UDutheronomi 23 - iBhayibhili Elingcwele 1978

Abangavunyelwa ukungena ebandleni leNkosi

¹ Umuntu olimele emasendeni, loba oqunywe amaphambili, angangeni ebandleni leNkosi.

² Ozelwe ngobufebe angangeni ebandleni leNkosi, longowenzalo yakhe kayikungena, kuze kube sesizukulwaneni setshumi.

³ Umuntu waseAmoni lowaseMowabi lenzalo yabo bangangeni ebandleni leNkosi kuze kube sesizukulwaneni setshumi;

⁴ ngoba kabalihlangabezanga endleleni ukulinika ukudla lamanzi ekuphumeni kwenu eGibithe; futhi baqatsha uBalami indodana kaBeyori owasePethori laseMesopotamiya ukuba aliqalekise.

⁵ Kodwake iNkosi uNkulunkulu wenu kayimlalelanga uBalami, yaphendula isiqalekiso saba yisibusiso kini, ngoba yalithanda.

⁶ Kalisoze libenzele ukuthula lenhlanhla zonke insuku zenu, kuze kube nini lanini.

⁷ Lingazondi owaseEdoma, ngoba ungumfowenu; lingazondi umGibithe, ngoba lalihlala elizweni lakibo.

⁸ Abantwana besizukulwana sesithathu abazalwa yibo bangangena ebandleni leNkosi.

Ukuhlambuluka kwamathente

⁹ Lapho lisezihonqweni, lisilwa lezitha zenu, lizakuzigcina kukho konke okubi.

¹⁰ Uba ekhona phakathi kwenu umuntu ongahlambulukanga ngenxa yokwenzeke kuye ebusuku, uzakuphumela ngaphandle kwezihonqo, angangeni kuzo;

¹¹ kusihlwa uzakugeza ngamanzi, abuyele ezihonqweni lapho ilanga selitshonile.

¹² Kakube khona indawo ngaphandle kwezihonqo yokuyela ngaphandle,

¹³ libe lezimbo phakathi kwezikhali zenu; nxa lisiya ngaphandle limbe ngazo, ligqibele ngomhlabathi amaphumelo.

¹⁴ Ngoba iNkosi uNkulunkulu wenu iyahamba phakathi kwezihonqo zenu, ukuba ililondoloze, inikele izitha zenu kini. Ngakhoke izihonqo zenu kazibe ngcwele, ukuba ingaboni lutho olungahlambulukanga phakathi kwenu, ilifulathele.

Imilayo emayelana lezigqili, lamawule, lomvuzo

¹⁵ Lingasibuyiseli kumniniso isigqili esibalekele kini;

¹⁶ sizakuhlala phakathi kwenu, endaweni esiyikhethayo, komunye wemizi yenu lapho sithanda khona; lingasixotshi.

¹⁷ Kakungabi khona iwule elethempeli phakathi kwabesifazana bakoIsrayeli, kungabi lomunye wamadoda akoIsrayeli ophingayo.

¹⁸ Lingalethi amaholo ewule lemali yokuphinga kwamadoda endlini yeNkosi uNkulunkulu wenu ukuba ligcwalise isithembiso ngayo; ngoba lezizinto ziyisinengiso eNkosini uNkulunkulu wenu.

¹⁹ Lingeboleki umfowenu ukuzuza inzalo yemali, loba umvuzo wokudla, loba umvuzo walokho okwebolekwa ngomvuzo.

²⁰ Lingeboleka owezizweni ngomvuzo, kodwa lingeboleki umfowenu ngomvuzo, ukuba iNkosi uNkulunkulu wenu ilibusise kukho konke elizakukwenza elizweni elingena kulo ukulithumba.

²¹ Nxa lisenza isithembiso eNkosini uNkulunkulu wenu, lingalibali ukusigcwalisa; ngoba impela iNkosi uNkulunkulu wenu izakukubiza kini; ukungasigcwalisi kuzakuba yisono senu.

²² Kodwa uba ungathembisanga, kawuyikuba lesono.

²³ Nanzelelani ukuba lenze lokho elikukhulume ngomlomo wenu; ngoba lokho elikuthembise ngomlomo wenu likuthembisile ngokuvuma eNkosini uNkulunkulu wenu.

²⁴ Nxa lingena esivinini somakhelwana wenu, lingadla izithelo zevini lize lisuthe njengokuthanda kwenu; kodwa lingazikheli esitsheni senu.

²⁵ Nxa lingena ensimini yomakhelwana elamabele, lingazikha izikhwebu ngesandla; kodwa lingawaqumi amabele akhe ngesikela.