UDutheronomi 24 - iBhayibhili Elingcwele 1978

Imilayo yokwahlukana

¹ Uba indoda ithatha umfazi, angabe esathandeka kuyo, ngoba ifumanisile kuye into embi, kayimlobele incwadi yesahlukaniso, imnike yona, imkhuphe endlini yayo.

² Umfazi esesukile endlini yayo angahamba, athathwe ngenye indoda abe ngumkayo.

³ Uba lindoda yesibili ingasamthandi, imlobele incwadi yesahlukaniso, imnike yona, imkhuphe endlini yayo; loba lindoda yesibili eyamthathayo abe ngumkayo isifa,

⁴ leyondoda yokuqala eyamxotshayo ingamthathi futhi abe ngumkayo, lokhu esengcolisiwe; ngoba lokhu kuyinto eyisinengiso eNkosini; kaliyikonakalisa ilizwe iNkosi uNkulunkulu wenu elinika lona ukuba ngelenu.

⁵ Umuntu osand’ukuthatha umfazi kayikuphuma impi, futhi kayikuphatha umsebenzi omkhulu; uzakuhlala ekhaya wonke umnyaka ekhululekile ukuba athokozise umkakhe amthetheyo.

Eminye imilayo

⁶ Kakungabi khona umuntu ozathatha ilitshe lokuchola loba imbokodo ukuba kube yisibambiso; ngoba ngokwenza njalo uthatha ukuphila kube yisibambiso.

⁷ Uba umuntu efunyanwa ethumba omunye wabakibo koIsrayeli, amphathe njengesigqili loba amthengise, lowomuntu uzakubulawa. Ngalokhu lizaqeda ububi phakathi kwenu.

⁸ Nxa ubulawa yibulephero, qaphelisisa ukuba wenze konke abapristi abangamaLevi abakulaya khona; njengalokhu ngibalaya, qaphela ukuba lawe wenze njalo.

⁹ Khumbula lokho iNkosi uNkulunkulu wakho eyakwenza kuMiriyamu endleleni ekuphumeni kwakho eGibithe.

¹⁰ Nxa useboleka umakhelwane wakho ulutho, ungangeni endlini yakhe ukuba uthathe isibambiso sakhe.

¹¹ Uzakuma phandle, lowomuntu omebolekayo uzakuletha isibambiso kuwe.

¹² Uba engumyanga, ekunike ingubo yakhe yaba yisibambiso, ungalali layo;

¹³ kodwa uzasibuyisela kuye isibambiso lapho ilanga litshona, ukuba alale ngengubo yakhe, akubonge; lokho kuzakuthiwa yikulunga phambi kweNkosi uNkulunkulu wakho.

¹⁴ Ungacindezeli inceku eqatshiweyo engumyanga leswelayo, loba ingowabakini, loba ingowabezizwe abahlala elizweni lakini komunye wemizi yakini.

¹⁵ Mnike iholo lakhe insuku ngensuku, ilanga lingakatshoni, ngoba engumyanga, uyaliswela; uba ungenzi njalo, yena uzakhala eNkosini ngawe, kube yisono sakho.

¹⁶ Oyise kabayikubulawa ngenxa yabantwana, labantwana kabayikubulawa ngenxa yaboyise; wonke umuntu uzakubulawa ngenxa yesakhe isono.

¹⁷ Ungonakalisi ukwahlulelwa kowemzini lentandane; ungathathi ingubo yomfelwakazi ibe yisibambiso;

¹⁸ kodwa khumbula ukuthi wawuyisigqili eGibithe, wakhululwa lapho yiNkosi uNkulunkulu wakho; yikho ngikulaya ukuba wenze njalo.

¹⁹ Lapho uvuna ensimini yakho, ukhohlwe isithungo ensimini, ungabuyeli ukusithatha; sizakuba ngesowezizwe lesentandane lesomfelwakazi, ukuba iNkosi uNkulunkulu wakho ikubusise kuwo wonke umsebenzi wezandla zakho.

²⁰ Nxa usukhile izihlahla zakho zeoliva, ungaphindi ukukha okuseleyo ezingatsheni; lokho kuzakuba ngokowemzini lokwentandane lokomfelwakazi.

²¹ Nxa usuvunile izithelo zesivini sakho, ungathathi okuseleyo lapho usuqedile; kuzakuba ngokowemzini lokwentandane lokomfelwakazi.

²² Khumbula ukuthi wawuyisigqili elizweni laseGibithe; yikho ngikulaya ukwenza lokho.