UDutheronomi 28 - iBhayibhili Elingcwele 1978

Izibusiso zokulalela

¹ Uba lilalela ilizwi leNkosi uNkulunkulu wenu, ligcine kuhle yonke imilayo yayo engililaya yona lamuhla, iNkosi uNkulunkulu wenu izaliphakamisa phezu kwazo zonke izizwe zomhlaba.

² Lezizibusiso zonke zizakuba phezu kwenu, zehlele kini, nxa lilalela ilizwi leNkosi uNkulunkulu wenu.

³ Lizabusiswa emzini, libusiswe futhi ensimini.

⁴ Kuzakubusiswa inzalo yenu, lezithelo zomhlaba wenu, lenzalo yezifuyo zenu, lokwanda kwenkomo zenu lezimvu zenu.

⁵ Kuzakubusiswa isitsha senu lomganu wenu wokuxovela izinkwa.

⁶ Lizakubusiswa ekuhambeni kwenu konke.

⁷ Izitha zenu ezilivukelayo iNkosi izakuzinqoba phambi kwenu; zizakuphuma ukulihlasela ngandlelanye, zibaleke ngezindlela eziyisikhombisa.

⁸ INkosi izakuthuma isibusiso sayo phezu kwenu, eziphaleni zenu lakukho konke elizakukwenza, ilibusise elizweni iNkosi uNkulunkulu wenu elinika lona.

⁹ INkosi izakulimisa libe ngabantu abangcwele, njengokufunga kwayo kini, uba ligcina imilayo yayo, lihambe endleleni zayo.

¹⁰ Bonke abantu basemhlabeni bazakubona ukuthi libizwa ngebizo leNkosi, balesabe.

¹¹ INkosi izakulandisela izinto ezinhle, inzalo yenu, lenzalo yenkomo zenu, lezithelo zomhlaba wenu, elizweni iNkosi eyafunga kubokhokho benu ukulinika lona.

¹² INkosi izakulivulela indlu yayo yenotho ephezulu, ilinise izulu elizweni lenu ngesikhathi salo, ibusise wonke umsebenzi wezandla zenu; lizakweboleka izizwe ezinengi, kodwa lingeboleki lutho kuzo.

¹³ INkosi izakulenza libe yinhloko, lingabi ngumsila; lizakuba ngaphezulu, lingabi ngaphansi, uba lilalela imilayo yeNkosi uNkulunkulu wenu engililaya yona lamuhla, liyigcine kuhle.

¹⁴ Lingaphambuki lakwelilodwa lamazwi engililaya wona lamuhla, ukuya ngakwesokunene langakwesokhohlo, lingalandeli abanye onkulunkulu ukuze libakhonze.

Iziqalekiso zokungalaleli

¹⁵ Kodwa uba lingalaleli ilizwi leNkosi uNkulunkulu wenu, lingagcini kuhle yonke imilayo yayo lazo zonke izahlulelo zayo engililaya zona lamuhla, leziziqalekiso zonke zizakuba phezu kwenu zilehlele.

¹⁶ Lizaqalekiswa emzini, liqalekiswe futhi ensimini.

¹⁷ Kuzaqalekiswa isitsha senu lomganu wenu wokuxovela izinkwa.

¹⁸ Kuzaqalekiswa inzalo yenu, lezithelo zomhlaba wenu, lokwanda kwenkomo zenu lezimvu zenu.

¹⁹ Lizakuqalekiswa ekuhambeni kwenu konke.

²⁰ INkosi izakuthuma phezu kwenu iziqalekiso lenhlupheko lenkathazo kukho konke elizakukwenza, lize libhubhe liphele masinyane, ngenxa yezenzo zenu ezimbi ngoba lingidelile.

²¹ INkosi izalinamathelisa isifo, lize liphele elizweni elingena kulo ukulithumba.

²² INkosi izakulitshaya ngofuba, langomkhuhlane, langokuvuvuka komzimba, langokutshisa okukhulu, langendlala, langokuhanguka, langengumane; konke lokhu kuzakulixotsha lize libhubhe.

²³ Isibhakabhaka ngaphezu kwenu sizakuba lithusi, lomhlabathi ngaphansi kwenu ube yinsimbi.

²⁴ INkosi izakuphendula izulu elina elizweni lakini libe ngumsizi lothuli, kwehlele phezu kwenu kuvela phezulu, lize libhubhe.

²⁵ INkosi izakukwenza unqotshwe yizitha zakho; uzakuphuma ngandlelanye ukuzihlasela, uzibalekele ngezindlela eziyisikhombisa; uzakuba yinto eyesabekayo kuyo yonke imibuso yomhlaba.

