UDutheronomi 19 - iBhayibhili Elingcwele 1978

Imizi yokuphephela

¹ Lapho iNkosi uNkulunkulu wenu isichithile izizwe zelizwe iNkosi uNkulunkulu wenu elinike lona, lalapho selizinqobile, selihlala emizini yazo lasendlini zazo,

² lizakuzahlukanisela lina imizi emithathu elizweni iNkosi uNkulunkulu wenu elinika lona ukuba libe ngelenu.

³ Lizalungisa izindlela, lahlukanise ilizwe iNkosi uNkulunkulu wenu elinika lona libe ngelenu, kube lezigaba ezintathu abangaphephela kuzo bonke ababulali.

⁴ Nantu uhlobo lombulali ongaphephela khona ukuba asile. Uba umuntu ebulala umakhelwane wakhe kungesikho ngabomu ebekade engamzondi,

⁵ njengomuntu oya ehlathini lomakhelwane wakhe ukugamula izihlahla, kuthi lapho egamula isihlahla ngehloka lakhe, ihloka likhumuke emphinini, limtshaye umakhelwane wakhe afe, lowomuntu angaphephela komunye waleyomizi ukuba asile.

⁶ Uba kungekho imizi enjalo, umphindiseli wegazi emthukuthelele kakhulu umbulali, axotshane laye, amfice ngoba indlela inde, amtshaye ambulale, lanxa lowombulali ebengafanele ukufa ngoba ebekade engamzondi umakhelwane wakhe.

⁷ Ngalokhuke ngiyalilaya ukuba lahlukanise imizi emithathu.

⁸ Uba iNkosi uNkulunkulu wenu isandisa ilizwe lenu njengokufunga kwayo kubokhokho benu, ilinike lonke ilizwe eyathembisa ukubanika lona,

⁹ uba ligcina kuhle yonke limithetho engililaya yona lamhla, lithande iNkosi uNkulunkulu wenu, lihambe endleleni zayo njalonjalo, lizakwengezelela eminye imizi emithathu kuleyo.

¹⁰ Yenzani lokhu ukuba kungachithwa igazi elingelacala elizweni lakini elinika lona iNkosi uNkulunkulu wenu ukuba ngelenu, lingabi lacala legazi.

¹¹ Kodwake uba umuntu emzonda umakhelwane wakhe, amcathamele, amjume, amtshaye ambulale, abalekele komunye walimizi,

¹² abalisa bomuzi wakhe bazathumela abantu ukuba bamthathe lapho, bamnikele kumphindiseli wegazi ukuba afe.

¹³ Lingamhawukeli, kodwa qedani koIsrayeli icala lokuchitha igazi elingelacala, ukuba kulilungele.

¹⁴ Kaliyikusiphuna izikhonkwane zomngcele welizwe lomakhelwana wenu ezabethelwa ngabendulo endaweni elizakuyithatha elizweni iNkosi uNkulunkulu wenu elinika lona ukuba libe ngelenu.

Umlayo wobufakazi

¹⁵ Ufakazi oyedwa nje angafakazi ngomuntu olecala loba olesono asenzileyo; kodwa indaba ingaqiniswa ngamazwi abofakazi ababili, loba abathathu.

¹⁶ Uba kuvela ufakazi wamanga afakazele umuntu ngokubi,

¹⁷ abantu bobabili abaxabeneyo bazakuza phambi kweNkosi, phambi kwabapristi labahluleli abazakuba bekhona ngalesosikhathi.

¹⁸ Abahluleli bazabuzisisa ngakho; uba ufakazi engufakazi wamanga, efakaze amanga ngomfowabo,

¹⁹ lizakwenza kuye lokho abefisa ukwenza kumfowabo; ngalokhu lizakuqeda ububi phakathi kwenu.

²⁰ Abanye bazakuzwa ngalokho, besabe, bangabe besenza okubi okunje phakathi kwenu.

²¹ Lingabi lasihawu kuye; ukuphila kakwenanwe ngokuphila, ilihlo ngelihlo, izinyo ngezinyo, isandla ngesandla, unyawo ngonyawo.