UDutheronomi 21 - iBhayibhili Elingcwele 1978

Umlayo ngomuntu obuleweyo ongaziwayo

¹ Elizweni iNkosi uNkulunkulu wenu elinika lona ukuba libe ngelenu uba kufunyaniswa umuntu obuleweyo elele egangeni, kungaziwa ukuthi ngubani ombuleleyo,

² abalisa labahluleli benu bazakuza, balinganise ummango phakathi kobuleweyo lemizi eseduze.

³ Abalisa bomuzi oseduze lobuleweyo bazathatha ithokazi elingakhwelwanga, elingazanga libotshelwe ejogweni,

⁴ balehlisele esigodini esilamanzi angacimiyo, esingalinywanga lesingahlanyelwanga, bephule intamo yalo lapho.

⁵ Abapristi, amadodana kaLevi, bazakusondela; ngoba iNkosi uNkulunkulu wenu ibakhethile ukuba bayikhonze, babusise ebizweni layo, lokuba ngamazwi abo kungaqunywa indaba zokuxabana lokutshaya.

⁶ Bonke abalisa balowomuzi oseduze lobuleweyo bazagezela izandla zabo phezu kwethokazi elephulwe intamo yalo esigodini,

⁷ bafakaze bathi: Izandla zethu kazichithanga leligazi, lamehlo ethu kawakubonanga okwenzekileyo.

⁸ Nkosi, bathethelele abantu bakho bakoIsrayeli owabahlengayo, ungavumeli ukuba babekwe icala legazi elingelacala, kodwa bathethelelwe lona.

⁹ Ngalokhu lizaqeda icala legazi elingelacala phakathi kwenu nxa lisenza okulungileyo emehlweni eNkosi.

Ukuphathwa kwabesifazana abathunjiweyo

¹⁰ Lapho uphuma impi ukuyahlasela izitha zakho, iNkosi uNkulunkulu wakho izinikele ezandleni zakho, uzithumbe,

¹¹ ubusubona owesifazana omuhle omfisayo phakathi kwabathunjiweyo, uthande ukumthatha abe ngumkakho,

¹² uzakumusa emzini wakho, aphuce ikhanda lakhe, aqume inzipho zakhe,

¹³ akhumule ingubo zokuthunjwa kwakhe, ahlale emzini wakho elilela uyise lonina yonke inyanga, andubana amthathe, ube yindoda yakhe laye abe ngumkakho.

¹⁴ Uba ungasamthandi, uzamyekela ukuba ahambe aye lapho ethanda khona; kodwa ungamthengisi ngemali, ungamphathi njengesigqili, ngoba usumonile.

Ilifa lobuzibulo

¹⁵ Uba umuntu elabafazi ababili, omunye ethandwa nguye lomunye engamthandi, bobabili bamzalele abantwana, njalo uba indodana elizibulo ingumntwana womfazi ongathandwayo,

¹⁶ kuzakuthi mhla enika amadodana akhe impahla yakhe ibe yilifa lawo, angayiphathi indodana yomfazi othandwayo ngokungathi ilizibulo, angayithandi kakhulu kulendodana yongathandwayo elizibulo loqobo;

¹⁷ kodwa kavume ukuthi indodana yongathandwayo yilona izibulo, ayinike isabelo esiphindwe kabili sempahla yakhe yonke, ngoba ilizibulo lakhe, ilelungelo lobuzibulo.

Ukuphathwa kwabantwana abalenkani

¹⁸ Uba umuntu elendodana elenkani lengezwayo, engalaleli ilizwi likayise lelikanina, ingabezwa lanxa beyitshaya,

¹⁹ bazayibamba, bayise kubalisa bomuzi wakibo, enkundleni yaleyondawo,

²⁰ bathi kubalisa bomuzi: Lindodana yethu ilenkani, kayizwa, kayilaleli ilizwi lethu; iyisiminzi lesidakwa.

²¹ Ng’khona wonke amadoda alowomuzi azayikhanda ngamatshe. Ngalokho lizaqeda ububi phakathi kwenu; wonke uIsrayeli uzakuzwa, esabe.

Umlayo ngomuntu ophanyekwayo

²² Uba umuntu owenze icala elifanele ukufa ebulawa, lizamphanyeka esihlahleni,

²³ isidumbu sakhe singahlali esihlahleni ubusuku bonke, kodwa lizamlahla ngalona lolosuku, ngoba umuntu ophanyekiweyo uqalekisiwe nguNkulunkulu. Lingangcolisi ilizwe lenu iNkosi uNkulunkulu wenu elinika lona ukuba ngelenu.