UDutheronomi 27 - iBhayibhili Elingcwele 1978

Ukulotshwa kwemithetho ematsheni entabeni yaseEbali

¹ UMose labalisa bakoIsrayeli balaya abantu bathi: Gcinani yonke imithetho esililaya yona lamuhla.

² Kuzakuthi mhla liwela iJordani lisiya elizweni iNkosi uNkulunkulu wenu elinika lona, limise amatshe amakhulu, liwabhade ngodaka,

³ lilobe kuwo wonke amazwi alumlayo nxa selichaphile ukuze lingene elizweni iNkosi uNkulunkulu wenu elinika lona eligcwele uchago lenyosi, njengalokhu iNkosi uNkulunkulu wabokhokho benu ilithembisile.

⁴ Lapho selichaphile iJordani, limise lamatshe engililaya ngawo lamhla, entabeni yaseEbali, liwabhade ngodaka.

⁵ Lakhele khona iNkosi uNkulunkulu wenu ialtare lamatshe angabazwanga ngento yensimbi.

⁶ Lakhele iNkosi uNkulunkulu wenu ialtare ngamatshe angabazwanga, linikele phezu kwalo iminikelo yokutshiswa eNkosini uNkulunkulu wenu,

⁷ linikele iminikelo yokuthula, lidle lapho, lithokoze phambi kweNkosi uNkulunkulu wenu.

⁸ Futhi lilobe ematsheni wonke amazwi alumlayo, liwagwale kuhle.

⁹ UMose labapristi abangamaLevi bathi kuIsrayeli: Thula, Israyeli, ulalele; lamhla selingabantu beNkosi uNkulunkulu wenu.

¹⁰ Ngakhoke lalela ilizwi leNkosi uNkulunkulu wakho, ugcine imilayo yayo lezimiso zayo engikulaya zona lamuhla.

Iziqalekiso entabeni yaseEbali

¹¹ UMose wabalaya abantu ngalolosuku wathi:

¹² Nxa selichaphile iJordani, lezizizwe zizakuma entabeni yaseGerizimi ukuba zibusise abantu: esakoSimeyoni, lesakoLevi, lesakoJuda, lesakoIsakari, lesakoJosefa, lesakoBenjamini.

¹³ Lezizizwe zizakuma entabeni yaseEbali ukuba ziqalekise: esakoRubeni, lesakoGadi, lesakoAsheri, lesakoZebuluni, lesakoDani, lesakoNafitali.

¹⁴ AmaLevi azamemezela ngelizwi elikhulu athi kuwo wonke uIsrayeli:

¹⁵ Kaqalekiswe umuntu owenza isithombe esibaziweyo lesibunjiweyo, into eyisinengiso eNkosini, umsebenzi wezandla zomuntu oyingcitshi, asimise ensitha. Bonke abantu bazakuthi: Ameni.

¹⁶ Kaqalekiswe odumaza uyise lonina. Bonke abantu bazakuthi: Ameni.

¹⁷ Kaqalekiswe osusa isikhonkwane sensimu yomakhelwane wakhe. Bonke abantu bazakuthi: Ameni.

¹⁸ Kaqalekiswe oduhisa isiphofu endleleni. Bonke abantu bazakuthi: Ameni.

¹⁹ Kaqalekiswe owonakalisa ukwahlulelwa kowemzini lentandane lomfelwakazi. Bonke abantu bazakuthi: Ameni.

²⁰ Kaqalekiswe olala lomkayise, ngoba embule umkayise. Bonke abantu bazakuthi: Ameni.

²¹ Kaqalekiswe olala lenyamazana. Bonke abantu bazakuthi: Ameni.

²² Kaqalekiswe olala lodadewabo, loba eyindodakazi kayise loba eyindodakazi kanina. Bonke abantu bazakuthi: Ameni.

²³ Kaqalekiswe olala loninazala. Bonke abantu bazakuthi: Ameni.

²⁴ Kaqalekiswe obulala umakhelwana wakhe ensitha. Bonke abantu bazakuthi: Ameni.

²⁵ Kaqalekiswe owamukela umvuzo wokuthengwa ukuba abulale umuntu ongelacala. Bonke abantu bazakuthi: Ameni.

²⁶ Kaqalekiswe ongalaleli amazwi alumlayo ngokuwagcina. Bonke abantu bazakuthi: Ameni.