UDutheronomi 4 - iBhayibhili Elingcwele 1978

UMose ulaya abakoIsrayeli ukuba bagcine imilayo

¹ Khathesike, lina bakoIsrayeli, zwanini izimiso lezahlulelo engilifundisa zona, lizenze ukuze liphile, lingene lilithumbe ilizwe elinika lona iNkosi uNkulunkulu wabokhokho benu.

² Kaliyikwengezelela lutho elizwini engililaya ngalo, lingaphunguli lutho kulo, ukuba ligcine imilayo yeNkosi uNkulunkulu wenu engililaya yona.

³ Lakubona okwenziwa yiNkosi eBali‐Peyori; ngoba iNkosi uNkulunkulu wenu yabhubhisa phakathi kwenu bonke abantu abalandela uBali wasePeyori;

⁴ kodwa lina elabambelela eNkosini uNkulunkulu wenu lisekhona lonke lalamuhla.

⁵ Khangelani, ngilifundisile izimiso lezahlulelo, njengokungilaya kwayo iNkosi uNkulunkulu wami, ukuba lizenze elizweni elizakungena kulo ukulithumba.

⁶ Zigcineni, lizenze; ngoba ngokwenza njalo lizatshengisa ukuhlakanipha lolwazi ebantwini abazakuthi besizwa lezizimiso zonke bathi: Impela isizwe lesi esikhulu ngesabantu abahlakaniphileyo labaziyo.

⁷ Ngoba yisiphi isizwe esikhulu esilonkulunkulu oseduze laso njengeNkosi uNkulunkulu wethu iseduze lathi nxa sikhuleka kuyo na?

⁸ Futhi yisiphi isizwe esikhulu esilezimiso lezahlulelo ezilungileyo ezinjengawo wonke lumlayo engiwubeka phambi kwenu lamhla na?

Ukukhunjulwa kwalokho okwenzakalayo eHorebe

⁹ Ngakhoke qaphelani, ligcine kuhle umphefumulo wenu, funa likhohlwe izinto elizibonayo, zingasuki emikhumbulweni yenu insuku zenu zonke. Libazise zona abantwana benu labazukulu benu,

¹⁰ ukuthi mhla wosuku elema ngalo phambi kweNkosi uNkulunkulu wenu eHorebe, iNkosi yathi kimi: Ngibuthanisela abantu ukuba ngibazise amazwi ami, ukuze bafunde ukungesaba zonke insuku zokuhamba kwabo emhlabeni, bafundise njalo labantwana babo.

¹¹ Laselisondela, lema ngaphansi kwentaba eyayivutha umlilo waze wafika phezulu, ilomnyama omkhulu lamayezi amnyama.

¹² INkosi yakhuluma kini iphakathi komlilo; lawezwa lamazwi akhulunywayo, kodwa kalibonanga simo somuntu; kwakukhona ilizwi kuphela.

¹³ Yamemezelela kini isivumelwano sayo, eyalilaya ukuba lisigcine, imithetho elitshumi eyayiloba ematsheni amabili.

¹⁴ INkosi yangilaya ngalesosikhathi ukuba ngilifundise izimiso lezahlulelo, ukuze lizenze elizweni elizakungena kulo ukulithumba.

AbakoIsrayeli baxwayiswa ukuba bangoni

¹⁵ Ngakhoke qaphelani. Njengoba lingabonanga isimo somuntu mhla wosuku iNkosi ikhuluma lani eHorebe iphakathi komlilo,

¹⁶ xwayani funa lone, lizenzele isithombe esibaziweyo sowesilisa loba sowesifazana,

¹⁷ loba senyamazana esemhlabeni, loba senyoni ephaphayo,

¹⁸ loba sokuhuquzelayo emhlabeni, lenhlanzi esemanzini angaphansi komhlaba.

¹⁹ Futhi lapho liphakamisela amehlo enu phezulu, libone ilanga lenyanga lezinkanyezi, konke okusezulwini, xwayani, funa liyengwe, likudumise likukhonze. INkosi uNkulunkulu wenu lokhu ikunike bonke abantu abangaphansi komthunzi welanga ukuba bakukhonze.

²⁰ Kodwa lina iNkosi yalithatha, yalikhupha esithandweni sensimbi, eGibithe, ukuba libe ngabantu bayo njengalamuhla.

²¹ Futhi iNkosi yangithukuthelela ngenxa yenu, yafunga ukuthi kangiyikuchapha iJordani, lokuthi kangiyikungena elizweni elihle elinika lona iNkosi uNkulunkulu wenu ukuba libe ngelenu.

²² Kodwa mina ngimele ukufela kulelilizwe, ngingachaphi iJordani; kodwa lina lizakulichapha, lilithumbe lelolizwe elihle.

²³ Qaphelisani funa likhohlwe isivumelwano seNkosi uNkulunkulu wenu eyasenza lani, lenze isithombe esibaziweyo salokho iNkosi uNkulunkulu wenu elinqabele khona.

²⁴ Ngoba iNkosi uNkulunkulu wenu ingumlilo oqothulayo loNkulunkulu olomona.

