UGenesisi 15 - iBhayibhili Elingcwele 1978

Isivumelwano sikaNkulunkulu loAbrama

¹ Emva kwalokhu ilizwi leNkosi lafika kuAbrama ngombono, lathi: Ungesabi wena Abrama, ngiyisihlangu sakho; umvuzo wakho uzakuba mkhulu kakhulu.

² UAbrama wathi: Nkosi Nkulunkulu, uzangiphani? Ngoba kangilamntwana; indlalifa yendlu yami inguEliyezeri waseDamaseko.

³ UAbrama wathi futhi: Khangela, kawungiphanga nzalo; inceku yendlu yami izakuba yindlalifa yami.

⁴ INkosi yasisithi kuye: Lo kayikudla ilifa lakho, kodwa ozakuphuma emibilinini yakho uzakudla ilifa lakho.

⁵ Yamkhuphela phandle yathi: Khangela ngasezulwini ubale izinkanyezi uba ungazibala. Yathi kuye: Inzalo yakho izakuba ngako.

⁶ Wakholwa iNkosi. Yambalela lokhu ukuthi kuyikulunga kwakhe.

⁷ Yathi kuye: NgiyiNkosi eyakususa eUri elamaKaladiya ukuba ngikunike ilizwe leli libe yilifa lakho.

⁸ Wathi: Nkosi Nkulunkulu, ngizakwazi ngani ukuthi lizakuba yilifa lami na?

⁹ Yathi kuye: Ngilethela ithokazi elileminyaka emithathu, lesibhuzikazi esileminyaka emithathu, lenqama eleminyaka emithathu, lejuba, lenkwilimba.

¹⁰ Wasethatha zonke lezizinto, wazidabula phakathi, wabeka leyo laleyongxenye yazo ikhangelene lenye; kodwa inyoni kazidabulanga.

¹¹ Amanqe ehlela phezu kwezidumbu, uAbrama wawaxotsha.

¹² Ilanga selitshona uAbrama wajunywa yibuthongo obukhulu; emnyameni omkhulu watshaywa luvalo.

¹³ INkosi yathi kuAbrama: Yazi impela ukuthi inzalo yakho izazula elizweni elingesilo layo, isebenzele abantu abazakuyihlupha iminyaka engamakhulu amane.

¹⁴ Kodwa ngizakusahlulela lesosizwe ezakusisebenzela; emva kwalokho izakuphuma ilempahla enengi.

¹⁵ Kodwa wena uzakuya kwabaphansi ngocuthula, umbelwe usuluphele kakhulu.

¹⁶ Esizukulwaneni sesine izakubuya lapha; ngoba ububi bamaAmori kabukapheleli.

¹⁷ Kwathi lapho ilanga selitshonile sekumnyama, kwabonakala imbawula ethunqayo lelangabi lomlilo kudabula phakathi kwalezozingxenye.

¹⁸ Ngalolosuku iNkosi yenza isivumelwano loAbrama, yathi: Ngiyayinika inzalo yakho lelilizwe, kusukela emfuleni waseGibithe kuze kube semfuleni omkhulu othiwa liYufrathi,

¹⁹ kanye lelizwe lamaKeni lamaKenizi lamaKadimoni

²⁰ lamaHethi lamaPerizi lamaRefa

²¹ lamaAmori lamaKanani lamaGirigashi lamaJebusi.