UGenesisi 1 - iBhayibhili Elingcwele 1978

Ukudalwa komhlaba lomuntu

¹ Ekuqaleni uNkulunkulu wadala izulu lomhlaba.

² Umhlaba wawungelasimo, wawungelalutho; kwakukhona umnyama phezu kwamanzi, kodwa umoya kaNkulunkulu wayehambahamba phezu kwamanzi.

³ UNkulunkulu wasesithi: Kakube khona ukukhanya; kwaba khona ukukhanya.

⁴ UNkulunkulu wabona ukuthi ukukhanya kuhle; wahlukanisa ukukhanya lomnyama.

⁵ UNkulunkulu wakubiza ukukhanya ngokuthi yimini, lomnyama wawubiza ngokuthi yibusuku. Kwaba khona ukuhlwa lokusa, kwaba lusuku lokuqala.

⁶ UNkulunkulu wasesithi: Kakube khona umkhathi phakathi kwamanzi, wahlukanise amanzi lamanzi.

⁷ UNkulunkulu wenza umkhathi, wahlukanisa amanzi angaphansi komkhathi lamanzi aphezu komkhathi; kwaba njalo.

⁸ UNkulunkulu wasebiza umkhathi ngokuthi lizulu. Kwaba khona ukuhlwa lokusa, kwaba lusuku lwesibili.

⁹ UNkulunkulu wasesithi: Amanzi angaphansi kwezulu kawaqoqeke ndawonye, kubonakale umhlabathi owomileyo; kwaba njalo.

¹⁰ Umhlabathi owomileyo uNkulunkulu wawubiza ngokuthi ngumhlaba, lamanzi aqoqeke ndawonye wawabiza ngokuthi lulwandle. UNkulunkulu wabona ukuthi kuhle.

¹¹ UNkulunkulu wasesithi: Umhlaba kawuveze utshani, lemibhida ethela inhlanyelo, lezihlahla ezithela izithelo ezilenhlanyelo yazo, ngezinhlobo zazo. Kwaba njalo.

¹² Umhlaba wasuveza utshani, lemibhida ethela inhlanyelo ngezinhlobo zayo, lezihlahla ezithela izithelo ezilenhlanyelo yazo, ngezinhlobo zazo. UNkulunkulu wabona ukuthi kuhle.

¹³ Kwaba khona ukuhlwa lokusa, kwaba lusuku lwesithathu.

¹⁴ UNkulunkulu wasesithi: Kakube khona emkhathini wezulu izikhanyiso ezahlukanisa imini lobusuku, zibe yizibonakaliso zezibanga, lezensuku lezeminyaka,

¹⁵ zibe yizikhanyiso emkhathini wezulu ukuba zikhanyise emhlabeni; kwaba njalo.

¹⁶ UNkulunkulu wenza izikhanyiso ezimbili ezinkulu, isikhanyiso esikhulu ukuba sibuse imini, lesikhanyiso esincinyane ukuba sibuse ubusuku; wenza lezinkanyezi.

¹⁷ UNkulunkulu wazimisa emkhathini wezulu ukuba zikhanyise emhlabeni,

¹⁸ lokuba zibuse imini lobusuku, zahlukanise ukukhanya lomnyama. UNkulunkulu wabona ukuthi kulungile.

¹⁹ Kwaba khona ukuhlwa lokusa, kwaba lusuku lwesine.

²⁰ UNkulunkulu wasesithi: Amanzi kawagcwale izidalwa ezinengi eziphilayo, kuphaphe izinyoni ngaphezu komhlaba emkhathini wezulu.

²¹ UNkulunkulu wadala izinsikabayitshiye, lenhlobo zonke zezidalwa eziphilayo lezihambayo, amanzi agcwala zona, lenhlobo zonke zenyoni eziphaphayo. UNkulunkulu wabona ukuthi kulungile.

²² UNkulunkulu wazibusisa, wathi: Zalani, lande, ligcwalise amanzi olwandle, lenyoni zande emhlabeni.

²³ Kwaba khona ukuhlwa lokusa, kwaba lusuku lwesihlanu.

²⁴ UNkulunkulu wasesithi: Umhlaba kawuveze inhlobo zonke zezidalwa eziphilayo, izifuyo, lokuhuquzelayo, lezinyamazana zomhlaba ngenhlobo zazo; kwaba njalo.

²⁵ UNkulunkulu wenza inyamazana zomhlaba ngenhlobo zazo, lezifuyo ngenhlobo zazo, lakho konke okuhuquzela emhlabeni ngenhlobo zakho. UNkulunkulu wabona ukuthi kuhle.

²⁶ UNkulunkulu wasesithi: Asenze abantu ngomfanekiso wethu, basifuze, babuse phezu kwenhlanzi zolwandle, laphezu kwenyoni zaphezulu, lezifuyo, lenyamazana zonke zomhlaba, lakho konke okuhuquzela emhlabeni.

²⁷ UNkulunkulu wasemdala umuntu ngomfanekiso wakhe; wamdala ngomfanekiso kaNkulunkulu, owesilisa lowesifazana.

²⁸ UNkulunkulu wababusisa, wathi kibo: Zalani lande, ligcwalise umhlaba liwunqobe, libuse phezu kwenhlanzi zolwandle, lenyoni zaphezulu, lakho konke okuphilayo okuhamba emhlabeni.

²⁹ UNkulunkulu wasesithi: Khangelani, ngilinika yonke imibhida ethela inhlanyelo esemhlabeni wonke, lezihlahla zonke ezilezithelo eziveza inhlanyelo, ukuba kube yikudla kwenu.

³⁰ Zonke inyamazana zomhlaba lenyoni zonke zaphezulu lakho konke okuhuquzela emhlabeni okuphilayo, nginika zona yonke imibhida eluhlaza ukuba ibe yikudla; kwaba njalo.

³¹ UNkulunkulu wasebona konke akwenzileyo; khangela, kwakukuhle kakhulu. Kwaba khona ukuhlwa lokusa, kwaba lusuku lwesithupha.