwe, kuvele kuye amakhosi abantu.

¹⁷ UAbrahama wasesiwa ngobuso, wahleka, wathi enhliziyweni yakhe: Oleminyaka elikhulu uzazalelwa umntwana na? LoSara oleminyaka engamatshumi aficamunwemunye uzakuzala na?

¹⁸ UAbrahama wasesithi kuNkulunkulu: Kungathi uIshmayeli angaphila phambi kwakho!

¹⁹ UNkulunkulu wathi: Atshi, uSara umkakho uzakukuzalela indodana; uzakuyitha ibizo uthi nguIsaka; ngizakumisa isivumelwano sami laye kanye lenzalo yakhe emva kwakhe sibe yisivumelwano esingapheliyo.

²⁰ Mayelana loIshmayeli ngikuzwile; khangela, ngimbusisile, ngizakumnika inzalo ngimandise kakhulu; uzakuzala izikhulu ezilitshumi lambili, ngimenze isizwe esikhulu.

²¹ Kodwa isivumelwano sami ngizakusimisa loIsaka, uSara azakukuzalela yena ngalesisikhathi nyakenye.

²² Esekhulumile lamazwi uNkulunkulu wenyuka esuka uAbrahama.

²³ UAbrahama wasethatha uIshmayeli indodana yakhe labo bonke ababezelwe endlini yakhe labo bonke ababethengiwe ngemali yakhe, bonke abesilisa abendlu yakhe, wabasoka ngalona lolosuku, njengokutsho kukaNkulunkulu kuye.

²⁴ UAbrahama wayeleminyaka engamatshumi aficamunwemunye lesificamunwemunye mhla esokwayo.

²⁵ UIshmayeli indodana yakhe wayeleminyaka elitshumi lantathu mhla esokwayo.

²⁶ UAbrahama loIshmayeli indodana yakhe basokwa ngalolosuku.

²⁷ Amadoda wonke omuzi wakhe ayezelwe endlini layethengwe ngemali kowezizwe, asokwa kanye laye.