UDutheronomi 18 - iBhayibhili Elingcwele 1978

Imivuzo yobupristi

¹ Abapristi abangamaLevi, ngitsho sonke isizwe sakoLevi, kabayikuba lesabelo selizwe koIsrayeli; bazakudla iminikelo yeNkosi eyokutshiswa, lalokho okumele kunikelwe kuyo.

² Kabayikuba lesabelo phakathi kwabafowabo, ngoba isabelo sabo siyiNkosi njengokubathembisa kwayo.

³ Abantu abanikela umhlatshelo, inkabi loba imvu, bamele ukumnika umpristi umkhono lemihlathi yomibili lolusu.

⁴ Limnike izithelo zokuqala zamabele enu lezewayini lenu lezamagcobo enu, kanye loboya bezimvu zenu ezigundwe kuqala.

⁵ Ngoba iNkosi uNkulunkulu wenu imkhethile kuzo zonke izizwe zenu ukuba eme, akhonze ebizweni leNkosi, yena lamadodana akhe njalonjalo.

⁶ Uba umLevi ohlala loba kuwuphi umuzi wakoIsrayeli ezimisela ukuya endaweni iNkosi ezakuyikhetha,

⁷ uzakukhonza ebizweni leNkosi uNkulunkulu wakhe njengabo bonke abakoLevi abaphatha inkonzo phambi kweNkosi,

⁸ adle isabelo sokudla esilingana lezabelo zabo, ngaphandle kwalokho akuzuze ngokuthengisa impahla yakhe.

AbakoIsrayeli baxwayiswa ukuba bangavumisi

⁹ Lapho selifikile elizweni iNkosi uNkulunkulu wenu elinika lona, lingafundi ukwenza imikhuba enengekayo yalezozizwe.

¹⁰ Kakungabi khona phakathi kwenu umuntu otshisa ngomlilo indodana yakhe lendodakazi yakhe ibe ngumnikelo, lovumisayo, lohlolayo imihlola, lowenza imilingo, lomthakathi,

¹¹ lophosayo, lolamadlozi, lolumbayo, lokhuluma labafileyo.

¹² Ngoba lowo owenza lezizinto uyazondwa yiNkosi. Ngenxa yalimikhuba enengekayo iNkosi uNkulunkulu wenu iyazixotsha izizwe phambi kwenu.

¹³ Thembekani eNkosini uNkulunkulu wenu.

UNkulunkulu uthembisa ukuvusela abantu umprofethi

¹⁴ Izizwe lezi elizakuzinqoba ziyalalela abahlola imihlola labavumisayo; kodwa lina, iNkosi uNkulunkulu wenu kayilivumeli ukuba lenze njalo.

¹⁵ INkosi uNkulunkulu wenu izakulivusela phakathi kwabakini umprofethi onjengami; limlalele yena.

¹⁶ Lakucela lokhu eNkosini uNkulunkulu wenu eHorebe ngosuku lokuhlangana, lathi: Asingabe sisalizwa ilizwi leNkosi uNkulunkulu wethu, singabe sisawubona lumlilo omkhulu, funa sife.

¹⁷ INkosi yathi kimi: Konke abakucelileyo kuhle.

¹⁸ Ngizakubavusela umprofethi onjengawe kubafowabo; ngizakubeka amazwi ami emlonyeni wakhe, akhulume kibo konke engizakumlaya khona.

¹⁹ Lowo lalowo ongayikulalela amazwi ami umprofethi azakuwakhuluma ebizweni lami, uzakuba lecala kimi.

²⁰ Kodwa umprofethi okhuluma ilizwi ngokuziqhenya ebizweni lami engingamlayanga ukulikhuluma, loba ekhuluma ebizweni labanye onkulunkulu, lowomprofethi uzakufa.

²¹ Mhlawumbe lizakuthi enhliziyweni zenu: Sizakwazi kanjani ukuthi ilizwi kalikhulunywanga yiNkosi na?

²² Lapho umprofethi ekhuluma ebizweni leNkosi, kungenzeki leyonto akhulume ngayo, lingagcwaliseki ilizwi lakhe, lelolizwi belingakhulunywa yiNkosi; umprofethi uzikhulumele yena ngokuziqhenya; lingamesabi.