UDutheronomi 29 - iBhayibhili Elingcwele 1978

Isivumelwano seNkosi loIsrayeli elizweni laseMowabi

¹ La ngamazwi esivumelwano iNkosi eyamlaya uMose ukusenza labantu bakoIsrayeli elizweni laseMowabi, ngaphandle kwesivumelwano eyayisenze labo eHorebe.

² UMose wababiza bonke abakoIsrayeli, wathi kubo: Libonile konke iNkosi eyakwenza phambi kwenu elizweni laseGibithe, kuFaro lakuzo zonke izinceku zakhe lakulo ilizwe lakhe,

³ inhlupheko ezinkulu elazibonayo, lezozibonakaliso lalezozimangaliso ezinkulu.

⁴ Kodwa kuze kube lamuhla iNkosi kayilinikanga ingqondo yokuqedisisa lamehlo okubona lendlebe zokuzwa.

⁵ Ngiliholile enkangala iminyaka engamatshumi amane; izambatho zenu kaziguganga, lamanyathelo enu kawaphelanga enyaweni zenu;

⁶ kalidlanga isinkwa, kalinathanga iwayini lotshwala, ukuba lazi ukuthi ngiyiNkosi uNkulunkulu wenu.

⁷ Ekufikeni kwenu kulindawo, uSihoni inkosi yaseHeshiboni loOgi inkosi yaseBashani baphuma bayakulwa lathi, kodwa sabanqoba,

⁸ sathatha ilizwe labo, salinika abakoRubeni labakoGadi lengxenye yesizwe sakoManase ukuba libe ngelabo.

⁹ Ngakhoke gcinani kuhle amazwi alesisivumelwano, ukuba liphumelele kukho konke elikwenzayo.

¹⁰ Lonke limi phambi kweNkosi uNkulunkulu wenu lamuhla, inhloko zezizwe zenu, labalisa benu, lezinduna zenu, lawo wonke amadoda akoIsrayeli,

¹¹ labantwana benu, labomkenu, labemzini abasezihonqweni zenu abalibandela inkuni labalikhela amanzi,

¹² ukuba livume isivumelwano lesifungo seNkosi uNkulunkulu wenu esenzayo lani lamuhla,

¹³ ukuze ilimise lamhla libe ngabantu bayo, lokuze ibe nguNkulunkulu wenu njengokulithembisa kwayo lanjengokufunga kwayo kubokhokho benu, oAbrahama loIsaka loJakobe.

¹⁴ Kangisenzi lesisivumelwano lalesisifungo lani kuphela,

¹⁵ kodwa labo bonke abemi kanye lathi lamhla phambi kweNkosi uNkulunkulu wethu, kanye labangekho.

¹⁶ Liyazi ngokuhlala kwethu elizweni laseGibithe langokudabula kwethu phakathi kwezizwe ekuhambeni kwethu;

¹⁷ labona izinto zazo ezinengekayo, izithombe zazo ezenziwe ngesigodo langelitshe, ezesiliva lezegolide, ezazikhona kuzo.

¹⁸ Qaphelani, funa kube khona phakathi kwenu umuntu, umuzi ingabe isizwe, okulenhliziyo efulathela iNkosi uNkulunkulu wethu lamhla ukuyakhonza onkulunkulu balezozizwe. Qaphelani, funa kube khona phakathi kwenu impande ethela izithelo ezibabayo lezilobuhlungu,

¹⁹ ngitsho umuntu othi esizwa amazwi alesisifungo, azithokozise enhliziyweni yakhe athi: Kungaba kuhle kimi lanxa ngilandela inhliziyo yami elenkani; ngalokhu bonke abantu bangachitheka.

²⁰ INkosi kayiyikumthethelela, kodwa intukuthelo yayo lomhawu wayo kuzavutha kuye, zize zimehlele zonke iziqalekiso ezilotshiweyo ogwalweni lolu, iNkosi icitshe ibizo lakhe emhlabeni.

²¹ INkosi izakumahlukanisela ebubini kuzo zonke izizwe zakoIsrayeli, njengazo zonke iziqalekiso zesivumelwano ezilotshiweyo kulolugwalo lomlayo.

²² Isizukulwana esizayo, abantwana benu abazakuvela emva kwenu, kanye labezizwe abavela elizweni elikhatshana lapho bebona inhlupheko zalelilizwe lezifo iNkosi eligulise ngazo

²³ lonke ilizwe elitshiswe yisolufa letshwayi, elingelakho okuhlanyelweyo lokumilayo, lotshani, elichithwe njengeSodoma leGomora leAdima leZoboyimi, imizi eyachithwa yiNkosi ngentukuthelo yayo lolaka lwayo,

²⁴ bazabuza bonke besithi: INkosi yenzeleni lokhu kulelilizwe na? Kutsho ukuthini ukuvutha kwalolulaka olukhulu na?

²⁵ Abantu bazaphendula bathi: Kungoba badela isivumelwano seNkosi, uNkulunkulu wabokhokho babo, eyasenza labo ekubakhupheni kwayo eGibithe,

²⁶ bayakhonza abanye onkulunkulu abangabaziyo, babadumisa, iNkosi eyayitshilo ukuba bangabakhonzi.

²⁷ Ngalokhu yalithukuthelela lelilizwe, yalehlisela zonke iziqalekiso ezilotshiweyo ogwalweni lolu.

²⁸ INkosi yabasiphula elizweni labo ngentukuthelo enkulu langolaka olukhulu, yabaphosa kwelinye ilizwe njengalamhla.

²⁹ Izimfihlakalo zingezeNkosi uNkulunkulu wethu, kodwa izinto ezambuliweyo zingezethu lezabantwana bethu kuze kube nininini, ukuba sigcine wonke amazwi alumlayo.