UDutheronomi 3 - iBhayibhili Elingcwele 1978

Inkulumo kaMose isaqhubeka

¹ Sasesiphenduka sihamba ngendlela eya eBashani. UOgi inkosi yaseBashani waphuma kanye labo bonke abantu bakhe, wasihlasela eEdreyi.

² Kodwa iNkosi uNkulunkulu yathi kimi: Ungamesabi, ngoba ngizamnikela yena labantu bakhe bonke lelizwe lakhe esandleni sakho; uzakwenza kuye njengokwenza kwakho kuSihoni inkosi yamaAmori owayehlala eHeshiboni.

³ Ngakhoke iNkosi uNkulunkulu wethu yamnikela ezandleni zethu loOgi inkosi yaseBashani kanye labo bonke abantu bakhe; sababulala, kakwaze kwasala muntu.

⁴ Sasesithatha yonke imizi yakhe; kasaze satshiya lowodwa; sathatha imizi engamatshumi ayisithupha lalo lonke ilizwe laseArigobi, umbuso kaOgi eBashani.

⁵ Yonke imizi le yayibiyelwe ngemithangala ephakemeyo ilamasango lemigoqo; sathatha futhi lemizana eminengi engabiyelwanga ngemithangala.

⁶ Sayichitha sayiqeda, njengokwenza kwethu kuSihoni inkosi yaseHeshiboni, sachitha yonke imizi, sabulala labantu abesilisa labesifazana labantwana.

⁷ Kodwa sathatha zonke inkomo kanye lempahla yemizi, kwaba yimpango yethu.

⁸ Ngalesosikhathi sawathathela amakhosi amabili amaAmori ayehlala ngaphetsheya kweJordani, ilizwe elisukela esihotsheni saseArinoni kwaze kwafika entabeni yaseHermoni.

⁹ — IHermoni amaSidoni ayibiza ngokuthi yiSiriyoni, lamaAmori athi yiSeniri. —

¹⁰ Sathatha yonke imizi yasemagcekeni kanye lalo lonke iGileyadi leBashani, kwaze kwafika eSaleka leEdreyi, imizi yombuso kaOgi eBashani.

¹¹ — Ngoba amaRefa ayesele kwasekunguOgi kuphela; umbheda wakhe wawungowensimbi; usekhona eRaba kumaAmoni. Ubude bawo babuzingalo ezificamunwemunye, lobubanzi bawo babuzingalo ezine, ngokwengalo yomuntu. —

¹² Ekuthumbeni kwethu lizwe ngalesosikhathi abakoRubeni labakoGadi ngabanika ilizwe elisukela eAroweri, eliseduze lesihotsha saseArinoni, kanye lengxenye yezintaba zaseGileyadi lemizi yalo.

¹³ Ingxenye yeGileyadi eseleyo lalo lonke iBashani, umbuso kaOgi, ngitsho lonke ilizwe laseArigobi, ngakunika ingxenye yesizwe sakoManase. — Lonke iBashani kuthiwa yilizwe lamaRefa.

¹⁴ UJayiri umntakaManase wathatha lonke ilizwe laseArigobi, ngitsho iBashani, kuze kube semngceleni wamaGeshuri lowamaMahakathi; wayibiza imizi ngebizo lakhe wathi yiHavothi‐Jayiri, kuze kube lamuhla.

¹⁵ Ngamnika uMakiri iGileyadi.

¹⁶ Ngabanika abakoRubeni labakoGadi ilizwe elisukela eGileyadi lize lifike esihotsheni saseArinoni, umngcele walo uphakathi kwesihotsha, lize lifike njalo emfuleni iJaboki, ongumngcele wamaAmoni.

¹⁷ Ngabanika leAraba, umngcele walo waba yiJordani, kusukela eKinerethi kuze kufike olwandle lwase Araba, oluluLwandle lweTshwayi, ngaphansi kwamawa asePisiga ngasempumalanga.

¹⁸ Ngalilaya ngalesosikhathi ngathi: INkosi uNkulunkulu wenu ilinikile lelilizwe libe ngelenu. Wonke amaqhawe enu azawela ehlomile phambi kwabafowenu, abantu bakoIsrayeli.

¹⁹ Kodwa omkenu labantwana benu lezinkomo zenu — ngiyazi ukuthi lilenkomo ezinengi — kuzakusala emizini engilinike yona,

²⁰ iNkosi ize ibanike ukuphumula abafowenu njengani, labo bakhe elizweni elingaphetsheya kweJordani, iNkosi uNkulunkulu wenu ebapha lona, andubana libuyele lonke elizweni lenu engilinike lona.

²¹ Ngamlaya uJoshuwa ngalesosikhathi ngathi: Usukubonile konke iNkosi uNkulunkulu wakho ekwenze kulawomakhosi amabili; izakwenza njalo kuyo yonke imibuso ozakudabula phakathi kwayo.

²² Lingabesabi, ngoba iNkosi uNkulunkulu wenu uqobo izalilwela.

²³ Ngayincenga iNkosi ngalesosikhathi ngathi:

²⁴ Nkosi Nkulunkulu, usuqalile ukutshengisa inceku yakho ubukhulu bakho lesandla sakho esilamandla; ngoba nguwuphi unkulunkulu ezulwini lasemhlabeni ongenza imisebenzi enjengeyakho, lezenzo ezinkulu ezinjengezakho na?

²⁵ Ungivumele ukuba ngichaphe, ngibone ilizwe elihle elingaphetsheya kweJordani, lezontaba ezinhle, leLebanoni.

²⁶ Kodwa iNkosi yangithukuthelela ngenxa yenu, kayingizwanga; yathi kimi: Kwanele; ungabe usakhuluma lami ngalindaba.

²⁷ Khwela engqongeni yePisiga, uphakamisele amehlo akho ngasentshonalanga langasenyakatho langaseningizimu langasempumalanga, ulikhangele ilizwe; ngoba kawusoze ulichaphe iJordani leli.

²⁸ Kodwa laya uJoshuwa, umkhuthaze, umqinise; ngoba yena uzakuwela phambi kwalababantu, abanike ilizwe olibonayo libe yilifa labo.

²⁹ Sasesihlala esigodini maqondana leBeti‐Peyori.