UDutheronomi 32 - iBhayibhili Elingcwele 1978

¹ Zwanini lina mazulu, ngizakukhuluma, lomhlaba uzwe amazwi omlomo wami.

² Ukufundisa kwami kuzakwehla njengezulu, ukukhuluma kwami kuthonte njengamazolo, njengomkhizo otshanini obuluhlaza, njengemifefezo ohlazeni.

³ Ngizamemezela ibizo leNkosi. Vumani ukuthi mkhulu uNkulunkulu wethu.

⁴ UliDwala, lomsebenzi wakhe uphelele, ngoba zonke indlela zakhe ziyikulunga. UnguNkulunkulu othembekileyo, ongelabubi, ulungile, uqotho.

⁵ Bonile kuye, kabasibo abantwana bakhe ngenxa yesici sabo, bayisizukulwana esiphambeneyo lesingaqondanga.

⁶ Liyibonga iNkosi kanjalo, lina bantu abayizithutha labangahlakaniphanga na? Kayisuye uyihlo owalidalayo, walenza, walimisa na?

⁷ Khumbulani insuku zasendulo, linakane ngeminyaka yezizukulwana ezinengi. Buzani oyihlo, bazakulilandisela, labalisa benu, bazalitshela.

⁸ Lapho oPhezukonke enika izizwe ilifa lazo, lalapho esahlukanisa abantu, wamisa imikhawulo yezizwe njengobunengi babantu bakoIsrayeli;

⁹ kodwa isabelo seNkosi saba ngabantu bayo, uJakobe waba yisabelo sayo esikhethiweyo.

¹⁰ Wamfumana elizweni eliyinkangala, enkangala elezilo ezibhongayo. Wamphahla, wamlondoloza, wamgcina, waba ligugu kuye.

¹¹ Njengokhozi olunyakazisa abantwana balo, oluphapha phezu kwamatsiyane alo, olwelula amaphiko alo ukuwathatha, luwathwale ngezimpaphe zalo,

¹² ngokunjalo iNkosi yamhola, kwakungekho layo unkulunkulu wabezizwe.

¹³ Wamkhwelisa endaweni eziphakemeyo zomhlaba, wadla izithelo zamasimu. Wamnika uluju oluvela edwaleni, lamagcobo aphuma elitsheni elilukhuni,

¹⁴ lezankefu zezinkomo, lochago lwezimbuzi, kanye lamafutha amawundlu lawezinqama, inkomo zaseBashani lezimbuzi, lamabele amahle; wanatha iwayini, igazi lezithelo zesivini.

¹⁵ Kodwa uJeshuruni wazimuka, wasehlamuka. Yebo, uIsrayeli waminza, wakhuluphala, wazimuka. Wasedela uNkulunkulu owamenzayo, wadelela iDwala lokukhululwa kwakhe.

¹⁶ Bavusa umhawu wakhe ngonkulunkulu babezizwe, bamthukuthelisa ngokwenza izinto ezinengekayo.

¹⁷ Bahlabela omoya ababi abangesibo onkulunkulu, onkulunkulu ababengabazi, onkulunkulu abatsha abasand’ukuvela, ababengesatshwa ngokhokho babo.

¹⁸ Kabalinanzelelanga iDwala elabazalayo, bamkhohlwa uNkulunkulu owabazalayo.

¹⁹ INkosi yakubona, yabafulathela, ngenxa yokucunula kwamadodana lamadodakazi ayo.

²⁰ Yathi: Ngizakubafihlela ubuso bami, ngibone ukuthi ukuphela kwabo kuzakuba yini; ngoba bayisizukulwana esingaqondanga, bangabantwana abangathembekanga.

²¹ Bavusile umona wami ngalokho okungesuye unkulunkulu; bangithukuthelisile ngezinto zabo eziyize. Ngakhoke ngizavusa umona wabo ngabangesibo abantu, ngibathukuthelise ngesizwe esiyisithutha.

²² Ngoba umlilo usubasiwe ngentukuthelo yami, uyatshisa kuze kube senzikini yendawo yabafileyo; uqeda umhlaba lezithelo zawo, utshise izisekelo zezintaba.

²³ Ngizabuthelela izinhlupheko, phezu kwabo, ngitshoke yonke imitshoko yami kubo.

²⁴ Bazakuqedwa yindlala, baqedwe yikutshisa lesifo esibuhlungu; ngizathuma kubo amazinyo ezilo, lobuhlungu bokuhuquzelayo othulini.

²⁵ Ngaphandle impi izakubulala, ezindlini kuzakuba khona ukwesaba okukhulu, kubhubhise insizwa lentombi, lomntwana omunyayo lendoda eyimpunga.

