UDutheronomi 22 - iBhayibhili Elingcwele 1978

Imilayo ngezinye izinto

¹ Uba ubona inkabi loba imvu yomuntu wakini iduha, ungayiyekeli, kodwa ibuyisele kuye.

² Uba umniniyo engekho eduze, loba ungamazi, ilethe emzini wakho, uyilondoloze, aze ayidinge umniniyo, ubusuyibuyisela kuye.

³ Wenze njalo langobabhemi wakhe, langengubo yakhe, langazo zonke izinto alahlekelwe yizo ozifumeneyo wena; ungali ukusiza.

⁴ Uba ubona ubabhemi womuntu wakini loba inkabi yakhe kuwele endleleni, ungakuyekeli; msize lowomuntu ukukuvusa.

⁵ Owesifazana angagqoki okwendoda, lendoda ingagqoki isigqoko sowesifazana. Ngoba owenza lokhu uyisinengiso eNkosini uNkulunkulu wakho.

⁶ Uba ufumana endleleni isidleke senyoni loba sisesihlahleni loba siphansi, silamatsiyane ingabe silamaqanda, unina efukamele amatsiyane loba amaqanda, ungathathi unina kanye lamatsiyane;

⁷ kodwa yekela unina ukuba ahambe, uzithathele amatsiyane. Ngalokho kuzakukulungela, uhlale insuku ezinengi.

⁸ Nxa usakha indlu entsha, uzakwenza umduli ophahleni lwayo, ukuba umuntu angawi khona, kungabi lecala legazi endlini yakho.

⁹ Ungahlanyeli inhlobo ezimbili zenhlanyelo esivinini sakho, funa zonke izithelo zibe ngcwele, kulahlekelwe inhlanyelo oyihlanyeleyo lezithelo zesivini.

¹⁰ Ungalimi ngenkabi uyibophele lobabhemi.

¹¹ Ungambathi ingubo eyenziwe ngoboya bezimvu langelembu elihle.

¹² Ubokwenza intshaka emiphethweni yomine yengubo yakho oyambathayo.

Imilayo emayelana lokuthatha umfazi

¹³ Uba umuntu ethatha umfazi, angene laye engutsheni, abesemala,

¹⁴ ambeke icala elilehlazo, amgcone athi: Ngathatha lowesifazana; lapho ngingena laye engutsheni ngafumana ukuthi kaseyiyo intombi emsulwa.

¹⁵ Uyise lonina bentombi bazakuyisa kubalisa bomuzi enkundleni, babatshengise ubufakazi bobuntombi bayo,

¹⁶ uyise wentombi athi kubalisa: Ngendisela indodakazi yami kulumuntu; useyala khathesi;

¹⁷ futhi yena uyibeke icala elilehlazo wathi: Kangifumananga ubufakazi bobuntombi endodakazini yakho. Kanti nampu ubufakazi bobuntombi bayo. Besebesendlala ingubo phambi kwabalisa bomuzi.

¹⁸ Abalisa bomuzi besebethatha lowomuntu, bemtshaya;

¹⁹ bamhlawulise amashekeli eseliva alikhulu, bawanike uyise wentombi, ngoba eyigconile intombi emsulwa yakoIsrayeli. Yona izakuba ngumkakhe, angayilahli zonke insuku zakhe.

²⁰ Kodwa uba kuliqiniso ukuthi intombi ingebuveze ubufakazi bobuntombi,

²¹ bazayisa ngasemnyango wendlu kayise, amadoda omuzi wakibo ayikhande ngamatshe ayibulale; ngoba yenzile okubi koIsrayeli ngokwenza ubuwule endlini kayise. Ngalokhu lizakuqeda ububi phakathi kwenu.

²² Uba indoda ifunyanwa ilele lomfazi wenye indoda, bobabili bazabulawa, indoda ebilele lomfazi kanye lomfazi. Ngalokhu lizaqeda ububi koIsrayeli.

²³ Uba umuntu ehlangana lentombi ekhombileyo phakathi komuzi, alale layo,

²⁴ lizakubakhuphela ngasesangweni lalowomuzi bobabili, libakhande ngamatshe libabulale; likhande ngamatshe intombi ngoba ingahlabanga umkhosi lanxa ibiphakathi komuzi, lendoda ngoba imonile umkamakhelwana wakhe. Ngalokhu lizaqeda ububi phakathi kwenu.

²⁵ Kodwa uba umuntu ehlangana lentombi ekhombileyo egangeni, ayibambe, alale layo, kakubulawe lowomuntu kuphela olele layo.

²⁶ Kodwa lingenzi lutho entombini, ngoba kayilacala elifanele ukufa; lindaba ifanana leyomuntu ovukela umakhelwana wakhe ambulale;

²⁷ ngoba ehlangene layo egangeni. Lanxa intombi ekhombileyo ibihlabe umkhosi, bekungelamuntu wokuyilamulela.

²⁸ Uba umuntu ehlangana lentombi engakhombanga, ayibambe, alale layo, baficwe,

²⁹ lowomuntu obelele layo uzakunika uyise wentombi amashekeli esiliva angamatshumi amahlanu, yona ibe ngumkakhe, ngoba eyingcolisile; angeyilahle zonke insuku zakhe.

³⁰ Umuntu angathathi umkayise, angamambuli umkayise.