UDutheronomi 25 - iBhayibhili Elingcwele 1978

¹ Uba abantu bexabana, baye kubathonisisi, abathonisisi bazakubathonisisa, bayekele ongelacala, balahle olecala.

² Uba olecala efanele ukutshaywa, umthonisisi uzakumlalisa phansi, atshaywe phambi kwakhe, ubunengi bemivimvinya bulingane icala lakhe.

³ Angatshaywa imivimvinya engamatshumi amane, kodwa engadluli leyo, funa owakini ayangeke phambi kwakho nxa etshaywa imivimvinya eminengi kulaleyo.

⁴ Ungayifaki isayeke inkabi nxa ibhula amabele.

Umlayo wokungena kumfazi ofelweyo

⁵ Uba izelamani zihlala ndawonye, omunye wazo afe engelandodana, umfazi wofileyo kayikuthathwa ngowemzini ongesuye wakibo; umfowabo wendoda yakhe uzakumngena, amthathe abe ngumkakhe.

⁶ Indodana elizibulo ayizalayo izathatha ibizo lomfowabo ofileyo, ukuba ibizo lakhe lingacimi koIsrayeli.

⁷ Uba umuntu engathandi ukumthatha umkamfowabo, umkamfowabo uzakuya kubalisa enkundleni athi: Umfowabo wendoda yami uyala ukuvusela umfowabo indlu koIsrayeli; uyala ukungingena.

⁸ Abalisa balowomuzi bazambiza, bakhulume laye. Uba eqinisa esithi: Kangithandi ukumthatha;

⁹ umkamfowabo uzasondela kuye phambi kwabalisa, amkhuphe inyathelo onyaweni, amkhafulele ebusweni, athi: Kakwenziwe kanjalo kulowomuntu ongayakhiyo indlu yomfowabo.

¹⁰ Indlu yakhe izakubizwa koIsrayeli ngokuthi: Yindlu yomuntu olenyathelo elakhutshwayo.

¹¹ Nxa amadoda amabili esilwa, kusondele umfazi wenye ukuba ayilamulele indoda yakhe kulowo oyitshayayo, elule isandla sakhe ayibambe ngamaphambili,

¹² quma isandla sakhe, ungabi lasihawu laye.

Umthetho wezilinganiso

¹³ Kakungabi khona esikhwameni sakho insimbi ezimbili zokulinganisa ezingalinganiyo, enye enkulu lenye encinyane.

¹⁴ Kakungabi khona endlini yakho izilinganiso ezimbili ezingalinganiyo, esinye esikhulu lesinye esincinyane.

¹⁵ Woba lensimbi yokulinganisa epheleleyo lelungileyo, kanye lesilinganiso esipheleleyo lesilungileyo, ukuba insuku zakho zibe zinengi elizweni iNkosi uNkulunkulu wakho ekunika lona.

¹⁶ Ngoba bonke abenza izinto ezinje, bonke abenza ukungalungi, bazondwa yiNkosi uNkulunkulu wakho.

Icala lamaAmaleki

¹⁷ Khumbulani lokho uAmaleki akwenza kini endleleni ekuphumeni kwenu eGibithe,

¹⁸ ukuthi walijuma endleleni selidiniwe, seliphele amandla, wachitha bonke ababehamba ngasemuva kwenu; kamesabanga uNkulunkulu.

¹⁹ Ngakho nxa iNkosi uNkulunkulu wenu isiliphumuzile kuzo zonke izitha zenu inxa zonke, elizweni elinika lina ukuba ngelenu, lizakumqothula umAmaleki ukuze angakhunjulwa emhlabeni; lingakhohlwa lokhu.