²⁵ Lapho lizuza abantwana labazukulu, lalapho selihlale elizweni isikhathi eside, uba lisona, lenze isithombe esibaziweyo solutho oluthile, lenze okubi emehlweni eNkosi uNkulunkulu wenu ukuze limthukuthelise,

²⁶ ngibiza izulu lomhlaba lamhla ukuba kufakaze ngani ukuthi lizabhubha masinyane elizweni elichapha iJordani ukuya kilo ukuba libe ngelenu; kaliyikuhlala kilo isikhathi eside, kodwa lizabhujiswa isibili.

²⁷ INkosi izalichithachitha phakathi kwabantu, lisale liyingcosana nje phakathi kwezizwe iNkosi ezakulixotshela kuzo.

²⁸ Lapho lizakukhonza onkulunkulu abenziwe ngezandla zabantu ngezihlahla langamatshe, abangaboniyo, abangezwayo, abangadliyo labanganukiyo.

²⁹ Kodwa uba lilapho liyifune iNkosi uNkulunkulu wenu, lizayifumana uba liyidinga ngenhliziyo yenu yonke langomphefumulo wenu wonke.

³⁰ Lapho lisekuhluphekeni lisehlelwa yilezizinto zonke, ensukwini ezizayo lizakuphendukela eNkosini uNkulunkulu wenu, lilalele ilizwi layo;

³¹ ngoba iNkosi uNkulunkulu wenu inguNkulunkulu olomusa, kayiyikulitshiya, kayiyikulibhubhisa, kayiyikukhohlwa isivumelwano eyasifunga kubokhokho benu.

³² Ake libuze ngensuku ezidlulileyo ezazingaphambi kwenu, kusukela osukwini uNkulunkulu adala ngalo umuntu emhlabeni, libuze kusukela komunye umkhawulo wezulu kuze kube komunye, ukuthi kwake kwenzakala loba kwezwakala yini into engangale.

³³ Abantu bake balizwa yini ilizwi likaNkulunkulu likhuluma phakathi komlilo, njengalokhu lilizwile lina, baphila na?

³⁴ Futhi omunye unkulunkulu wake wazama yini ukuzithathela isizwe phakathi kwesinye isizwe ngezinhlupheko, langezibonakaliso, langezimangaliso, langempi, langesandla esilamandla, langengalo elamandla, langezinto ezesabekayo, njengakho konke iNkosi uNkulunkulu wenu eyalenzela khona eGibithe phambi kwamehlo enu na?

³⁵ Lina lakutshengiswa lokho ukuba lazi ukuthi iNkosi inguNkulunkulu, kakho omunye onjengayo.

³⁶ Isezulwini yalivumela ukuzwa ilizwi layo, ukuba ilifundise; emhlabeni yalivumela ukubona umlilo wayo omkhulu, lezwa amazwi ayo evela emlilweni.

³⁷ Njengoba ibathandile okhokho benu, yakhetha inzalo yabo emva kwabo, yalikhupha yona ngokwayo eGibithe ngamandla ayo amakhulu,

³⁸ yaxotsha phambi kwenu izizwe ezinkulu ezilamandla kulani ukuze ilingenise elizweni lazo, ilinike lona libe ngelenu njengalamhla.

³⁹ Ngakhoke yazini lamuhla, likugcine enhliziyweni zenu ukuthi iNkosi inguNkulunkulu phezulu ezulwini laphansi emhlabeni; kakho omunye.

⁴⁰ Ngakhoke lizagcina izimiso zayo lemilayo yayo engililaya yona lamhla, ukuba kulilungele lina labantwana benu emva kwenu, lokuba liphile isikhathi eside elizweni iNkosi uNkulunkulu wenu elinika lona kuze kube nini lanini.

Ukukhethwa kwemizi emithathu yokuphephela

⁴¹ UMose wasekhetha imizi emithathu ngasempumalanga ngaphetsheya kweJordani,

⁴² ukuba ibe zindawo zokubalekela umbulali ongabulalanga umakhelwana wakhe ngabomu, obekade engamzondi, ukuze ekubalckeleni kwakhe komunye waleyomizi asile:

⁴³ imizi yile, iBezeri elisenkangala emagcekeni, libe ngumuzi wabakoRubeni; iRamothi eGileyadi, libe ngowabakoGadi; iGolani eBashani, libe ngowabakoManase.

⁴⁴ Yiwo lo umlayo uMose awubeka phambi kwabantu bakoIsrayeli;

⁴⁵ yilobu ubufakazi, yizo lezi izimiso lezahlulelo uMose azimemezela ebantwini bakoIsrayeli ekuphumeni kwabo eGibithe,

⁴⁶ ngaphetsheya kweJordani, esigodini maqondana leBeti‐Peyori, elizweni likaSihoni inkosi yamaAmori, owayehlala eHeshiboni, owanqotshwa nguMose labantu bakoIsrayeli ekuphumeni kwabo eGibithe.

⁴⁷ Balithumba ilizwe lakhe lelizwe likaOgi inkosi yaseBashani, amakhosi amabili amaAmori ayehlala ngasempumalanga ngaphetsheya kweJordani,

⁴⁸ kusukela eAroweri eliseduze kwesihotsha saseArinoni kuze kufike entabeni yaseSiriyoni, iHermoni,

⁴⁹ kanye lalo lonke iAraba ngaphetsheya kweJordani ngasempumalanga, kuze kube solwandle lwaseAraba, ngaphansi kwamawa ePisiga.