²⁶ Isidumbu sakho sizakuba yikudla kwezinyoni zonke zaphezulu lokwezinyamazana zasemhlabeni, kungabi khona muntu ozixotshayo.

²⁷ INkosi izakukwehlisela amathumba aseGibithe, lamaqhubu, loqweqwe, lenkomo, elingelakwelatshwa kukho.

²⁸ INkosi izakukwehlisela ubuhlanya lobuphofu lokudideka kwengqondo,

²⁹ uphumputhe emini njengesiphofu siphumputha emnyameni, ungaphumeleli ekuhambeni kwakho; ucindezelwe kuphela, uphangwe njalonjalo, kungabi khona muntu okusizayo.

³⁰ Uzalobola umfazi, omunye umuntu alale laye; uzakwakha indlu, ungahlali kuyo; uhlanyele isivini, ungakhi izithelo zaso.

³¹ Inkabi yakho izahlatshwa phambi kwakho, ungayidli; ubabhemi wakho athathwe ngodlakela phambi kwakho, angabuyiselwa kuwe; izimvu zakho zinikwe izitha zenu, kungabi lamuntu okusizayo.

³² Amadodana lamadodakazi akho azakunikelwa kwesinye isizwe, lamehlo akho azakufiphala ngokuwalindela langokuwakhalela insuku ngensuku; izandla zakho kaziyikuba lamandla okusiza.

³³ Isizwe ongasaziyo sizakudla izithelo zomhlaba wakho lokwemisebenzi yonke yezandla zakho. Uzakucindezelwa kuphela, uchotshozwe njalonjalo,

³⁴ uze uhlanyiswe yizinto amehlo akho azibonayo.

³⁵ INkosi izakukutshaya emadolweni lasemilenzeni ngamathumba amabi ongelakwelatshwa kuwo, kusukela enyaweni zakho kuze kube sekhanda lakho.

³⁶ INkosi izalinikela lina lenkosi yenu elayibeka ukulibusa esizweni elingasaziyo lina labokhokho benu, likhonze lapho abanye onkulunkulu abenziwe ngesigodo langelitshe.

³⁷ Lizakuba yinto eyesabekayo, lesiga, lehlazo phakathi kwabantu bonke lapho iNkosi izakulisa khona.

³⁸ Lizakuhaza inhlanyelo enengi ensimini, livune okuyingcosana kuphela, ngoba kuzadliwa yisikhongwane.

³⁹ Lizakuhlanyela izivini, lizihlakulele, kodwa kaliyikunatha iwayini, kaliyikubutha izithelo zazo, ngoba imihogoyi izakuzidla.

⁴⁰ Kuzabuka khona izihlahla zeoliva kulo lonke ilizwe lakini, kodwa kaliyikugcoba lina ngamagcobo azo, ngoba izithelo zazo zizakuvuthuka.

⁴¹ Lizakuzala amadodana lamadodakazi, kodwa kawayikuba ngawenu, ngoba azakuthunjwa.

⁴² Zonke izihlahla zenu lezithelo zomhlaba wenu zizakudliwa yisikhongwane.

⁴³ Owemzini ohlala phakathi kwenu uzakuphakama phezu kwenu njalonjalo, lina lehlele phansi njalonjalo.

⁴⁴ Yena uzakuleboleka, lingameboleki; yena uzakuba yinhloko, lina libe ngumsila.

⁴⁵ Zonke leziziqalekiso zizakwehlela phezu kwenu, zixotshane lani, zilifice, lize libhubhe, ngoba kalilalelanga ilizwi leNkosi uNkulunkulu wenu, kaligcinanga imilayo yayo lezahlulelo zayo eyalilaya zona.

⁴⁶ Zizakwehlela phezu kwenu laphezu kwenzalo yenu kokuphela zibe yisibonakaliso sokwahlulelwa kukaNkulunkulu.

⁴⁷ Njengoba lingayikhonzanga iNkosi uNkulunkulu wenu ngokuthokoza langenhliziyo ejabulayo ngenxa yobunengi bempahla yenu yonke,

⁴⁸ lizakukhonza izitha zenu iNkosi ezakuzithuma kini ukulihlasela, lilambe, lome, lihambeze, liswele zonke izinto. Izakubophela entanyeni yenu ijogwe lensimbi, ize ilibhubhise.

