UDutheronomi 8 - iBhayibhili Elingcwele 1978

Izenzo ezinhle zeNkosi eyazenza kuIsrayeli enkangala

¹ Lizakugcina kuhle yonke imithetho engililaya ngayo lamuhla, liyenze ukuze liphile, lande, lingene elizweni lilithumbe, iNkosi uNkulunkulu wenu eyafunga ukulinika okhokho benu.

² Likhumbule yonke indlela iNkosi uNkulunkulu wenu elihole ngayo kuliminyaka engamatshumi amane enkangala, ukuba ilithobise, ilihlole, ibone imicabango yenhliziyo zenu ukuba ibone ukuthi lizakuyigcina imithetho yayo yini, loba ayi.

³ Ngakho yalithobisa, yalilambisa, yalinika imana elalingayazi labokhokho benu babengalazi, ukuba ilifundise ukuthi umuntu kaphili ngesinkwa sodwa, kodwa uphila ngawo wonke amazwi aphuma emlonyeni weNkosi.

⁴ Kuleyominyaka engamatshumi amane izambatho zenu kaziguganga, lenyawo zenu kazivuvukanga.

⁵ Yazini enhliziyweni zenu ukuthi njengalokhu umuntu elaya indodana yakhe, ngokunjalo iNkosi uNkulunkulu wenu iyalilaya lani.

⁶ Ngakhoke lizagcina imithetho yeNkosi uNkulunkulu wenu, lihambe ngendlela zayo, liyesabe.

⁷ Ngoba iNkosi uNkulunkulu wenu isizakulingenisa elizweni elihle, ilizwe elilemifula yamanzi, lemithombo yamanzi agobhoza ezihotsheni lezintabeni;

⁸ ilizwe elilamabele lebhali, lezivini, lemikhiwa, lezithelo zepomegranati, lezihlahla zamaoliva, lenyosi,

⁹ ilizwe lapho elizakudla khona isinkwa esingayikuphela; lalapho lingayikuswela lutho; ilizwe elilamatshe alensimbi, lelilezintaba elingemba kuzo ithusi.

¹⁰ Lizakudla lisuthe, libonge iNkosi uNkulunkulu wenu ngelizwe elihle elinike lona.

Isixwayiso ngokukhohlwa iNkosi

¹¹ Qaphelani ukuba lingakhohlwa iNkosi uNkulunkulu wenu ngokungagcini imithetho yayo lezimiso zayo lezahlulelo zayo, engililaya zona lamuhla.

¹² Futhi lapho selidlile lasutha, lalapho selakhile izindlu ezinhle lahlala kuzo,

¹³ sekwandile izinkomo zenu lezimvu zenu lesiliva senu legolide lenu lakho konke elilakho,

¹⁴ qaphelani ukuba inhliziyo zenu zingazikhukhumezi, beselikhohlwa iNkosi uNkulunkulu wenu eyalikhupha elizweni laseGibithe, endaweni yobugqili,

¹⁵ yalihola enkangala enkulu leyesabekayo, eyayigcwele izinyoka ezilobuhlungu lezinkume, elomhlabathi owomileyo, lapho kwakungelamanzi khona. Yalivezela amanzi edwaleni eliqinileyo,

¹⁶ yalinika imana enkangala okhokho benu ababengayazi, ukuba ilithobise, ilihlole, ilenzele okuhle ekucineni.

¹⁷ Qaphelani, ukuba lingathi enhliziyweni yenu: Ngawami amandla langamandla esandla sami ngizizuzele limfuyo.

¹⁸ Khumbulani iNkosi uNkulunkulu wenu, ngoba yiyo elinika amandla okuzuza imfuyo, ukuba iqinise isivumelwano sayo eyasifunga kubokhokho benu njengokwenza kwayo lamhla.

¹⁹ Uba likhohlwa iNkosi uNkulunkulu wenu, lilandele abanye onkulunkulu, likhuleke kibo, libakhonze, ngiyalixwayisa lamhla ukuthi lizakubhubha impela.

²⁰ Lizachitheka njengezizwe iNkosi ezakuzichitha phambi kwenu, ngoba lingalilalelanga ilizwi leNkosi uNkulunkulu wenu.