UGenesisi 14 - iBhayibhili Elingcwele 1978

UAbrama ukhulula uLoti

¹ Kwathi ensukwini zikaAmrafeli inkosi yaseShinari, loAriyoki inkosi yaseElasari, loKedolawoma inkosi yaseElamu, loTidali inkosi yamaGoyimi,

² balwa impi loBera inkosi yaseSodoma, loBirisha inkosi yaseGomora, loShinabi inkosi yaseAdima, loShemebere inkosi yaseZeboyimi, lenkosi yaseBela eliyiZowari.

³ Bonke labo bahlangana esigodini saseSidima esiluLwandle lweTshwayi.

⁴ Babemkhonzile uKedolawoma okweminyaka elitshumi lambili, kodwa ngomnyaka wetshumi lantathu bamvukela.

⁵ Ngomnyaka wetshumi lane kweza uKedolawoma lamakhosi ayelaye, banqoba amaRefa eAshiterothi‐Karnayimi, lamaZuzi eHamu, lamaEmi egcekeni laseKiriyathayimi,

⁶ lamaHori entabeni yaseSeyiri, baze bafika Eliparani eliseduze lenkangala.

⁷ Basebebuyela emuva, bafika eEnimishipati eliyiKadeshi, banqoba lonke ilizwe lamaAmaleki, lelamaAmori ayehlala eHazazoni‐Tamari.

⁸ Kwaphuma inkosi yaseSodoma lenkosi yaseGomora lenkosi yaseAdima lenkosi yaseZeboyimi, lenkosi yaseBela eliyiZowari, bahlomisa impi ukulwa labo esigodini saseSidima.

⁹ Alwa loKedolawoma inkosi yaseElamu, loTidali inkosi yamaGoyimi, loAmrafeli inkosi yaseShinari, loAriyoki inkosi yaseElasari; amakhosi amane alwa lamakhosi amahlanu.

¹⁰ Isigodi saseSidima sasigcwele imigodi yengcino, inkosi yaseSodoma leyaseGomora abaleka, awela kuyo; kodwa amanye aphepha, abalekela entabeni,

¹¹ athatha yonke impahla lakho konke ukudla kwaseSodoma lokwaseGomora, ahamba.

¹² Amthatha loLoti, indodana yomfowabo kaAbrama owayehlala eSodoma, kanye lempahla yakhe, ahamba.

¹³ Kweza omunye owayephunyukile, wamlandisela uAbrama umHeberu, owayehlala eduze lezihlahla ezinkulu zikaMamre umAmori, umfowabo kaEshikoli loAneri abangane bakaAbrama.

¹⁴ Kwathi uAbrama esezwile ukuthi indodana yomfowabo ithunjiwe, wathatha inceku zakhe ezazalwa endlini yakhe, ezingamakhulu amathathu letshumi lesificaminwembili, waxotshana lawo lawomakhosi waze wafika koDani.

¹⁵ Wahlukanisa inceku zakhe ebusuku, wawahlasela wawanqoba, waxotshana lawo waze wafika eHoba elingasenyakatho kweDamaseko.

¹⁶ Wabuyisa yonke impahla kanye loLoti indodana yomfowabo lempahla yakhe, labesifazana labantu.

UMelkizedeki ubusisa uAbrama

¹⁷ Kwathi uAbrama esebuyile ekunqobeni uKedolawoma lamakhosi ayelaye, yaphuma inkosi yaseSodoma ukumhlangabeza esigodini saseShave esiyisigodi senkosi.

¹⁸ UMelkizedeki inkosi yaseSalema lompristi kaNkulunkulu oPhezukonke waletha isinkwa lewayini.

¹⁹ Wambusisa wathi: Kabusiswe uAbrama nguNkulunkulu oPhezukonke, uMdali wezulu lomhlaba.

²⁰ Kabongwe uNkulunkulu oPhezukonke onikele esandleni sakho izitha zakho. UAbrama wasemnika okwetshumi okwempango yonke.

²¹ INkosi yaseSodoma yathi kuAbrama: Nginike abathunjiweyo, uzithathele impango.

²² UAbrama wathi enkosini yaseSodoma: Ngiyafunga eNkosini uNkulunkulu oPhezukonke, uMdali wezulu lomhlaba,

²³ ngithi kangiyikuthatha umucu lomchilo wenyathelo lokunye okwakho, funa uthi: Ngimnothisile uAbrama.

²⁴ Nginika kuphela lokho ezikudlileyo inceku ezihambe lami, kodwa uAneri loEshikoli loMamre kabathathe isabelo sabo.