⁴⁹ INkosi izalithumela isizwe esivela khatshana emkhawulweni womhlaba ukulihlasela, sifike ngejubane lokhozi, isizwe elingalwaziyo ulimi lwaso,

⁵⁰ isizwe esesabekayo, esingahloniphi abadala, esingelamusa kwabatsha.

⁵¹ Sizakudla amathole enkomo zenu lezithelo zomhlaba wenu, lize libhubhe; kasiyikulitshiyela amabele, lewayini, lamagcobo, lamankonyane enkomo zenu, lamazinyane ezimvu zenu, size silichithe.

⁵² Sizakulivimbezela kuyo yonke imizi yenu, ize idilike kulo lonke ilizwe imiduli yenu ephakemeyo leqinileyo elithembela kuyo; sizakulivimbezela emizini yenu yonke kulo lonke ilizwe lakini iNkosi uNkulunkulu wenu elinike lona.

⁵³ Ekuvinjezelweni lasekuhluphekeni kwenu elizakwehliselwa yizitha zenu lizakudla abantwana benu, inyama yamadodana leyamadodakazi enu iNkosi uNkulunkulu wenu alinike wona.

⁵⁴ Umuntu obuthakathaka lototoziweyo phakathi kwenu kayikunika umfowabo ukudla, lomkakhe othandekayo, labantwana bakhe abaseleyo;

⁵⁵ ngitsho kayikubanika inyama yabantwana bakhe abadlayo, ngoba engaselalutho ngenxa yokuvinjezelwa lokuhlupheka izitha zenu ezizakwehlisela phezu kwayo yonke imizi yenu.

⁵⁶ Owesifazana obuthakathaka lototoziweyo phakathi kwenu obengelasibindi sokunyathela phansi, ngoba ebuthakathaka kakhulu, njalo etotoziwe sibili, uzakwalela indoda yakhe ethandekayo, lendodana yakhe, lendodakazi yakhe,

⁵⁷ ukuba badle umnakwabo ophuma kuye kanye labantwana azakubazala; ngoba uzakubadla ensitha ekusweleni kwakhe, ekuvinjezelweni lasekuhluphekeni izitha zenu ezizakulehlisela khona.

⁵⁸ Uba lingagcini kuhle wonke amazwi alumlayo alotshiweyo ogwalweni lolu, ukuba lesabe lelibizo elilodumo lelesabekayo lokuthi: INkosi uNkulunkulu wenu;

⁵⁹ iNkosi izakulehlisela labantwana benu inhlupheko ezimangalisayo, ezinkulu lezingelakuphela, lemikhuhlane emikhulu lengelakuphela.

⁶⁰ Izakuphinda ukwehlisela phezu kwenu zonke izifo zaseGibithe elizesabayo, zinamathele kini,

⁶¹ kanye lazo zonke izifo lezinhlupheko ezingalotshwanga ogwalweni lwalumlayo, lize libhubhe.

⁶² Lanxa belingangenkanyezi zaphezulu ngobunengi, lizasala seliyingcosana, ngoba kalilalelanga ilizwi leNkosi uNkulunkulu wenu.

⁶³ Njengalokhu iNkosi ibithaba ngokulenzela okuhle langokulandisa, ngokunjalo izakujabula ngokulichitha langokulibhubhisa, lisuswe elizweni elingena kulo ukulithumba.

⁶⁴ INkosi izakulihlakazela phakathi kwabantu bonke, kusukela komunye umkhawulo womhlaba kuze kube komunye, likhonze lapho abanye onkulunkulu abenziwe ngesigodo langelitshe, elingabaziyo lina labokhokho benu.

⁶⁵ Phakathi kwalezozizwe kaliyikuba lokuthula kanye lendawo lapho lingabeka khona inyawo zenu; kodwa lapho iNkosi izakulipha inhliziyo ethuthumelayo lamehlo afipheleyo lomphefumulo ohluphekileyo.

⁶⁶ Ukuphila kwenu kakuyikuba leqiniso; lizakutshaywa luvalo emini lebusuku, lingabi lethemba lokuphila.

⁶⁷ Ekuseni lizakuthi: Kungathi kungahlwa! kusihlwa lithi: Kungathi kungasa! ngenxa yokwesaba okuzakwehlela kini langenxa yezinto elizakuzibona.

⁶⁸ INkosi izakulibuyisela eGibithe ngemikolo, ngendlela engatsho ngayo ukuthi: Kalisoze liyibone futhi. Lapho lizazama ukuzithengisa ezitheni zenu ukuba libe yizigqili lezigqilikazi, kodwa kakho ozakulithenga.