UGenesisi 13 - iBhayibhili Elingcwele 1978

Ukwahlukana kukaAbrama loLoti

¹ UAbrama wasuka eGibithe kanye lomkakhe lakho konke ayelakho loLoti, waya eNegebi.

² UAbrama wayenothile kakhulu ngezinkomo langesiliva langegolide.

³ Wahamba esuka eNegebi, waze wafika eBetheli, endaweni lapho lalikhona ithente lakhe kuqala phakathi kweBetheli leAyi;

⁴ endaweni lapho lalikhona ialtare abelenzile kuqala; uAbrama wadumisa ibizo leNkosi lapho.

⁵ Laye uLoti owayehamba loAbrama wayelezimvu lezinkomo lamathente.

⁶ Ilizwe lalingelakubanela ukuba bahlale ndawonye, ngoba impahla yabo yayinengi, behluleka ukuhlala ndawonye.

⁷ Kwaba khona ukuxabana phakathi kwabelusi bezinkomo zikaAbrama labelusi benkomo zikaLoti. Ngalesosikhathi amaKanani lamaPerizi ayehlala elizweni.

⁸ UAbrama wasesithi kuLoti: Kakungabi khona ukuxabana phakathi kwami lawe, laphakathi kwabelusi bami labelusi bakho, ngoba singabazalwane.

⁹ Ilizwe lonke kalisobala phambi kwakho na? Yahlukana lami; uba usiya ngakwesokhohlo, ngizakuya ngakwesokunene; kodwa uba usiya ngakwesokunene, ngizakuya ngakwesokhohlo.

¹⁰ ULoti wasephakamisa amehlo akhe, wabona ukuthi lonke igceke laseJordani lalilamanzi, iNkosi ingakachithi iSodoma leGomora; lalinjengensimu yeNkosi lanjengelizwe laseGibithe kuze kufike eZowari.

¹¹ ULoti wasekhetha lonke igceke laseJordani, waya ngasempumalanga; behlukana omunye lomunye.

¹² UAbrama wahlala elizweni laseKanani, uLoti wahlala emizini yasemagcekeni, wamisa ithente lakhe ngaseSodoma.

¹³ Abantu baseSodoma babebabi, besona kakhulu phambi kweNkosi.

¹⁴ INkosi yathi kuAbrama lapho uLoti esehlukene laye: Phakamisa amehlo akho lapho umi khona, ukhangele ngasenyakatho langaseningizimu langasempumalanga langasentshonalanga,

¹⁵ ngoba ilizwe lonke olibonayo ngizakukunika lona, ngilinike lenzalo yakho kuze kube nininini.

¹⁶ Ngizakuyenza inzalo yakho ibe ngangothuli lomhlaba, kuze kuthi uba umuntu engabala uthuli lomhlaba, izakubalwa lenzalo yakho.

¹⁷ Suka udabule ilizwe, ubude balo lobubanzi balo, ngoba ngizakukunika lona.

¹⁸ UAbrama wasukake wayakwakha eduze lezihlahla ezinkulu eziseMamre eliseHebroni, wakhela iNkosi khona ialtare.