UDutheronomi 7 - iBhayibhili Elingcwele 1978

AbakoIsrayeli bangabantu abangcwele eNkosini

¹ Kuzakuthi lapho iNkosi uNkulunkulu wakho isikungenisa elizweni oya kulo ukulithumba ixotshe izizwe ezinengi phambi kwakho, amaHethi lamaGirigashi lamaAmori lamaKanani lamaPerizi lamaHivi lamaJebusi, izizwe eziyisikhombisa ezinkulu lezilamandla kulawe,

² lalapho iNkosi uNkulunkulu wakho izinikela zona kuwe ukuba uzinqobe, uziqede nya. Ungenzi isivumelwano lazo, ungabi lasihawu kuzo.

³ Ungathathani lazo, ungendiseli amadodana azo amadodakazi akho; futhi ungawathatheli amadodana akho amadodakazi azo.

⁴ Ngoba amadodana akho azakuphanjulwa yizo ekuyilandeleni iNkosi, ukuze akhonze abanye onkulunkulu, INkosi ikuthukuthelele, ikubhubhise masinyane.

⁵ Kodwake uzakwenza lokhu kuzo; uzadiliza ama‐altare azo, ubulale insika zazo zokukhonzela, ugamule insika zazo ezimiselwe unkulunkulukazi uAshera, utshise ngomlilo izithombe zazo ezibaziweyo.

⁶ Ngoba lingabantu abangcwele eNkosini uNkulunkulu wenu; ilikhethile ukuba libe ligugu kuyo phakathi kwazo zonke izizwe ezisemhlabeni.

⁷ INkosi kayilithandanga, kayilikhethanga ngoba lalibanengi kulazo zonke ezinye izizwe; ngoba lalibalutshwana kulazo zonke;

⁸ kodwa kungenxa yokulithanda kwayo langenxa yokusigcina kwayo isifungo eyasifunga kubokhokho benu, iNkosi yalikhupha ngesandla esilamandla, yalihlenga endaweni yobugqili lesandleni sikaFaro inkosi yaseGibithe.

⁹ Ngakhoke yazini ukuthi iNkosi uNkulunkulu wenu inguNkulunkulu, uNkulunkulu othembekileyo, ogcina isivumelwano sakhe, olothando olungapheliyo kubo abamthandayo abagcina isivumelwano sakhe, kuze kube sezizukulwaneni eziyinkulungwane,

¹⁰ ophindisela labo abamzondayo, ababhubhise. Kayikuphuza ukumphindisela omzondayo.

¹¹ Ngakho lizakugcina imilayo lezimiso lezahlulelo engililaya zona lamuhla.

Izibusiso zokulalela

¹² Kuzakuthi uba lilalela lezizimiso, lizigcine, lizenze, iNkosi uNkulunkulu izagcina isivumelwano eyasifunga kubokhokho benu, ibe lothando olungapheliyo kini.

¹³ Izakulithanda, ilibusise, ilandise. Futhi izakubusisa inzalo yenu, lezithelo zomhlabathi wenu, lamabele enu, lewayini lenu, lamafutha enu, lenzalo yenkomo zenu lenzalo yezimvu zenu, elizweni eyafunga kubokhokho benu ukuiinika lona.

¹⁴ Lizakubusiswa kakhulu kulazo zonke izizwe; kakuyikuba khona phakathi kwenu owesilisa lowesifazana oyinyumba, loba inyumbakazi phakathi kwenkomo zenu.

¹⁵ INkosi izakuqeda phakathi kwenu zonke izifo; kayiyikulehlisela izifo ezimbi zaseGibithe elizaziyo, kodwa izakuzehlisela phezu kwabo bonke abantu abalizondayo.

¹⁶ Lizakubachitha bonke abantu ezakubanikela kini iNkosi uNkulunkulu wenu; lingabahawukeli, lingakhonzi onkulunkulu babo, ngoba lokhu kuzakuba ngumjibila kini.

¹⁷ Mhlawumbe lizakuthi enhliziyweni zenu: Izizwe lezi zinengi kulathi; singazinqoba kanjani na?

¹⁸ Lingazesabi, kodwa khumbulani lokho iNkosi uNkulunkulu wenu eyakwenza kuFaro lakulo lonke iGibithe,

¹⁹ lenhlupheko ezinkulu elazibona ngamehlo enu, lezibonakaliso lezimangaliso, lesandla esilamandla, lengalo elamandla, iNkosi uNkulunkulu wenu eyalikhupha ngazo. INkosi uNkulunkulu wenu izakwenza njalo kubo bonke abantu elibesabayo.

²⁰ Futhi iNkosi uNkulunkulu wenu izakuthumela olonyovu phakathi kwabo, baze babhujiswe lalabo abaseleyo abalicatshelayo.

²¹ Kaliyikubesaba, ngoba iNkosi uNkulunkulu wenu iphakathi kwenu, inguNkulunkulu omkhulu lowesabekayo.

²² INkosi uNkulunkulu wenu izazixotsha lezizizwe phambi kwenu kancinyane kancinyane; kaliyikuziqeda masinyane, funa izilo zande zibe zinengi.

²³ Kodwa iNkosi uNkulunkulu wenu izakuzinikela kini, izihluphe kakhulu, zize zichitheke ziphele.

²⁴ Izakunikela ezandleni zenu amakhosi azo, licitshe amabizo awo emhlabeni; kakulamuntu ozakumelana lani lize lizichithe ziphele.

²⁵ Izithombe ezibaziweyo zabonkulunkulu bazo lizakuzitshisa ngomlilo. Lingahawukeli isiliva legolide elikuzo, lingazithatheli lona, libe ngumjibila kini, lezizinto ziyisinengiso eNkosini uNkulunkulu wenu.

²⁶ Lingalethi isithombe ezindlini zenu, funa ube yinto eqalekisiweyo njengaso; kodwa lisizonde kakhulu, lisenyanye, ngoba siyinto eqalekisiweyo.