UDutheronomi 33 - iBhayibhili Elingcwele 1978

UMose ubusisa izizwe zakoIsrayeli

¹ Nansi isibusiso uMose umuntu kaNkulunkulu abusisa ngaso abantu bakoIsrayeli engakafi.

² Wathi: INkosi yavela eSinayi, yaphumela kubo ivela eSeyiri, yakhanya entabeni yaseParani, yavela kubo abangcwele abayizigidi, kwakuvutha umlilo ngakwesokunene sayo.

³ Yebo, yabathanda abantu bayo. Bonke abangcwele bayo babesesandleni sayo; bahlala ngasenyaweni zayo, bamukele imilayezo yayo.

⁴ UMose wasinika umlayo, waba yilifa lebandla likaJakobe.

⁵ INkosi yaba yinkosi eJeshuruni, lapho izinhloko zabantu zibuthene, zonke izizwe zakoIsrayeli.

⁶ Mayelana loRubeni wathi: URubeni kaphile, angafi, lamadoda akhe angaphunguki.

⁷ Mayelana loJuda wathi: Zwana, Nkosi, ilizwi likaJuda, umlethe kubantu bakhe. Ngezandla zakho umlwele, umsize ukumelana lezitha zakhe.

⁸ Mayelana loLevi wathi: Mnike uLevi inkatho amaThumimi longcwele wakho inkatho amaUrimi, owamlinga eMasa, waphikisana laye ngasemanzini aseMeriba;

⁹ lowo owathi ngoyise lonina: Kangibananzanga; wabandlulula abafowabo, wafulathela abantwana bakhe. Balalela ilizwi lakho, bagcina isivumelwano sakho.

¹⁰ Bazamfundisa uJakobe izimiso zakho, loIsrayeli umlayo wakho; bazabeka impepha phambi kwakho, lomnikelo wonke wokutshiswa ealtareni lakho.

¹¹ Nkosi, busisa amandla akhe, wamukele umsebenzi wezandla zakhe; choboza izinqe zezitha zakhe, lezabamzondayo, ukuba bangasukumi futhi.

¹² Mayelana loBenjamini wathi: Othandwayo weNkosi uyahlala kuhle ngakiyo; iyamlondoloza usuku lonke, iyahlala phakathi kwamaqaqa akhe.

¹³ Mayelana loJosefa wathi: Ilizwe lakhe kalibusiswe yiNkosi, azuze iziphiwo ezinhle zasezulwini, lezenziki engaphansi,

¹⁴ azuze lezithelo ezinhle ezikhuliswa lilanga, lezithelo ezinhle ezithelwayo izinyanga ngezinyanga,

¹⁵ lezithelo ezinhle ezivele entabeni ezindala, lenala yasemaqaqeni angapheliyo,

¹⁶ lezithelo ezinhle zomhlaba lokugcwala kwawo, lomusa waLowo owahlala esihlahleni. Izinto lezi kazehlele phezu kwekhanda likaJosefa, ekhanda lalowo oyisikhulu phakathi kwabafowabo.

¹⁷ Inkunzi elizibulo ilobukhosi, impondo zayo yizimpondo zenyathi; izahlaba ngazo zonke izizwe, zize zifike emikhawulweni yomhlaba. Impondo zayo ziyizigidi zakoEfrayimi. lezigidi zakoManase.

¹⁸ Thokoza, Zebuluni, ekuhambeni kwakho olwandle, lawe Isakari, emathenteni akho.

¹⁹ Bazamemela abantu entabeni yabo, banikele khona iminikelo yokulunga. Ngoba bakhupha inala yezinlwandle, lenotho efihliweyo etshebetshebeni.

²⁰ Mayelana loGadi wathi: Kabusiswe uNkulunkulu owandisa uGadi. UGadi uchathama njengesilwane, uklebhula ingalo lenkanda.

²¹ Wazikhethela isabelo esihle kakhulu, ngoba khona kwalondolozwa isabelo sombusi; weza ezinduneni zabantu, wenza loIsrayeli intando yeNkosi lezahlulelo zayo.

²² Mayelana loDani wathi: UDani uyisilwane eseqa sivela eBashani.

²³ Mayelana loNafitali wathi: Wena, Nafitali, owaneliswe ngomusa, ogcwele isibusiso seNkosi, thumba ulwandle lelizwe eliseningizimu.

²⁴ Mayelana loAsheri wathi: UAsheri kabusiswe phezu kwamadodana, abe ngothandekayo kakhulu phakathi kwabafowabo, acwilise inyawo zakhe emafutheni.

²⁵ Imigoqo yemizi yakho izakuba ngeyensimbi leyethusi; amandla akho azakuba njengensuku zakho.

²⁶ Kakho onjengoNkulunkulu, wena Jeshuruni, ogade amazulu ukuyakusiza, lomkhathi ngobukhosi bakhe.

²⁷ UNkulunkulu wanininini uyisiphephelo sakho, langaphansi zikhona ingalo ezingelakuphela. Waxotsha izitha phambi kwakho, wathi: Bhubhisa.

²⁸ Ngalokho uIsrayeli wahlala elondolozekile; inzalo kaJakobe ihlezi ngokuthula elizweni elilamabele lewayini; yebo, amazulu akhe ayehlisa amazolo.

²⁹ Uthabile, wena Israyeli! Ngubani onjengawe, isizwe esikhululwe yiNkosi, eyisihlangu sokusizwa kwakho lomkhonto wokunqoba kwakho? Izitha zakho zizakuzithobela wena, uzinyathele phansi.