UDutheronomi 6 - iBhayibhili Elingcwele 1978

Umthetho omkhulu

¹ Yiyo le imithetho lezimiso lezahlulelo iNkosi uNkulunkulu wakho eyangilaya ukukufundisa zona, ukuba uzenze elizweni oya kulo ukuba ulithumbe,

² ukuze uyesabe iNkosi uNkulunkulu wakho wena lendodana yakho lendodana yendodana yakho, ugcine zonke izimiso zayo lemithetho yayo engikulaya yona, zonke insuku zokuhamba kwakho, ukuze insuku zakho zande.

³ Ngakhoke zwana, Israyeli, unanzelele ukuzenza, ukuba kukulungele, wande kakhulu elizweni eligcwele uchago lenyosi njengokukuthembisa kwayo iNkosi uNkulunkulu wabokhokho benu.

⁴ Zwana, Israyeli, ukuthi: INkosi inguNkulunkulu wethu, yiNkosi yinye.

⁵ Wothanda iNkosi uNkulunkulu wakho ngenhliziyo yakho yonke langomoya wakho wonke langamandla akho wonke.

⁶ Amazwi la engiwakhulumayo lamuhla azakuba senhliziyweni yakho;

⁷ uzakuwafundisa abantwana bakho, uwatsho lapho uhlezi endlini yakho, lalapho uhamba endleleni, lalapho ulala, lalapho uvuka.

⁸ Uzakuwabophela esandleni sakho abe luphawu, lasebunzini lakho abe yisikhumbuzo.

⁹ Uzakuwaloba ensikeni zomnyango wendlu yakho, lemasangweni akho.

AbakoIsrayeli baxwayiswa ngokungalaleli

¹⁰ Kuzakuthi lapho iNkosi uNkulunkulu wakho ekungenisa elizweni eyafunga kubokhokho benu, oAbrahama loIsaka loJakobe, ukukunika ilizwe elilemizi emikhulu lemihle ongayakhanga,

¹¹ lezindlu ezigcwele zonke izinto ezinhle ongazigcwalisanga, lemithombo ongayimbanga, lezivini lezihlahla zamaoliva ongazihlanyelanga, ongadla kuzo usuthe,

¹² qaphela, ukuba ungayikhohlwa iNkosi eyakukhupha eGibithe, endaweni yobugqili.

¹³ Uzakuyesaba iNkosi uNkulunkulu wakho, uyikhonze, ufunge ngebizo layo.

¹⁴ Ungalandeli abanye onkulunkulu, onkulunkulu babantu abakhe eduze lawe.

¹⁵ Ngoba iNkosi uNkulunkulu wakho ophakathi kwakho inguNkulunkulu olomona. Qaphela, funa iNkosi uNkulunkulu wakho ikuthukuthelele, ikuchithe emhlabeni.

¹⁶ Ungayilingi iNkosi uNkulunkulu wakho njengalokhu wayilinga eMasa.

¹⁷ Ugcine kuhle imithetho yayo lemilayo yayo lezimiso zayo ekulaye zona.

¹⁸ Wenze okulungileyo lokuhle emehlweni eNkosi ukuba kukulungele, lokuba ungene ulithumbe ilizwe elihle, iNkosi eyafunga ukulinika okhokho benu,

¹⁹ lokuxotsha zonke izitha zakho phambi kwakho, njengokuthembisa kwayo.

²⁰ Kuzakuthi lapho indodana yakho ikubuza esikhathini esizayo isithi: Itshoni imilayo lezimiso lezahlulelo iNkosi uNkulunkulu wakho ekulaye zona na?

²¹ wena uzakuthi endodaneni yakho: Thina sasiyizigqili zikaFaro eGibithe. INkosi yasikhupha eGibithe ngesandla esilamandla,

²² yenza phambi kwethu izibonakaliso lezimangaliso ezinkulu lezinzima phezu kweGibithe, phezu kukaFaro labo bonke abendlu yakhe.

²³ Yasikhupha khona ukuze isingenise elizweni, isinike lona eyafunga ukulinika okhokho.

²⁴ INkosi yasilaya ukwenza zonke lezizimiso lokwesaba iNkosi uNkulunkulu wethu, ukuba kusilungele njalonjalo, lokuba isilondoloze siphile njengalamhla.

²⁵ Kuzakuba yikulunga kwethu uba sinanzelela ukwenza limilayo phambi kweNkosi uNkulunkulu wethu njengokusilaya kwayo.