UDutheronomi 30 - iBhayibhili Elingcwele 1978

AbakoIsrayeli bazabusiswa ngokuphenduka langokulalela

¹ Lapho zonke izinto lezi sezehlele phezu kwenu, isibusiso lesiqalekiso engizibekileyo phambi kwenu, lizikhumbule phakathi kwezizwe zonke lapho iNkosi uNkulunkulu wenu elixotshele khona,

² lizabuyela eNkosini uNkulunkulu wenu lina labantwana benu, lilalele ilizwi layo ngenhliziyo yenu yonke langomphefumulo wenu wonke, kukho konke engililaya khona lamuhla.

³ INkosi uNkulunkulu wenu izalihawukela, ibuyise abathunjiweyo benu, ilibuthe futhi ebantwini lapho iNkosi uNkulunkulu wenu elihlakazele khona.

⁴ Uba bekhona abakini abaxotshelwe emikhawulweni yomhlaba, lalapho iNkosi uNkulunkulu wenu izakulibutha, ilithathe,

⁵ ilibuyisele elizweni okhokho benu abalithumba ukuba libe ngelenu, liphumelele, lande kakhulu kulabokhokho benu.

⁶ INkosi uNkulunkulu wenu izakuhlambulula inhliziyo zenu lenhliziyo zenzalo yenu, ukuba liyithande iNkosi uNkulunkulu wenu ngenhliziyo yenu yonke langomphefumulo wenu wonke ukuze liphile.

⁷ INkosi uNkulunkulu wenu izakwehlisela zonke iziqalekiso lezi phezu kwezitha zenu labafo benu ababelizingela.

⁸ Lizabuya lilalele ilizwi leNkosi, ligcine yonke imilayo yayo engililaya yona lamuhla.

⁹ INkosi izakuliphumelelisa kakhulu emisebenzini yonke yezandla zenu, enzalweni yezisu zenu, lenzalweni yenkomo zenu, lezithelweni zomhlaba wenu; ngoba iNkosi izakuthaba futhi ngokuliphumelelisa, njengalokhu yayithaba ngokhokho benu,

¹⁰ uba lilalela ilizwi leNkosi uNkulunkulu wenu, ligcine imilayo yayo lezimiso zayo ezilotshwe kulolugwalo lomlayo, liphendukela eNkosini uNkulunkulu wenu ngenhliziyo yenu yonke langomphefumulo wenu wonke.

¹¹ Ngoba lumlayo engililaya wona lamuhla kawulukhuni kini, futhi kawukhatshana lani.

¹² Kawukho ezulwini ukuba lithi: Ngubani ozakusenyukela aye ezulwini, asilandele wona ukuba siwuzwe siwugcine na?

¹³ Futhi kawungaphetsheya kolwandle ukuba lithi: Ngubani ozakuwela ulwandle, asilandele wona ukuba siwuzwe siwugcine na?

¹⁴ Kodwake ilizwi liseduze lani, lisemilonyeni yenu lenhliziyweni zenu ukuba liligcine.

¹⁵ Khangelani, ngibekile phambi kwenu lamhla ukuphila lokulunga, ukufa lobubi.

¹⁶ Uba lilalela imilayo yeNkosi uNkulunkulu wenu engililaya yona lamuhla, liyithande iNkosi uNkulunkulu wenu, lihambe endleleni zayo, ligcine imilayo yayo lezimiso zayo lezahlulelo zayo, lizakuphila lande; iNkosi uNkulunkulu wenu izalibusisa elizweni elingena kulo ukulithumba.

¹⁷ Kodwa uba inhliziyo zenu ziphenduka lingalaleli, liduhiswe, lidumise abanye onkulunkulu, libakhonze,

¹⁸ ngiyalitshela lamhla ukuthi lizakubhubha; kaliyikuhlala isikhathi eside elizweni elizangena kulo ukulithumba selichaphile iJordani.

¹⁹ Lamuhla ngiyabiza izulu lomhlaba ukufakaza ngani ukuthi ngibekile phambi kwenu ukuphila lokufa, isibusiso lesiqalekiso. Ngakhoke khethani ukuphila ukuba liphile lina lenzalo yenu,

²⁰ liyithande iNkosi uNkulunkulu wenu, lilalele ilizwi layo, libambelele kuyo; ngoba lokho kuzakulilethela ukuphila lokwanda kwensuku zenu ukuze lihlale elizweni iNkosi eyafunga kubokhokho benu oAbrahama loIsaka loJakobe ukubanika lona.