²⁶ Bengizakuthi: Ngizabachitha isibili, ngiqede ukukhunjulwa kwabo phakathi kwabantu;

²⁷ uba bengingesabi ukuzincoma kwezitha, lezitha zabo zikuhlanekele, zithi: Isandla sethu sinqobile; kakusiyo iNkosi eyenze konke lokhu.

²⁸ Ngoba bayisizwe esingelakuhlakanipha, kakukho ukuqedisisa kubo.

²⁹ Uba bebehlakaniphile, ngabe bakuqedisisa lokhu, bazi ukuphela kwabo.

³⁰ Uba umuntu emunye angaxotsha kanjani abayinkulungwane, lababili bangabadudula kanjani abazinkulungwane ezilitshumi, uba iDwala labo lingabathengisanga, leNkosi ingabanikelanga na?

³¹ Ngoba idwala labo kalinjengeDwala lethu; lezitha zethu ziyazibonela lokho.

³² Ivini labo livela evinini laseSodoma, emasimini aseGomora; izithelo zesivini sabo yizithelo ezilobuhlungu, amahlukuzo abo amunyu;

³³ iwayini labo liyibuhlungu bezinyoka, lobuhlungu bebululu.

³⁴ Lokho kakubekiwe kimi yini, kakunamekiwe endlini yami yenotho na?

³⁵ Ngokwami ukuphindisela lokubuyisela, ngesikhathi sokutshelela kwenyawo zabo; ngoba usuku lwabo lwengozi selusondele, lokho abakulungiselweyo kuzafika masinyane.

³⁶ Ngoba iNkosi izakubahlulela abantu bayo, izihawukele inceku zayo, lapho ibona ukuthi amandla abo aphelile, lokuthi kakulamuntu oseleyo ovalelweyo lokhululekileyo.

³⁷ Ng’khona izakuthi: Bangaphi onkulunkulu benu, idwala elaliphephela kulo,

³⁸ onkulunkulu abadla amafutha emihlatshelo yenu, abanatha iwayini lomnikelo wenu wokuthululwa na? Kabavuke bona, balisize, babe yisivikelo senu.

³⁹ Bonani ukuthi mina nginguye, kakho omunye unkulunkulu ngaphandle kwami; ngiyabulala, ngisilise; ngiyalimaza, ngelaphe; kakho ongakhulula esandleni sami.

⁴⁰ Ngoba ngiphakamisela isandla sami ezulwini, ngifunge ngithi: Njengoba ngiphila kokuphela,

⁴¹ nxa ngilola umhedla wami ocwazimulayo, lesandla sami sibambelela ekwahluleleni, ngizakubaphindisela abamelene lami. ngibe lempindiselo kwabangizondayo.

⁴² Ngizadakisa imitshoko yami ngegazi, umhedla wami uzakudla inyama, ngitsho ngegazi lababuleweyo lelabathunjiweyo, lelamakhanda ezitha alenwele ezinde.

⁴³ Dumisani abantu bayo, lina zizwe; ngoba iyaphindisela igazi lezinceku zayo, ibe lempindiselo kubo abamelene layo, yenzele ilizwe labantu bayo ukubuyisana.

⁴⁴ UMose wafika, wakhuluma wonke amazwi alingoma phambi kwabantu, yena loJoshuwa indodana kaNuni.

⁴⁵ UMose eseqedile ukukhuluma wonke lamazwi kubo bonke bakoIsrayeli,

⁴⁶ wathi kubo: Bekani enhliziyweni zenu wonke amazwi engiwakhuluma kini lamuhla, ukuba libalaye abantwana benu ngawo, bawagcine kuhle wonke amazwi alumlayo.

⁴⁷ Ngoba kini kakusiyo into eyize, kodwa kuyikuphila kwenu; ngalokhu lizahlala isikhathi eside elizweni elichapha iJordani ukulithumba.

UMose uvunyelwa ukuba akhangele ilizwe laseKanani

⁴⁸ INkosi yathi kuMose ngalona lolosuku:

⁴⁹ Khwela lintaba yaseAbarimi, intaba yaseNebo, eselizweni laseMowabi maqondana leJeriko, ukhangele ilizwe laseKanani engilinika abantu bakoIsrayeli ukuba yilifa labo,

⁵⁰ ufele entabeni oyikhwelileyo, umbelwe kwabakini, njengoAroni umfowenu owafela entabeni yaseHori, wambelwa kwabakibo.

⁵¹ Ngoba waphambana lami phakathi kwabantu bakoIsrayeli ngasemanzini aseMeriba‐Kadeshi enkangala yaseZini; ngoba ungangihloniphanga njengongcwele phakathi kwabakoIsrayeli.

⁵² Ngoba uzakulibona ilizwe phambi kwakho, kodwa kawuyikuya kulo, kawuyikungena elizweni engilinika ebantu bakoIsrayeli.