UGenesisi 12 - iBhayibhili Elingcwele 1978

Ukubizwa kukaAbrama

¹ INkosi yasisithi kuAbrama: Suka elizweni lakini lasezihlotsheni zakho lasemzini kayihlo, uye elizweni engizakukutshengisa lona.

² Ngizakukwenza ube yisizwe esikhulu, ngikubusise, ngenze ibizo lakho libe likhulu, lisetshenziswe ekubusiseni.

³ Ngizakubabusisa abakubusisayo, ngibaqalekise abakuqalekisayo; lonke usendo lomhlaba luzazicelela ukubusiswa njengawe.

⁴ UAbrama wasukake njengokutsho kweNkosi, loLoti wahamba laye. UAbrama wayeleminyaka engamatshumi ayisikhombisa lanhlanu mhla esuka eHarani.

⁵ UAbrama wathatha uSarayi umkakhe, loLoti indodana yomfowabo lempahla yabo yonke ababelayo lezinceku ababelazo eHarani, basuka ukuya elizweni laseKanani; bafika elizweni laseKanani.

⁶ UAbrama wadabula ilizwe waze wafika endaweni yaseShekema, esihlahleni esikhulu saseMore. AmaKanani ayesekhona elizweni.

⁷ INkosi yabonakala kuAbrama yathi: Ngizakuyinika inzalo yakho lelilizwe. Wayakhela lapho ialtare iNkosi eyabonakala kuye.

⁸ Wasuka khona, waya entabeni ngasempumalanga kwaseBetheli, wamisa khona ithente lakhe, iBetheli lingasentshonalanga, leAyi lingasempumalanga. Wayakhela lapho ialtare iNkosi, wadumisa ibizo leNkosi.

⁹ UAbrama waqhubeka futhi esiya eNegebi.

UAbrama useGibithe

¹⁰ Kwakukhona indlala elizweni. UAbrama wehlela eGibithe ukuba ahlale khona, ngoba indlala yayinkulu elizweni.

¹¹ Kwathi esesondela ukungena eGibithe wathi kuSarayi umkakhe: Khangela, ngiyazi ukuthi ungowesifazana omuhle obukekayo.

¹² Kuzakuthi lapho amaGibithe ekubona athi: Lo ngumkakhe; angibulale, kodwa wena akugcine.

¹³ Ngakho ubokuthi ungudadewethu, ukuze ngilungelwe ngenxa yakho ngiphile ngenxa yakho.

¹⁴ Kwathi lapho uAbrama esengenile eGibithe, amaGibithe abona ukuthi owesifazana muhle kakhulu.

¹⁵ Izikhulu zikaFaro zambona, zambabaza phambi kukaFaro. Owesifazana walethwa endlini kaFaro.

¹⁶ UFaro wamphatha kuhle uAbrama ngenxa yakhe; waba lezimvu lezinkabi labobabhemi lezinceku lezincekukazi labobabhemikazi lamakamela.

¹⁷ Kodwa iNkosi yamtshaya uFaro lendlu yakhe ngezinhlupheko ezinkulu ngenxa kaSarayi umkaAbrama.

¹⁸ UFaro wasembiza uAbrama wathi: Kuyini lokhu okwenze kimi na? Kungani ungangitshelanga ukuthi ungumkakho na?

¹⁹ Utsholoni ukuthi ungudadewenu, ngize ngimthathe abe ngumkami na? Ngakho nangu umkakho; mthathe uhambe.

²⁰ UFaro walaya amadoda ngaye; amxotsha kanye lomkakhe lakho konke ayelakho.