UDutheronomi 34 - iBhayibhili Elingcwele 1978

Ukufa kukaMose

¹ UMose wasuka emagcekeni aseMowabi, waya entabeni yaseNebo, engqongeni yasePisiga emaqondana leJeriko. INkosi yamtshengisa lonke ilizwe, elakoGileyadi laze lafika kwelakoDani,

² lonke elakoNafitali, lelakoEfrayimi lelakoManase, lonke ilizwe lakoJuda kwaze kwaba soLwandle lwasentshonalanga,

³ leNegebi, legceke eliyisigodi saseJeriko, umuzi wamalala, kwaze kwaba seZowari.

⁴ INkosi yathi kuye: Yilo leli ilizwe engafunga kuAbrahama loIsaka loJakobe ngathi: Ngizakulinika inzalo yenu. Sengikuvumele ukuba ulibone ngamehlo akho, kodwa kawuyikuwela uye kilo.

⁵ UMose inceku yeNkosi wafela khona elizweni laseMowabi njengelizwi leNkosi.

⁶ Walahlwa esigodini elizweni laseMowabi maqondana leBeti‐Peyori; kodwa kakho olaziyo iliba lakhe kuze kube lamuhla.

⁷ UMose wayeleminyaka elikhulu lamatshumi amabili ekufeni kwakhe. Amehlo akhe ayengafiphalanga, lamandla akhe ayengaphelanga.

⁸ Abantu bakoIsrayeli bamlilela uMose emagcekeni aseMowabi insuku ezingamatshumi amathathu; zaphelake insuku zokumkhalela lokumlilela uMose.

⁹ UJoshuwa indodana kaNuni wayegcwele umoya wokuhlakanipha, ngoba uMose wayebekile izandla zakhe phezu kwakhe. Ngakhoke abantu bakoIsrayeli bamlalela, benza njengalokhu iNkosi imlayile uMose.

¹⁰ Selokhu kwaba yilesosikhathi kakuvelanga umprofethi onjengoMose koIsrayeli, iNkosi eyazana laye,

¹¹ ngazo zonke izibonakaliso lezimangaliso iNkosi eyamthumela ukuba azenze elizweni laseGibithe, kuFaro lakuzo zonke inceku zakhe lakulo lonke ilizwe lakhe,

¹² langamandla amakhulu langezenzo ezinkulu ezesabekayo azenzayo uMose phambi kwabo bonke abakoIsrayeli.